Yawhana 12 - Kibaku NT

Ndǝ Puti Wardi ata Yɛsu akwa Bathlani

¹ Wudzǝr Ngǝmba mbi vǝr nkwa, antǝ Yɛsu ka si akwa Baitanya vui nam tǝ Laizǝru akwa, ndǝ nam tǝ Yɛsu tara hyanti akwa nti.

² Akwani tǝ ndǝ 'ya alari sǝr sǝmǝr vǝri, Marthla ani tara 'ya wudzǝrari, Laizǝru tsuwɛ dzǝ akwa ntsa ndzǝ nam ata sǝm vwam kaka dza.

³ Antǝ Maryamu ka kǝtǝ ngal pathlu nǝr nardi zalala, dzǝ wardi nam dzau; dzǝ ka pukǝr ala thlǝla Yɛsu, ba dzǝ ka ɗangulnta thlǝlarari tǝ sǝsǝrni. Sǝwur mal ndari kǝtǝ sanga kuta kǝiyari.

⁴ Ama Yahuda Iskaryauti pathlu akwa ntsa ndzǝr nuwurni, nam sam ata ɓǝlai tǝni, ka nkǝrɛ apǝri,

⁵ “Kami kura ndǝ awa ɗǝlnta wardi ǝni ka ndǝ ndǝghǝti kwapari ala ngudi yarɛ? Ata 'ya kwapar kǝthlǝr ndɛ nǝr fá pathlu.”

⁶ Dzǝ nkǝr apani, adi ka apǝri dzǝ ada wulhǝ ndzǝ nam ngudi wɛ, ama kadǝbar dzǝ ndǝr hǝlɛ. Ba ngǝrkǝr kwapar dar akwa tsiyari, dzǝ ada hǝlɛ sǝ nam akwa.

⁷ Yɛsu ka nkǝrɛ, “Ngyaramɛ tǝni, dzǝ ada vi tǝni kadǝbar dzǝ ɗǝmhǝi ka vǝr har tǝra.

⁸ Kǝlara saka gǝr vwam kaka ngudi yarɛ, ama adi kǝlara sakatǝ Yi vwam kaka gǝr wɛ.”

⁹ Tǝ tsaɓtsǝnidzǝr ndzǝr Yahudi nam hang tara ngati apǝri Yɛsu akwanda, antǝ dar ka si adi ka Yɛsu ɗiɗi wɛ, har ma ka dar wuti Laizǝru nam tǝ dzǝ hyanti akwa ntǝnti.

¹⁰ Antǝ nggar fǝrist yarni ka 'ya sawariyir tsi Laizǝru dzǝ ma,

¹¹ akuya atarni ani tǝ ndzǝr Yahudi yarɛ hang ada mwari adzǝ Yɛsu tǝ dar ada hamnta dzǝri akwa dza.

Ndzǝr Ursalima Dlutsi Yɛsu

¹² Sǝbar arpɛ tsaɓtsǝnidzǝr ndzǝ hang nam tara si akwa sataka ni, dar ngati apǝri Yɛsu angwada si akwa Ursalima.

¹³ Kadǝbar ka ǝni, dar thlǝthlǝkwi thlaliyir dibuna, tǝ dar lǝka dlu tǝni, dar ada haɓǝ kuɗahɛ ada nkǝrɛ apǝri, “Hausana!” “Barka aka ndǝ nam ada si akwa thlǝma Hyal Thlaku!” “Barka ani Kuhyir Izǝraila!”

¹⁴ Yɛsu ka ɓui kustar kwara dzǝ ka fǝlti, apa tǝ ndǝ rǝbwai apǝri,

¹⁵ “Ta gǝr ta hyivǝr, gǝr Ndzǝr Ursalima. Wulɛ! Kuhyir gǝri aghǝli ada si, ata hǝiya kustar kwara!”

¹⁶ Akwa baditsǝni ndzǝr nuwurni ta ngaba sanga sǝ ǝni wɛ. Ɗiɗi aghǝla tǝ ndǝ la nggakur Yɛsu dar ka ɗǝngati apǝri sǝ ǝni yarni kǝ rǝbwaidzi ata kǝrari ba ani tǝ dar 'yati sǝ yarni alari.

¹⁷ Tsaɓtsǝnidzi nam vwam kaka dza sakatǝ tǝ dzǝ kǝga Laizǝru akwa kulɛ ba dzǝ ka hyanti tǝni akwa ntǝnti lǝkǝma aka kikil labar ni.

¹⁸ Ani tǝ ndzǝ hang sǝba ka dar kǝɓai aka dza kadǝbar tǝ dar ngati apǝri dzǝ ada 'yati parsu nǝr ndatǝdzi ǝni.

¹⁹ Ani ndzǝr Farisi ka nkǝrɛ ala kǝma dar, “Wulamɛ, su tǝ muri awa mǝzi 'yati adi wɛ! Sanga dunya dar aghǝlari!”

Yɛsu Ndǝrɛ ata Kǝra Ntǝrni

²⁰ Yau, akwa ntsa ndzǝ nam tara siya vǝkǝr sǝlai akwa sataka ni, ndzǝ kura Yahudi yar laka adai.

²¹ Dar ka si adzǝ Filibusu, ndǝr Bathsaida akwa diyir Galili, dar ka kǝgyǝ tǝni tǝ dar nkǝrɛ, “Thlaku, yar ada bara ka yar ndǝrɛ ala Yɛsu.”

²² Filibusu ka mwar gha ala Andǝrawusu, Andrawasu aka Filibusu dar ka mwari ka nkǝrɛ ala Yɛsu.

²³ Yɛsu sǝnau ala dar ka nkǝrɛ, “Saka kǝ 'ya nam tǝ Zǝr Ndɛ ata lǝkwa nggakurni.

²⁴ Pakat dzǝri, Yi ada nkǝrɛ ala gǝri, ma apǝri ndǝ ta harnta munyar lǝkama wɛ, dza ata ndzai dzǝ duku. Ama ma dzǝ nti, dzǝ ata yai munya hang.

²⁵ Ndǝ nam ada yiɗǝ mpikari, mpikari ata sa. Ndǝ nam kura ada yiɗǝ sǝr dunya ni akwa mpikari, dzǝ ata vi mpikari kura kurkuri.

²⁶ Kǝlara ndǝ nam ada 'ya kǝthlǝr alai, kǝ ndzai ntsakǝr ka dzǝ nu tǝra. Ba vui nam tǝ Yi akwa, zǝr kǝiyirna yɛ ata ndzai akwa. Babarna ata la nggakur ala ndǝ nam ada 'ya kǝthlǝr alai.”

²⁷ “Kulini Yi ada nga damitsǝnidzi akwa ɗǝfawai. Sǝr mi tǝ Yi awa gha? Ka Yi nkǝrɛ, ‘Bana kǝlnta alai saka ǝni?’ A'a wɛ, Yi si ma akuya ka saka ǝni.

²⁸ Bana, ka gǝ hǝmnti thlǝma gɛ.” Antǝ kuɗahu laka atahyal nkǝrɛ, “Yi kurtaka hǝmnti tǝni, Yi ata ɓǝla dzakti hǝmnti tǝni.”

²⁹ Tsaɓtsǝnidzi nam akwa vui ndari tǝ dar ngati kuɗahǝ ni, dar ka nkǝrɛ apǝri, ndǝ 'ya pǝral, Ndzǝ yar laka nkǝrɛ apǝri, “Ndǝr hyantǝr Hyal laka ndǝrɛ alari.”

³⁰ Yɛsu sǝnau, “Adi kadǝbar yɛ ani tǝ ndǝ 'ya labar ni wɛ, ama kadǝbar gǝri.

³¹ Kulini ani tǝ ndɛ ata 'ya ala dunya ǝni haka, kulini tsuwɛ ani tǝ ndɛ ata kǝlba kuhyir dunya ni.

³² Ama Yɛ, saka nam tǝ ndǝ haɓǝtǝ tǝra ata dai, Yi ata ndǝrti sanga ndzi adzǝra.”

³³ Dzǝ nkǝr ahani ka dzǝ tsanti dzǝli nti nam tǝ dzǝ ata 'ya.

³⁴ Antǝ hangkur ndzɛ ka kalaktsǝni alari ka nkǝrɛ, “Mabari yar nkǝrɛ ala yar apǝri Kǝrsti ata ndzai kura kurkuri. Yau, mǝmi tǝ gǝ ata nkǝrɛ pakat ka ndǝ haɓǝti Zǝr Ndɛ? Wa dza Zǝr Ndari?”

³⁵ Yɛsu nkǝrɛ ala dar, “Paraku dzǝ vwam kaka gǝr nǝr saka nkyiɗu laka alǝkǝma. Mwaramɛ tǝ paraku tsu awa dai, ta kuthlɛ ta ɓui gǝri. Ndǝ nam ada mwari akwa kuthlɛ dzǝ adi ata zǝndi vui nam tǝ dza ada mwari akwa wɛ.

³⁶ Ka gǝri mbǝrsa aka paraku tsu tǝ gǝr vwam kaka dza, kadǝbar ka gǝri ndzai madar paraku.” Aghǝla tǝ dzǝ gha sǝ yarni, Yɛsu mwara tǝra ba dzǝ ka ɗǝwar kǝrni ta dar.

Ndzǝr Yahudi Lǝkǝma akwa Ndzai Kura Mbǝrsa

³⁷ Wala apani ma Yɛsu 'ya parsu nǝr ndatǝdzi hang akǝma dar, dar ta mbǝrsa akwa dza wɛ.

³⁸ Əni ka dzǝ ghǝiyaba labarǝr nabi Isaya: “Hyal Thlaku, wa dzǝ ani tara mbǝrsa aka labar yar? Ala wa tsuwɛ tǝ ndǝ tsanti dǝnar Hyal Thlaku?”

³⁹ Ani sǝ nam tara 'ya kura dar ta mǝzi mbǝrsa, apa tǝ Isaya ɓǝla nkǝrɛ,

⁴⁰ “Dzǝ mǝrti ntsa dar ghyang, dzǝ ka ɓakta mǝrti ɗǝfa dar ɓaɓal, Kadǝbar kura dar awa wula aka ntsa dar, ba kura dar awa ngaba akwa ɗǝfa dar, ba kura dar awa sǝmwatǝdzi, ka Yi mbǝti tǝ dar.”

⁴¹ Isaya nkǝrɛ ahani kadǝbar dzǝ wula nggakur Yɛsu, dzǝ ka ndǝrɛ ata kǝrari.

⁴² Wala apani, hang akwa ntsa ndzǝ nam ngganggar Yahudi ma mbǝrsa aka Yɛsu, ama akuya ka hyivǝr ndzǝr Farisi, dar ta ndǝrɛ akǝri ata babal wɛ, kadǝbar ta ndǝ ta kǝdlǝba tǝ dar akwa fǝr vǝkǝr sǝlai ala Hyal.

⁴³ Dar yiɗǝ hǝmǝr ndɛ ɓwalta hǝmǝr Hyal.

⁴⁴ Yɛsu ka haɓǝti kuɗahari ka nkǝrɛ, “Ndǝ nam tara mbǝrsa akwa yɛ, adi akai ɗiɗi tǝ dzǝ ada mbǝrsa wɛ, ama akwa ndǝ nam tara hyanti tǝra yɛ.

⁴⁵ Ndǝ nam tara wula tǝra, dzǝ wula ndǝ nam tara hyanti tǝra.

⁴⁶ Yi si akwa dunya apa paraku, ani ka kǝlara ndǝ nam ada mbǝrsa akai dzǝ adi ata ndzai akwa kuthlɛ wɛ.

⁴⁷ “Kǝlara ndǝ nam tara ngati ndǝrǝrna yarɛ, ama dzǝ ta ɓǝlati wɛ, adi Yi ani ata haka tǝni wɛ, kadǝbar Yi ta si ka 'ya haka ala dunya wɛ, ama ani ka Yi mbati tǝni.

⁴⁸ Ndǝ nam tara ngǝla tǝra, ba kura ta dlutsi ndǝrǝrna, dzǝ aka ndǝr haka tǝni adai; ndǝr nam tǝ Yi tara gha ni ata ndzai sǝr hakar tǝni vǝr dǝnta.

⁴⁹ Adi aka dǝnarna tǝ Yi ada 'ya labar ni wɛ, ama Tada nam tara hyanti tǝra ani tara tsau alai sǝ nam tǝ Yi ada gha, ba aka whal nam tǝ Yi ada gha.

⁵⁰ Yi zǝndi tsawurni ata si aka mpikǝ nam kura kurkuri. Əni ani sǝ nam tara 'ya tǝ Yi ada gha kal-kal apa tǝ Tada tara nkǝrɛ alai.”