Yawhana 10 - Kibaku NT

Karabu ata Kǝra Ndǝr Ɓǝla

¹ “Pakat dzǝri, Yi ada nkǝrɛ ala gǝri, ndǝ nam kura ata lǝkwa mǝtsǝɓǝr tǝma ata nyavǝr, ama dzǝ ngǝmɛ ata vui laka, yau, dzǝ ndǝr hǝlɛ, ba fa whalɛ.

² Ndǝ nam tara lǝkwa ata nyavǝr, dzǝ ani ndǝr ɓǝla tǝmari.

³ Ndǝr ɓǝla nyavǝrari ata mburnta alari, tǝma yarari dar ata sǝthlǝmɛ ala kuɗahari. Dzǝ ada kǝga tǝmarni aka thlǝma dar, ka dzǝ mwara ka dar alǝba.

⁴ Aghǝla tǝ dzǝ lǝba aka sanga tǝmarni, dzǝ ada lǝkǝma ala dar. Tǝma yarari ada nu tǝni, kadǝbar dar zǝndi kuɗahari.

⁵ Ama dar adi ata saga nu mǝthlǝɓi wɛ; ama dar ata whui atǝra ka ngyar tǝni, kadǝbar dar ta zǝndi kuɗaha mǝthlǝɓi wɛ.”

⁶ Yɛsu gha ala dar karabu ǝni, ama dar ta ngaba sǝ nam tǝ dzǝ ada gha ala dar wɛ.

⁷ Yɛsu ɓǝla nkǝrɛ ala dar, “Pakat dzǝri Yi ada nkǝrɛ ala gǝri, Yi dza nyavǝr tǝma.

⁸ Kǝlara ndzǝ nam tara si kǝmata yɛ, dar ndzǝr hǝlɛ, ba fa whalɛ, ama tǝma yarɛ adi ada si thlǝmɛ ala dar wɛ.

⁹ Yi dza nyavǝr; kǝlara ndǝ nam tara lǝkwa atarna, dza ata ɓui mbatǝdzi, dzǝ ata mwara lǝkwa, dzǝ ata mwara lǝba, ka dzǝ ɓui sǝr sǝmɛ nam ɗa.

¹⁰ Ndǝr hǝlɛ ada si ɗiɗi ka hǝlɛ, kurnta, ba ka huzanta. Yi si akuya ka dar ɓui mpikɛ ka dar ɓui tǝni bǝrsu.

¹¹ “Yi ani ndǝr ɓǝla nam ɗaku. Ndǝr ɓǝla nam ɗaku ani ndǝ nam ada hamnta mpikari kadǝbar tǝma.

¹² Ndǝ nam dǝwal ɓǝla kura ndǝr ɓǝla nam thlakǝr tǝma ni, ma dzǝ wula kǝyar ntaku ada si dzǝ ata ngyar tǝmari ka whui atǝra. Antǝ kǝyar ntaku ni ata dlǝkǝr kǝi ka kikilnta tǝma yarɛ ni.

¹³ Dzǝ whui atǝra ni akuya dzǝ dǝwal ɓǝla ɗiɗi dzǝ adi ada damitsǝnidzi ka tǝma yarni wɛ.

¹⁴ “Yi dza ndǝr ɓǝla nam ɗaku, Yi zǝndi tǝmarna, tǝmarna tsuwɛ dar zǝndi tǝra,

¹⁵ apa tǝ Tada tara zǝndi tǝra, Yi tsuwɛ Yi zǝndi Tadari. Yi ada hamnta mpikawai akuya ka tǝma yarari.

¹⁶ Yi aka tǝma yar laka nam kura nǝr mǝtsǝɓǝ ǝni. Dar ma pakat, ka Yi si aka dar tsuwɛ, dar ata si thlǝmɛ ala kuɗahawai, ka dar ndzai bǝri duku, Ndǝr ɓǝla yɛ duku.

¹⁷ Bana yiɗǝ tǝra, kadǝbar Yi hamnta mpikawai ani ka Yi ɓǝla kǝtǝ tǝni kadamwa.

¹⁸ Ndǝr dlutsi akai adi wɛ, ama Yi dza hamnta tǝni aka yiɗǝrna. Yi aka wadar hamnta tǝni ba Yi aka wadar kǝtǝ tǝni tsuwɛ. Yi dlutsi tsau ǝni adzǝ Bana.”

¹⁹ Kadǝbar ka labar ni, ndǝghǝ nya ɓǝla lǝkwa ɓwanga ndzǝr Yahudi.

²⁰ Hang akwa ntsa dar ka nkǝrɛ, “Ai, dzǝ aka mambǝl nam kulɗa, dzǝ dlang! Kami tǝ gǝri awa sǝthlǝmɛ alari?”

²¹ Ama ndzǝ yar laka nkǝrɛ, “A'a wɛ, ndǝr ǝni, adi ndǝr ndɛ aka mambǝl kulɗa wɛ. Azarɛ, mambǝl nam kulɗa ada mǝzi mburnta ntsɛ ala ghyang ya?”

Ndzǝr Yahudi Ngǝla Mbǝrsa

²² Antǝ sakar Wudzǝr Hamnta Fǝr Hyal kǝ si akwa Ursalima. Sakar lang-lang,

²³ Yɛsu ada mwari ata hurkǝiyir Sulaimanu adzǝ fǝr Hyal.

²⁴ Ndzǝr Yahudi ka dlǝti tǝni, ka nkǝrɛ alari, “Har nam tǝ gǝ awa ngyar tǝ yar aka ɗǝnga kura yar ta zǝndi gǝ wa? Ma apǝri gǝ dza Kǝrsti ni ka gǝ nkǝrba ala yar ata babal.”

²⁵ Yɛsu ka sǝnau ala dar, “Ai, Yi ghaba ala gǝri, ama gǝri ta mbǝrsa akǝr wɛ. Sǝr ndati nam tǝ Yi ada 'ya akwa thlǝma Babarna, dar ani ada sakǝidatsǝni tǝra.

²⁶ Ama gǝri, gǝri ta mbǝrsa wɛ, kadǝbar gǝri adi akwa ntsa tǝmarna wɛ.

²⁷ Tǝmarna yarni, dar ada sǝthlǝmɛ ala kuɗahawai, Yi zǝndi tǝ dar, dar ada nu tǝra.

²⁸ Yi ada la dar mpikǝ nam kura kurkuri, dar adi ata saga sa wɛ; ndǝr mbuli tǝ dar akwa tsiyawai adi wɛ.

²⁹ Bana nam tara lai tǝ dar, dzǝ kwatsǝni sang aka nggakur; ndǝr mbuli tǝ dar akwa tsiya Tadari adi wɛ.

³⁰ Yi aka Bana yar duku.”

³¹ Antǝ ndzǝr Yahudi ka ɓǝla ɗǝmtsi paya ka dar ɗǝgal tǝni.

³² Yɛsu ka sǝnau ala dar, “Yi tsanti ala gǝri sǝr ndati yarɛ nam hang adzǝ Tada. Akuya madi akwa ntsa dar tǝ gǝri ata ɗǝgal tǝra kari ni?”

³³ Ndzǝr Yahudi yarni sǝnau ka nkǝrɛ, “Yar adi ada ɗal tǝngɛ akuya ka duku akwa ntsa sǝr ndati yarni wɛ, ama kadǝbar gǝ gha su kulɗa ata kǝra Hyal: gǝ ndɛ ama gǝ awa nkǝrɛ apǝri gǝ Hyal ni.”

³⁴ Yɛsu ka sǝnau ala dar, “Adai rǝbwa-rǝbwa akwa mabariyir gǝri tǝ Hyal gha ‘Gǝri hyal yarɛ.’ Kǝna wɛ?

³⁵ Ma dzǝ kǝga tǝ dar ‘hyal yarɛ,’ ndzǝ nam tǝ ndǝrǝr Hyal tara si ala dar—ba Labar Hyal adi ada palidzi wɛ—

³⁶ Apa yɛ, Tada tsarba ka hyanti tǝra alǝkwa dunya. Mǝmi dzá tǝ gǝri awa nkǝrɛ apǝri Yi ada gha su kulɗa ata kǝra Hyal kadǝbar tǝ Yi nkǝrɛ, ‘Yi Zǝr Hyal’?

³⁷ Ta gǝr ta mbǝrsa akai ma Yɛ adi ada 'ya sǝ nam tǝ Babarna ada 'ya wɛ.

³⁸ Ama ma Yi ada 'yati, wala ma gǝr ta mbǝrsa akai wɛ yɛ, ka gǝr mbǝrsa aka sǝr ndati yarɛ ani ka gǝri zǝndi, ka gǝri ngaba yɛ, Bana akwa yɛ, ba Yi akwa Bana tsuwɛ.”

³⁹ Antǝ dar ka ɓǝla 'ya dabariyir ngǝzǝ tǝni, ama dzǝ sǝba akwa tsiya dar.

⁴⁰ Yɛsu ka ɓǝla tǝra lǝba ata hǝiya kyaghar Urdun, akwa vui nam tǝ Yawhana tara baditsǝni 'ya bamtizǝma, dzǝ ka ndzai akwanda.

⁴¹ Ndzǝ hangkurari tara si adzǝni, dar ada nkǝrɛ, “Dzǝri Yawhana ta 'ya parsu nǝr ndatǝdzi laka wɛ, ama sanga sǝ nam tǝ dzǝ gha ata kǝra ndǝ ni dzǝri.”

⁴² Akwanda ani tǝ ndzǝ hang tara mbǝrsa akwa Yɛsu.