Wulsu 7 - Kibaku NT

Ndzǝ 144,000 nam aka Ntar Ndzǝr Hyal

¹ Aghǝla ǝni Yi wula ndzǝr hyantǝr Hyal fwaɗu ada hyati akwa kuɗǝmar dunya fwaɗu, dar ada kanti sambar kura awa padɛ ata dai wala ata manda wala ata fwɛ.

² Antǝ Yi wula ndǝr hyantǝr Hyal damwa ada si tǝbwar gǝdi, dzǝ ada kǝl sǝr vǝ lamba nǝr Hyal. Dzǝ kǝga aka kuɗahu ngga ndzǝr hyantǝr Hyal fwaɗu nam tǝ ndǝ la dar dǝna ka dar 'yanta dai ba manda:

³ “Ta gǝ ta 'yanta dai wala manda wala fwɛ yarɛ si ma mur vǝti nta ata mumurkǝma madar kǝiyir Hyalǝr muri.”

⁴ Antǝ Yi ngati hangkur ndzǝ nam tǝ ndzǝr hyantǝr Hyal vǝti ntarni: 144,000 akwa sanga dǝrǝr Izǝraila.

⁵ Akwa dǝrǝr Yahuda 12,000 ndǝ vǝti lamba, akwa dǝrǝr Rǝyubin 12,000, akwa dǝrǝr Gad 12,000,

⁶ akwa dǝrǝr Asar 12,000, akwa dǝrǝr Nafǝtali 12,000, akwa dǝrǝr Manasi 12,000,

⁷ akwa dǝrǝr Simiyaun 12,000, akwa dǝrǝr Lawi 12,000, akwa dǝrǝr Isaka 12,000,

⁸ akwa dǝrǝr Zibulun 12,000, akwa dǝrǝr Yusufu 12,000, akwa dǝrǝr Bandzami 12,000.

Hangkur Ndzi akwa Kari Mwapu

⁹ Aghǝla ǝni, akwanda Yi wula dlamiyir ndzǝ hang akǝmawai nam kura ndɛ awa tsǝba, akwa kǝlara dai, dǝr, ndzǝ ba nya, ada hyati akǝma dǝgǝl kuhyikur ba akǝma Zǝr Agam. Dar hadzǝ kari mwamwapu ba dar ngǝngǝzi thlaliyir dibuna akwa tsiya dar.

¹⁰ Ba dar lǝlɛ aka kuɗahǝ ngga: “Mbatǝdzi aka Hyalǝr muri, nam ada ndzai ata dǝgǝl kuhyikur, ba aka Zǝr Agam.”

¹¹ Sanga ndzǝr hyantǝr Hyal ada hihyati ata ngwama dǝgǝl kuhyikur ba ata ngwama ndzǝ ngga-ngga yarɛ ba sǝ yarɛ aka mpikǝ fwaɗu. Dar dla tǝ kǝma dar akǝma dǝgǝl kuhyikur ni ba dar ka vǝkǝr sǝlai ala Hyal,

¹² dar ada gha: “Apani! Hǝmɛ ba sǝlai ba bǝrkawakur ba gwaditsǝni ba nggakur ba kuhyikur ba dǝna kǝ ndzai ala Hyalǝr muri kura kurkuri. Apani!”

¹³ Antǝ pathlu akwa ntsa ndzǝ ngga-ngga yarni yu tǝra, “Ndzǝ yarni akwa kari mwamwapu ni—dar wa yarɛ, ba dar hyati akwa madi?”

¹⁴ Yi sǝnau, “Thlaku, gǝ zǝndi.” Ba dzǝ ka nkǝrɛ, “Ndzǝ yarni dar ani ndzǝ nam tara sǝba akwa bwanai nam dzau; dar kǝtsǝnta kariyir dar ka mǝrti tǝ dar mwapu akwa masǝr Zǝr Agam.

¹⁵ Kadǝbar ǝni, “Dar akǝma dǝgǝl kuhyikur Hyal ada 'ya alari kǝthlǝr tsǝtsi aka vǝri akwa fǝr Hyalǝrni; ba dzǝ nam ada ndzai ata dǝgǝl kuhyikur ata tǝrkǝr dǝri ata kǝra dar.

¹⁶ Dar tsu awa nga mi kǝra wɛ; dar tsu awa nga thlǝlai kǝra wɛ. Tsǝtsi tsu awa mba ata kǝra dar wɛ, wala ɓwaɓwakur tsǝtsi tsu awa tsǝkwar tǝ dar wɛ.

¹⁷ Akuya Zǝr Agam nam ata ɗǝfa dǝgǝl kuhyikur ata ndzai ndǝr ɓǝla tǝ dar; dzǝ ata pwar tǝ dar akwa vui whuyir yimi nam aka mpikɛ. Ba Hyal ata fanta kǝlara sǝmwai ata ntsa dar.”