Wulsu 6 - Kibaku NT

Pwasǝ Dǝmwar nǝr Har Nya Kakadu Pǝrpǝri ni

¹ Yɛ ada wulɛ sakatǝ Zǝr Agam ni mburnta nǝr tangkǝma dǝmwar yarɛ murfwɛ ni. Antǝ Yi ngati pathla sǝ aka mpikɛ fwaɗu ni nkǝrɛ akwa kuɗahu apa dlǝrǝr pǝral, “Azǝrɛ!”

² Yi wulɛ, ba akwanda akǝmawai taku mwapu! Ndǝr dlǝr tǝni ngǝzi lǝlai, ba ndǝ ka lari aliyapu, ba dzǝ dlǝrɛ alǝba apa katsalar mpa nam tara sǝmkǝr ba dzǝ ada bara sǝmkǝr kadamwa.

³ Sakatǝ Zǝr Agam pwasǝnta dǝmwar nǝr sǝɗǝkur, Yi ngati sǝ aka mpikɛ nǝr sǝɗǝkur gha, “Azǝrɛ!”

⁴ Antǝ taku damwa sǝba, magza apa u'u. Ndǝ la ndǝr dlǝr tǝni dǝna ka dzǝ kǝlba ndzaiyir lapiyakur akwa dunya ka dzǝ mǝrti sǝli ka dar tsa kǝma dar. Ndǝ lari katsakar nam ngga.

⁵ Sakatǝ Zǝr Agam pwasǝnta dǝmwar nǝr makǝrkur, Yi ngati sǝ aka mpikɛ nǝr makǝrkur nkǝrɛ, “Azǝrɛ!” Yi wulɛ, ba akwanda akǝmawai taku mǝngǝl! Ndǝr dlǝr tǝni ngǝzi alidzam akwa tsiyari.

⁶ Antǝ Yi ngati su apa kuɗahɛ akwa ntsa sǝ aka mpikɛ fwaɗu ni, ada nkǝrɛ, “Auna raiza duku nǝr lǝkama ani tǝ ndɛ ata nkyɛ kǝthlǝr ɓuktsi akǝri, ba auna raiza makǝr nǝr barli ani tǝ ndɛ ata nkyɛ kǝthlǝr ɓuktsi akǝri, ba ta ndǝ ta sǝwati mal ba yimǝr inabi!”

⁷ Sakatǝ Zǝr Agam pwasǝnta dǝmwar nǝr fwaɗukur, Yi ngati kuɗaha sǝ aka mpikɛ nǝr fwaɗukur nkǝrɛ, “Azǝrɛ!”

⁸ Yi wulɛ, akwanda akǝmawai taku mpursa-mpursa! Ndǝ vǝti thlǝma ndǝr dlǝr tǝni Nti, ba Vui Ndzaiyir Ndzǝ Ntǝnti ada nu dǝrbari kudzǝghǝkudzǝghɛ. Ndǝ la dar wada ata kǝra kuɗǝma fwaɗu nǝr dunya ka dar tsai tǝ katsakar, mi ba kǝriku, ba tǝ mawiyir ntaku nam akwa dunya.

⁹ Sakatǝ dzǝ pwasǝnta dǝmwar nǝr ntufukur, Yi wula adzǝ kugiva muɓwɛ ni sangura ndzǝ nam tǝ ndǝ tara thlǝthlakǝr wuya ata nyar ndǝrǝr Hyal ba sakǝida nam tǝ dar tara ngǝzi.

¹⁰ Dar kǝga aka kuɗahu ngga, “Nama, Thlaku nam aka dǝna ta sang, gǝ nam kartǝ ba gǝ ndǝr dzǝri, tǝ gǝ awa 'ya haka ala ndzǝ nam akwa dunya ba nkyinta sǝkurǝr masǝr yar?”

¹¹ Antǝ ndǝ la kǝlara akwa ntsa dar lǝkutu mwapu, ba ndǝ ka gha ala dar ka dar ɗar sǝkɛ, si ma hangkur madar mama kaka nkwaiyir mama dar—madar kǝiyir Yɛsu nam tǝ ndɛ ata tsai apa dar kurabadzi.

¹² Yi ada wulɛ sakatǝ dzǝ pwasǝnta dǝmwar nǝr nkwakur. Kǝngǝrǝr dai nam ngga 'ya. Tsǝtsi 'ya mǝngǝl pǝlǝk apa dzambai, sanga dzá hya 'ya magǝza apa masi,

¹³ ba tsambiya yarɛ nam atahyal pughǝldzi ata dai, apa tǝ kanda ada punta madar ma sambar padɛ aka dǝna.

¹⁴ Antǝ dzahyal santadzi atǝra apa butsi tara pǝrtǝdzi alǝti, ba kǝlara paya aka gar kǝlntadzi ata vuiyir dar.

¹⁵ Antǝ kuhyi yarɛ nǝr dunya, madar kuhyi yarɛ, katsalar mpa yarɛ, ndzǝ bǝrba, ndzǝr dǝna, ba kǝlara fali ba kǝlara kambɛ lǝka mbwɛ akwa dlang yarɛ ba akwa ntsa paya yarɛ.

¹⁶ Dar ada kǝga paya yarɛ, “Ɗǝkǝr ala yar ka gǝri ɗǝwar tǝ yar ta kǝma ndǝ ni nam ada ndzai ata dǝgǝl kuhyikur ba ta sǝwa ɗǝfǝr Zǝr Agam ni!

¹⁷ Akuya vǝrǝr sǝwa ɗǝfǝr dar nam ngga si, ba wa ani awa mǝzi ka hyati?”