Wulsu 5 - Kibaku NT

Kakadu Pǝrpǝri ba Zǝr Agam

¹ Antǝ Yi wula akwa tsisǝma dzǝ nam ada ndzai ata dǝgǝl kuhyikur kakadu pǝrpǝri aka rǝbwa ata palai gyapu ba ndǝ harti aka dǝmwar ata vui murfwɛ.

² Ba Yi wula ndǝr hyantǝr Hyal nam ngga ada nkǝrɛ aka kuɗahu nam ngga, “Wa nam awa mǝzi ka pwasǝnta dǝmwar yarni ka mburnta kakadu pǝrpǝri ni?”

³ Ama ndɛ adai atahyal wala ata dai wala akwi dai nam ata mǝzi mburnta kakadu pǝrpǝri ni wala wul kutari wɛ.

⁴ Yi tuwa ka tuwa kadǝbar ndɛ adai nam tǝ ndǝ ɓui awa mǝzi ka mburnta kakadu pǝrpǝri ni wala wul kutari wɛ.

⁵ Antǝ pathlu akwa ntsa ndzi ngga-ngga yarni nkǝrɛ alai, “Ta ga ta tuwa! Wulɛ, dzǝngai nǝr ndzǝliyir Yahuda, kakár Dauda, dzǝ sǝmkǝr. Dzǝ ata mǝzi mburnta kakadu pǝrpǝri ba pwasǝnta dǝmwar ata vui murfwɛ ni.”

⁶ Antǝ Yi wula Zǝr Agam, tǝ ndɛ ada wulɛ apa ndǝ thlakǝr wuya alari, ada hyati ata ɗǝfa dǝgǝl kuhyikur ni, tǝ sǝ aka mpikɛ yarni fwaɗu ba ndzǝ ngga-ngga yarni tara dlǝti tǝni. Dza aka tǝmbǝl yarɛ murfwɛ ba ntsɛ yarɛ murfwɛ, nam ani mambǝl yarɛ murfwɛ nǝr Hyal nam tǝ ndǝ hyanǝba alǝkwa sanga dai.

⁷ Dzǝ si ka dlutsi kakadu pǝrpǝri ni akwa tsisǝma ndǝ nam ada ndzai ata dǝgǝl kuhyikur ni.

⁸ Ba sakatǝ dzǝ ngǝzi kakadu pǝrpǝri ni, sǝ aka mpikǝ fwaɗu ba ndzǝ ngga-ngga sǝɗǝthlani kapu fwaɗu yarni dla akǝma Zǝr Agam ni. Kǝlara ndɛ aka zǝmbǝlɛ ba dar ngǝzi ntasar dǝnar yarɛ ghǝi-ghǝi aka sǝ sǝwur, nam ani aduwa yarɛ nǝr ndzǝr Hyal.

⁹ Ba dar ha ha nam bǝlin: “Gǝ mǝzi ka kǝtǝ kakadu pǝrpǝri ni ba ka pwasǝnta dǝmwar yarari, kadǝbar ndǝ thlakǝr wuya ala gɛ, ba aka masǝr ngɛ gǝ ɗǝlba ndzi ala Hyal akwa kǝlara dǝr ba nya ba ndzi ba mǝlmɛ.

¹⁰ Gǝ mǝrti tǝ dar ndzǝ tǝ Hyal dza kuhyir dar ba fǝrist yarɛ ka kǝthlǝr alari, ba dar ata 'ya kuhyikur ata dai.”

¹¹ Antǝ Yi wulɛ ba Yi ka ngati kuɗaha ndzǝr hyantǝr Hyal hang, hangkur dar kumthlani kumɛ ata kǝra kumthlani kumɛ yarɛ, ba kumthlani kumɛ ka kumɛ ka kumthlani kumɛ ka kumɛ. Dar dlǝti dǝgǝl kuhyikur ni ba sǝ aka mpikɛ yarni ba ndzǝ ngga-ngga yarni.

¹² Dar ha aka kuɗahǝ nam ngga: “Zǝr Agam ni dzǝ mǝzi, nam tǝ ndǝ thlakǝr wuya, ka dlutsi dǝna ba bǝrba ba bǝrkawakur ba dzaukur ba vǝkǝr sǝlai ba nggakur ba hǝmɛ!”

¹³ Antǝ Yɛ ngati kǝlara sǝ aka mpikɛ atahyal ba ata dai ba akwi dai ba ata manda, ba sanga sǝ nam akwa dar, ada ha: “Ala dzǝ nam ada ndzai ata dǝgǝl kuhyikur ba ala Zǝr Agam ka hǝmɛ ba vǝkǝr sǝlai ba nggakur ba dǝna, kura kurkuri!”

¹⁴ Sǝ yarɛ fwaɗu nam aka mpikɛ nkǝrɛ, “Apani,” Ba ndzǝ ngga-ngga yarɛ dlǝdla ka vǝkǝr sǝlai.