Wulsu 20 - Kibaku NT

Fá Kumthlani Kumɛ yarɛ

¹ Ba Yi ka wula ndǝr hyantǝr Hyal ada sǝgǝl atahyal, dzǝ aka tsǝkuramǝr Kau nam Dzǝgam, ba dzǝ ngǝzi tsalala nam ngga akwa tsiyari.

² Dzǝ ngǝti nggar pwapu kulɗa ni, pwapu nam awatsi, nam ani Satan, ba dzǝ ka mbwai tǝni nǝr fá kumthlani kumɛ.

³ Dzǝ ɗalu tǝni akwa Kau nam Dzǝgam, ba dzǝ ka harti ka hyirkǝr alari, ka kanti alari kura dzǝ tsu awa zǝlanta ndzi kǝra wɛ tar ma fá kumthlani kum ni kǝ kuri. Aghǝla ǝnda, kǝ ndzai ntsakǝr ndɛ ata sǝntá tǝni nǝr saka nkyiɗǝ laka.

⁴ Yi ka wula dǝgǝl kuhyikur yarɛ nam tǝ ndzǝ nam tǝ ndǝ la dar dǝnar haka ada ndzai ati. Ba Yi ka wula sangura ndzǝ nam tǝ ndǝ dǝlnta wuya dar yarɛ kadǝbar ndǝrǝr dar ata kǝra Yɛsu ba ndǝrǝr Hyal. Dar ta vǝkǝr sǝlai ala mawi kulɗa ni wɛ wala parni ba dar ta dlutsi ntarni ata mumurkǝma dar, wala tsiya dar wɛ. Dar ka hyati aka mpikɛ ba 'ya kuhyikur kaka Kǝrsti nǝr fá kumthlani kumɛ.

⁵ (Mambiya ndzǝ nam ntǝnti ta hyati aka mpikɛ wɛ tar ma fá kumthlani kumɛ ni kǝ kwatsǝni.) Əni ani hyati akwa ntǝnti nam tang.

⁶ Kutsari ba kartǝ aka ndzǝ nam tǝ dar akwa ntsa ndzǝr hyati akwa ntǝnti nam tangkǝma ni. Nti nam sǝɗǝkur adai aka dǝna ata kǝra dar wɛ, ama dar ata ndzai fǝrist yarɛ nǝr Hyal ba nǝr Kǝrsti ba dar ata 'ya kuhyikur atakǝmaduku aka dza fá kumthlani kumɛ.

'Yantadzǝr Satan

⁷ Sakatǝ fá kumthlani kum ni kǝ kwatsǝni, ndɛ ata sǝnta Satan akwa fǝrsǝnar ni

⁸ ba dzǝ ata lǝba ka zǝlanta dai yarɛ akwa kuɗǝma fwaɗu nǝr dunya—Gaug ba Magaug—ka tsaɓtsǝni tǝ dar akuya ka mpa. Aka hangkur dar apa wuyahu ata nya manda.

⁹ Dar mwari ka ɓǝlba dlaɓukur dai ba dar ka dlǝti vui ndzaiyir ndzǝr Hyal, mǝlmɛ nam tǝ dzǝ yiɗɛ. Ama u'u sǝgǝl atahyal ka mbanta tǝ dar.

¹⁰ Ba Satan, nam tara zǝlanta tǝ dar, ndǝ ɗalu tǝni akwa mandar u'u ada mba aka kagǝlar barudu, vui nam tǝ ndǝ tara ɗalu mawi kulɗa ni ba nabiyir hawiyir ni akwa. Dar ata ɗar bwanai vǝri aka tsǝtsi kura kurkuri.

Ndǝ 'Ya Haka ala Ndzǝ Ntǝnti

¹¹ Antǝ Yi ka wula dǝgǝl kuhyikur ngga mwapu aka ndǝ nam ada ndzai ati. Dai aka ati ada whui atǝra ta kǝmari, kadǝbar vui adai ala dar tǝ dar awa lǝkwa wɛ.

¹² Ba Yi ka wula ndzǝ ntǝnti, ndzǝ ngga-ngga kaka ndzǝ nkyǝnkyiɗu, ada hyati akǝma dǝgǝl kuhyikur ni, ba ndǝ mburnta kakadǝ yarɛ. Ba ndǝ mburnta kakadǝ damwa, nam ani kakadǝr mpikɛ. Ndǝ ka 'ya haka ala ndzǝ ntǝnti ni ata kǝra sǝ nam tǝ dar tara 'yati tǝ ndǝ rǝbwai akwa kakadǝ yarni.

¹³ Manda ni sǝba aka ndzǝ ntǝnti nam akwa dza, ba Nti ba Vui Ndzaiyir Ndzǝ Ntǝnti dar ma dar sǝba aka ndzǝ ntǝnti nam akwa dar, ba ndǝ 'ya haka ala kǝlara ndɛ ata kǝra sǝ nam tǝ dzǝ tara 'yati.

¹⁴ Antǝ ndǝ ka ɗalu Nti ba Vui Ndzaiyir Ndzǝ Ntǝnti alǝkwa mandar u'u. Mandar u'u ni ani nti nǝr sǝɗǝkur.

¹⁵ Ma kǝlara ndǝ nam kura thlǝmari ta ɓuidzi akwa kakadǝr mpikɛ ni, ndɛ ata ɗalu tǝni akwa mandar u'u.