Wulsu 15 - Kibaku NT

Ndzǝr Hyantǝr Hyal Murfwɛ aka Kǝriku yarɛ Murfwɛ

¹ Yi wula atahyal sǝr ndati damwa ngga: ndzǝr hyantǝr Hyal murfwɛ aka kǝriku yarɛ nǝr dǝnta murfwɛ—dar ani nǝr dǝnta, kadǝbar aka dar antǝ ɗǝfǝr Hyal si ata dǝnta.

² Ba Yi wula su apa mandar gǝlasu hǝrhǝri aka masi ba, ada hyati ata ngwama manda ni ndzǝ nam tara sǝmkǝr ata kǝra mawi kulɗa ni ba parni ba ata kǝra lambar thlǝmari. Dar ngǝzi zǝmbǝlɛ yarɛ nam tǝ Hyal tara la dar

³ ba dar ha har Musa zǝr kǝiyir Hyal ba har Zǝr Agam: “Sǝr ndati ngga-ngga ani kǝthlǝr ngɛ, Thlaku Hyal nam Ɓwaltasang. Kal-kal ba dzǝri ani whalǝr ngǝ yarɛ Kuhyir zaman yarɛ.

⁴ Wa ani kura awa hyivǝr tǝngɛ, Ya Thlaku, Ba si aka nggakur ala thlǝma gɛ? Akuya gǝ duku ani kartǝ. Sanga dai yarɛ ata si ka vǝkǝr sǝlai akǝma gɛ, akuya 'ya sǝr ngɛ nam kal-kal kǝ sǝba ata babal.”

⁵ Aghǝla ǝni Yi wula atahyal fǝr Hyal, dzǝ ani fǝr nguzi nǝr Sakǝida ni mburntadzi.

⁶ Ndzǝr hyantǝr Hyal murfwɛ sǝba akwa kuta fǝr Hyal ni aka kǝriku yarɛ murfwɛ. Dar hadzǝ kari kǝtsǝkǝtsi, lilǝng ada mbǝli ba dar mbwai kǝrathla dar aka sǝr mbwadzi nǝr dinar.

⁷ Antǝ pathlu akwa ntsa su aka mpikɛ fwaɗu yarni ka la ndzǝr hyantǝr Hyal yarɛ murfwɛ ni ntasa yarɛ nǝr dinar murfwɛ ghǝi-ghǝi aka sǝwa ɗǝfǝr Hyal, nam ada ndzai kura kurkuri.

⁸ Ba fǝr Hyal ni ghǝiyatǝdzi aka i'yar tara sǝba akwa nggakur Hyal ba akwa dǝnarni, ba ndɛ adi awa mǝzi lǝkwa fǝr Hyal ni wɛ tar ma kǝriku yarɛ murfwɛ nǝr ndzǝr hyantǝr Hyal murfwɛ ni 'ya ka kuri.