Wulsu 13 - Kibaku NT

Mawi kulɗa ni tara sǝba akwa Manda

¹ Antǝ Yi ka wula mawi kulɗa laka ada sǝba akwa manda. Dza aka tǝmbǝlɛ kumɛ ba kǝr yarɛ murfwɛ, aka aliyapu yarɛ kumɛ ata tǝmbǝlari yarɛ, ba ata kǝlara kǝr ndǝ rǝbwai thlǝmɛ nam ada ngǝngǝlɛ Hyal.

² Mawi kulɗa tǝ Yi wula ni pa aka wulla, ama aka thlǝlɛ apa thlǝla kufǝr ba nyari apa nya dzǝngai. Nggar pwapu kulɗa ni la dǝnarni ala mawi kulɗa ni ba dǝgǝl kuhyikur ni ba wadarni nam ngga.

³ Pathla kǝr yarɛ nǝr mawi ni aka mbǝlku kulɗa nam tǝ dzǝ angwa nti, ama mbǝlku ni ka kuri. Dunya sang ndatǝdzi ba ka nu mawi ni.

⁴ Dar vǝkǝr sǝlai ala nggar pwapu kulɗa ni kadǝbar dzǝ la wada ala mawi kulɗa ni, ba dar vǝkǝr sǝlai ala mawi kulɗa ni ba dar ka yuwɛ, “Wa ani apa mawi kulɗa ni? Wa awa mǝzi ka mpa aka dza?”

⁵ Ndǝ la whalɛ ala mawi kulɗa ni ka dzǝ ngǝngǝl Hyal aka dǝna ba ka dzǝ tsan wadarni nǝr hya fwaɗǝthlani kapu sǝɗɛ.

⁶ Dzǝ nkǝr su kulɗa-kulɗa hang tǝ dzǝ ada ngǝngǝl Hyal ba thlǝmari ba vui ndziyirni ba ndzǝ nam ada ndzai atahyal.

⁷ Ndǝ lar dǝnar dlǝ mpa ata kǝra ndzǝr Hyal ba ka dzǝ sǝmkǝr ata kǝra dar. Ba ndǝ lar wada ata kǝra kǝlara dǝr, ndzi, nya ba dai.

⁸ Sanga ndzǝ nam ata dai ata vǝkǝr sǝlai ala mawi nam kulɗa ni—dar ani ndzǝ nam kura thlǝma dar rǝbwa-rǝbwa akwa kakadǝr mpikɛ ata baditsǝniyir dunya. Kakadu ni nǝr Zǝr Agam nam tǝ ndǝ tara thlakǝr wuya alari.

⁹ Ndǝ nam aka thlǝmǝr ngati, ngyar ka dzǝ ngati.

¹⁰ Kǝlara ndǝ nam tǝ ndǝ vǝkǝr alari apǝri dzǝ ata 'ya fali, ani ndɛ ata ngǝti tǝni fali. Kǝlara ndɛ tǝ ndǝ vǝkǝr alari apǝri ndɛ ata tsi tǝni tǝ katsakar, tǝ katsakar tǝ ndɛ ata tsi tǝni. Əni ada gha ka ndǝ ɓatǝsu ba hamnta dzǝri nǝr ndzǝr Hyal ni.

Mawi Kulɗa ni nam Tara Sǝba akwa Dai ni

¹¹ Antǝ Yi wula mawi nam kulɗa damwa ada sǝba akwa dai. Dza aka tǝmbǝl sǝɗɛ apa Zǝr Agam, ama dzǝ ada ndǝrɛ apa nggar pwapu kulɗa.

¹² Dza ada 'ya kǝthlǝr aka sanga wadar mawi kulɗa nam tangkǝma ni ata vuiyari, ba dzǝ mǝrti dunya ba ndzǝ nam akwa ka vǝkǝr sǝlai ala mawi kulɗa nam tangkǝma ni, nam tǝ mbǝlkari nam kulɗa ni ka kuri.

¹³ Ba dzǝ ka 'yati parsu nǝr ndatǝdzi yarɛ ngga-ngga, har nam tǝ dzǝ ada mǝrti tǝ u'u ada hyati atahyal ka sǝgǝl ata dai tǝ ndzi ada wulɛ.

¹⁴ Kadǝbar ka sǝr ndati yarɛ nam tǝ ndǝ lar dǝna tǝ dzǝ ada 'yati ata vuiya mawi kulɗa nam tangkǝma ni, dzǝ zǝlanta ndzǝ nam ada ndzai ata dai. Dzǝ hau tǝ dar ka mǝrti su tara par mawi kulɗa nam tangkǝma ni ka vǝkǝr sǝlai ala mawi kulɗa nam tara ɓui mbǝlkǝr katsakar ba tsu dzǝ aka mpikɛ.

¹⁵ Ndǝ lar dǝna ka dzǝ la mpikɛ ala su tara par mawi kulɗa nam tangkǝma ni, ani ka dzǝ mǝzi ka ndǝrɛ ba mǝrti sanga ndzǝ nam tara ngǝla vǝkǝr sǝlai ala parsu ni ka ndǝ tsi tǝ dar.

¹⁶ Tsuwɛ dzǝ ntsakǝr ala kǝlara ndɛ, ndzǝ kura dǝna ba ndzǝ aka dǝna, bǝrba ba ngudi, kambɛ ba fali, ka dar dluwɛ nta ata tsisǝma dar wala ata mumurkǝma dar,

¹⁷ ani ka ta ndǝ ta mǝzi ka ɗǝlba wala ɗǝlti su tar ma dzǝ aka nta, nam ani thlǝma mawi kulɗa ni wala lambar thlǝmari.

¹⁸ Əni ada bara bǝrkawakur. Ma kǝlara ndɛ nam aka ngaba su, ngyar ka dzǝ kwamtsǝni lambar mawi kulɗa ni, akuya lamba ni nǝr ndɛ. Lambar ni ani 666.