Wulsu 10 - Kibaku NT

Ndǝr Hyantǝr Hyal aka Kakadu Pǝrpǝri nam Nkyiɗu

¹ Antǝ Yi wula ndǝr hyantǝr Hyal nam aka dǝna ada sǝgǝl atahyal. Ndǝ karaptsǝni tǝni aka dlamba, aka zamba ati ata kǝrari; kǝmari apa tsǝtsi, ba thlǝlari yarɛ apa mǝtǝngar u'u yarɛ.

² Dzǝ ngǝzi zǝr kakadu pǝrpǝri, nam mburmburi akwa tsiyari. Dzǝ ntsu thlǝlǝr tsisǝmari akwa manda ba thlǝlǝr tsi aghyari ata dai,

³ ba dzǝ ka lǝlɛ ngga-ngga apa tuwar dzǝngai. Sakatǝ dzǝ lǝlɛ, kuɗaha dlǝri yarɛ murfwɛ ndǝrɛ.

⁴ Ba sakatǝ dlǝri yarɛ murfwɛ ndǝrɛ, Yɛ angwada rǝbwa; ama Yi ngati kuɗahu atahyal ada nkǝrɛ, “Ɗǝwar sǝ nam tǝ dlǝri yarɛ murfwɛ tara gha ni ba ta gǝ ta rǝbwa tǝni.”

⁵ Antǝ ndǝr hyantǝr Hyal nam tǝ Yi tara wula ada hyati ata manda ba ata dai, dzǝ haɓǝti tsisǝmari alǝtahyal.

⁶ Ba dzǝ ka mbǝrɛ aka thlǝma ndǝ nam ada ndzai kura kurkuri, ndǝ nam tara mǝrti ati yarɛ ba sanga sǝ nam akwa dar, dai ba sanga sǝ nam akwa dza, ba manda aka sanga sǝ nam akwa dza, ba ndǝr hyantǝr Hyal ni nkǝrɛ, “Sakar sǝkǝ ndɛ tsu adi wɛ!

⁷ Ama akwa vǝr yarɛ nam tǝ ndǝr hyantǝr Hyal nǝr murfwǝkur angwa mbǝr tǝmbǝlǝrni ni, dzǝri ɗǝwa-ɗǝwa nǝr Hyal ata ghǝiyabadzi, tsu apa tǝ dzǝ tara nkǝrba ala madar kǝiyirni nabi yarɛ.”

⁸ Antǝ kuɗahu nam tǝ Yi tara ngati atahyal nda ndǝrɛ alai kadamwa: “Mwari, ka gǝ dlutsi zǝr kakadu pǝrpǝri nam mburmburi akwa tsiya ndǝr hyantǝr Hyal nam ada hyati ata manda ba ata dai ni.”

⁹ Ani Yi mwari adzǝ ndǝr hyantǝr Hyal ni ba Yi ka yu tǝni ka dzǝ lai zǝr kakadu pǝrpǝri ni. Dzǝ ka nkǝrɛ alai, “Kǝtǝ ka gǝ ɗǝnya tǝni. Dza ata mǝrti kuta gɛ mwamwasu, ama akwa nya gɛ dzǝ ata 'ya nǝnǝm apa mǝmɛ.”

¹⁰ Yi dlutsi zǝr kakadu pǝrpǝri ni akwa tsiya ndǝr hyantǝr Hyal ba Yi ka ɗǝnya tǝni. Dzǝ nǝnǝm apa mǝmɛ akwa nyawai ama sakatǝ Yi tara ɗǝnya tǝni dzǝ mǝrti kutawai mwamwasu.

¹¹ Antǝ ndǝ gha alai, “Kǝ ndzai ntsakǝr gɛ ata 'ya nabikur kadamwa ata kǝra ndzǝ hang, dai yarɛ, nya yarɛ ba kuhyi yarɛ.”