Taitus 3 - Kibaku NT

'Ya Sǝ nam Ɗaku

¹ Ka gǝri ɗǝngati ala ndzi ka dar hamnta kǝr dar ala ndzǝ nam akwa ndzǝr kuhyi ba ndzǝr wada yarɛ, ka dar kǝlǝngkǝr, ka dar ɗǝmhǝdzi ka 'ya kǝlara sǝ nam ɗaku.

² Ta dar ta gha su kulɗa ata kǝra ndɛ, ta dar ta ndzai ndzǝr kampiku ba ka dar tsan hankalkur, ba ka dar wul sǝ nam tǝ kǝma dar ada bara ɓwalta nǝdar, ba ka dar tsan tǝrghǝlkǝr nam dzǝri tǝbwar sanga ndzi.

³ Kadǝbar yar ma watsi yar ta zǝndi sǝ wɛ yar ndzai kura ngandǝrɛ, ndǝ zǝlanta tǝ yar, ba ndǝ mǝrti tǝ yar fali atar sanga dzǝli mau sǝ kulɗa yarɛ ba sǝr nga sǝɗa yarɛ. Yar ndzai akwa imaikur ba sǝlku, ndǝ ngǝla tǝ yar ba yar ada ngǝla ndzi damwa.

⁴ Ama, sakatǝ Hyal Ndǝr Mbati tǝ muri tsanti hankalkur ba yiɗǝdzǝrni,

⁵ dzǝ mbati tǝ muri, adi kadǝbar ka sǝ nam kal-kal tǝ muri 'yati wɛ, ama kadǝbar ka kǝtǝrdzǝrni. Dzǝ mbati tǝ muri atar kǝtsǝr yabadzi kadamwa ba dzǝ ɓakta mǝrti tǝ muri bǝlin atar Mambǝl Kartǝ,

⁶ nam tara pukǝrdzi ala muri bǝrsu atar Yɛsu Kǝrsti Ndǝr Mbati tǝ muri.

⁷ Kadǝbar ka ǝni Hyal mǝrti tǝ muri kal-kal atar ɗakurni, ka muri ndzai ndzǝr sǝm warta yarɛ nam tǝ muri aka tǝmatsǝniyir mpikǝ nam kura kurkuri.

⁸ Əni ani ndǝrɛ nam tǝ ndɛ ata mbǝrsa akǝri. Ba Yi ada bara ka gǝri gha sǝ yarɛ ni aka dǝna, ani ka ndzǝ nam aka mbǝrsa akwa Hyal ka dar 'ya hankal ka dar hau kǝr dar akwa 'ya sǝ nam ɗaku. Sǝ yarni tsuwɛ dar sǝ nam ɗawurwur, ba sǝr ɗǝru akuya ka kǝlara ndɛ.

⁹ Ama ka gǝ 'ya pǝɗǝm ta lǝkǝdzǝr dlangkur ba tsǝ thlǝma kaká yarɛ ba kampiku aka ɓwalnya yarɛ ata kǝra mabari, kadǝbar sǝ ǝni yarni adi aka ɗǝru wala paida wɛ.

¹⁰ Ɗǝmnya ala ndǝ nam ada si aka ndǝghǝ nya tangkǝma, ba ɗǝmnya alari nǝr sǝɗǝkur. Aghǝla ǝni ta gǝ tsu awa 'ya su vwam aka dza.

¹¹ Gǝ kurtaka zǝndi dzǝli ndǝ ni dzǝ dlǝrpu ba ndǝr 'ya biku; dzǝ kurtaka hakatsǝni kǝrni.

Gala yarɛ nǝr Dǝnta

¹² Saka nam tǝ Yi hyanti Artimas wala Takikus ala gɛ, ka gǝ hau dǝna ka gǝ si adzǝra akwa Nikaupaulis, kadǝbar Yi kǝ ɗǝmhǝi ka Yi kurai sakar lang-lang akwanda.

¹³ Ka gǝ 'ya kǝlara sǝ nam tǝ gǝ mǝzi ka gǝ mbana Zinas lauya ni ba Apaulaus ata whalǝr dar ba ka gǝ wula apǝri dar aka kǝlara sǝ nam tǝ dar ada bara.

¹⁴ Kǝ ndzai ntsakǝr ka ndzǝr muri hau kǝr dar akwa 'ya sǝ nam ɗaku, ani ka dar ɓui sǝ nam tǝ dar ada bara tatang ba ta dar ta ndzai ndzǝ nam kura paida.

¹⁵ Sanga ndzǝ nam vwam kaka yɛ dar ada thlawar tǝngɛ. Ka gǝ thlawar ndzǝ nam tara yiɗǝ tǝ muri akwa hamnta dzǝri. Ka ɗakur Hyal ndzai adzǝ gǝri sang.