Ndzǝr Rauma 8 - Kibaku NT

Mpikɛ Atar Mambǝl ni

¹ Kadǝbar ǝni, kulini thla haka adi wɛ ata kǝra ndzǝ nam akwa Kǝrsti Yɛsu,

² kadǝbar atar Kǝrsti Yɛsu mabariyir mambǝl nǝr mpikǝ ni kǝ mpǝlba tǝra akwi mabariyir biku ba nti.

³ Akuya sǝ nam kura mabari awa 'yati pǝrta kadǝbar kura dǝnakur kum aka masi, Hyal 'yati atar hyanti Zǝrǝrni akwa dludzǝr ndǝr biku ka dzǝ ndzai sǝr hamnta ata nyar biku. Ba ani dzǝ ka tsi biku akwa ndǝr biku,

⁴ ani ka sǝ nam kal-kal tǝ mabari ada bara ni ka dzǝ 'yatǝdzi tsǝtsǝp akwa muri, nam kura ada ndzai apa tǝ dzǝr biku ada bara ama apa tǝ Mambǝl ni ada bara.

⁵ Ndzǝ nam ada ndzai apa tǝ dzǝr biku ada bara hankala dar vǝti dzi ata sǝ nam tǝ dzá dar nǝr biku ada bara; ama ndzǝ nam ada ndzai apa tǝ Mambǝl ada bara hankala dar vǝti dzi ata sǝ nam tǝ Mambǝlɛ ada bara.

⁶ Hankala ndǝr bikǝrni ani nti, ama hankal nam akwa tsiya Mambǝlɛ ani mpikɛ ba ndzi lapiyakur;

⁷ Hankalǝr biku ni kǝmangar ala Hyal. Dzǝ adi ada kǝlǝngkǝr ala mabariyir Hyal wɛ, wala tǝ dzǝ awa mǝzi ka mǝrti wɛ.

⁸ Ndzǝ nam akwa tsiya dzǝr biku dar adi awa mǝzi ka panyi ɗǝfa Hyal wɛ.

⁹ Ama, gǝri, adi akwa tsiya dzǝr biku wɛ ama gǝri akwa tsiya Mambǝlɛ, ma Mambǝlǝr Hyal ni ada ndzai akwa gǝri. Ba ma kǝlara ndɛ kura aka Mambǝlǝr Kǝrsti ni, dzǝ adi nǝr Kǝrsti wɛ.

¹⁰ Ama ma Kǝrsti akwa gɛ, dza gǝ ntǝnti kadǝbar biku, wala ahani mambǝlǝr ngɛ ata mulɛ kadǝbar Hyal mǝrti tǝngɛ kal-kal.

¹¹ Ba ma Mambǝlǝr ndǝ nam tara hyanti Yɛsu akwa ntǝnti ni ada ndzai akwa gǝri, dzǝ nam tara hyanti Kǝrsti akwa ntǝnti ni dzǝ ata la mpikɛ ala dza gǝr yarɛ nam ata nti ni atar Mambǝlǝrni, nam ada ndzai akwa gǝri ni.

¹² Kadǝbar ǝni, madar mama yarɛ, muri aka su tǝ muri ata 'ya kǝ ndzai ntsakǝr—ama adi ala dzǝr biku ni wɛ, tǝ muri awa ndzai apa tǝ dzǝ ada bara.

¹³ Akuya ma gǝri ndzai apa tǝ dzǝr biku ni ada bara, gǝri ata nti; ama ma gǝri ndzai atar Mambǝlɛ gǝri tsai sǝr 'ya kulɗa-kulɗa nǝr dzǝ ni, gǝri adi ata nti wɛ,

¹⁴ kadǝbar ndzǝ nam tǝ Mambǝlǝr Hyal ani ada pwar tǝ dar ani dar madar Hyal.

¹⁵ Akuya gǝr ta dlu mambǝl nam ata mǝrti tǝ gǝri fali kadamwa ala hyivǝr wɛ, ama gǝri dlutsi Mambǝlɛ nǝr zǝrkur. Ba atarni muri ada tuwa, “Abba, Bana.”

¹⁶ Mambǝlǝrni tǝ kǝrni ada nkǝrɛ aka mambǝlǝr muri apǝri muri madar Hyal.

¹⁷ Kulini ma apǝri muri madarni, antǝ mur ndzǝr sǝm warta—ndzǝr sǝm wartar Hyal ba ndzǝr sǝm warta atakǝmaduku kaka Kǝrsti, ma apǝri dzǝri muri ada ndǝghǝ bwaniyirni, akuya ka mur ndǝghǝi nggakurni yɛ.

Nggakur Nam ata Si

¹⁸ Yi ada ɗǝnga apǝri sa bwaniyir muri nam kulini ta mǝzi tǝ ndɛ awa ngǝla aka nggakur nam tǝ Hyal ata tsanti akwa muri wɛ.

¹⁹ Dunya sang ada mauwɛ ka sǝkǝ sǝ nam tǝ dar tǝmatsǝni akuya ka madar Hyal nam tǝ Hyal ata tsanti wa yarɛ dza madarni.

²⁰ Akuya Hyal mǝrti dunya kura ada 'yati su akwa whal nam aka paida, adi ahani tǝ dunya bara wɛ, ama atar sǝ nam tǝ Hyal ada bara, kadǝbar dzǝ ada bara ka dar lǝkǝma aka ndzai akwa tǝmatsǝni

²¹ apǝri Hyal ata mpǝli sǝ yarɛ nam tǝ dzǝ tara mǝrti kura dar awa yiɗantadzi, ba dzǝ ata la dar ɓui kǝr ka dar ndzai apa madar Hyal.

²² Mur zǝndi apǝri sanga dunya 'ya ngyɛ apa akwa kalǝr ya zǝr har ka la saka nam kulini.

²³ Adi ɗiɗi ahani wɛ, ama muri tǝ kǝr muri, nam aka munya yarɛ nǝr tangkǝma nǝr Mambǝl ni, mur ngyɛ aivi akwa ɗǝfu sakatǝ muri ada sǝkɛ aka mauwɛ akuya ka tǝ Hyal ata kǝtǝ tǝ muri apa madarni, ani pǝlidzi nǝr dza muri ni.

²⁴ Akuya akwa tǝmatsǝni ǝni Hyal mbatǝ tǝ muri. Ama tǝmatsǝni nam tǝ ndɛ ada wula adi tǝmatsǝni wɛ wala nkyiɗǝ laka. Wa ani ada 'ya tǝmatsǝni akuya ka sǝ nam tǝ dzǝ kurtaka ɓui?

²⁵ Ama ma muri aka tǝmatsǝni akuya ka sǝ nam kura muri ta ɓui kwataku, muri ata sǝkǝ tǝni aka kǝmar.

²⁶ Tsu akwa whal ǝni, Mambǝl ni ada mbana tǝ muri akwa kura dǝnakur muri. Muri ta zǝndi sǝ nam tǝ muri awa 'ya aduwa kari wɛ, ama Mambǝl ni tǝ kǝrni ada ndǝrɛ ata nyar muri aka ngyɛ yarɛ nam kura labar awa nkǝrba.

²⁷ Ba dzǝ nam ada wula ɗǝfa muri yarɛ dzǝ zǝndi sǝ nam akwa hankala Mambǝl ni, akuya Mambǝl ni ada ndǝrɛ ata nyar ndzǝr Hyal akwa whal nam tǝ Hyal ada bara.

Mur Ɓwalta tǝ Ndɛ awa Sǝmkǝr ata Kǝra Muri

²⁸ Ba mur zǝndi apǝri akwa sanga su Hyal ada 'ya kǝthlǝr akuya ka ɗakur ndzǝ nam tara yiɗǝ tǝni, ndzǝ nam tǝ Hyal kǝga akwa whalǝrni.

²⁹ Akuya ndzǝ nam tǝ Hyal tsarba kǝmata tǝ dar awa 'ya adai dzǝ ɗǝmhǝ tǝ dar ka dar ndzai akwa dludzǝr Zǝrǝrni kǝmata tǝ dar awa 'ya adai, apǝri Zǝrǝrni ni ka dzǝ ndzai yarkǝma akwa ntsa madar mama yarɛ hang.

³⁰ Ba ndzǝ nam tǝ dzǝ ɗǝmhǝ kǝmata tǝ dar awa 'ya adai ni, dzǝ kǝga tǝ dar yɛ; ndzǝ nam tǝ dzǝ kǝga, dzǝ mǝrti tǝ dar kal-kal yɛ; ndzǝ nam tǝ dzǝ mǝrti tǝ dar kal-kal dzǝ la dar nggakur yɛ.

³¹ Sǝr mi, dza, tǝ muri awa nkǝrɛ ata nyar sǝni? Ma Hyal adzǝ muri, wa awa mǝzi ka ndzai dawar muri?

³² Dzǝ nam kura ta ɗǝwa Zǝrǝrni, ama dzǝ hamnta tǝni akuya mur sang! Dzǝ la muri Zǝrǝrni—mǝmi kura dzǝ awa la muri sanga sǝ yarɛ ɓǝrtu?

³³ Wa ani awa si aka kǝlara bǝrkwɛ ata kǝra ndzǝ nam tǝ Hyal tara tsarba? Hyal dza ani ada mǝrti ndǝ kal-kal.

³⁴ Wa ani ada thlakǝr haka ala ndɛ? Kǝrsti Yɛsu, nam tara nti—ɓwalta ǝnda, dzǝ nam tara hyati aka mpikɛ—dzǝ ata bwa tsisǝma Hyal ba dzǝ ada 'ya kǝgyɛ aka Hyal ata nyar muri yɛ.

³⁵ Wa ani awa ndǝghǝba tǝ muri aka yiɗǝdzǝr Kǝrsti? Bwanai ya kǝna kǝriku kǝna ma ndɛ ada 'ya ala muri sǝ kulɗa kǝna mi kǝna anghyaɗukur kǝna asar kǝna katsakar?

³⁶ Apa rǝbwa-rǝbwa: “Ata nyar gǝri yar lǝkwa nti har kurǝr vǝri; ndǝ kǝtǝ tǝ yar apa tǝma tǝ ndɛ ata lǝka thlakǝr wuya.”

³⁷ A'a, akwa sanga sǝ ǝni yarni muri ɓwalta tǝ ndɛ awa sǝmkǝr ata kǝra muri atar dzǝ nam tara yiɗǝ tǝ muri.

³⁸ Akuya Yi mbǝrsa apǝri wala nti wala mpikɛ, wala ndzǝr hyantǝr Hyal wala mambǝl nam kulɗa yarɛ, wala ndzai kulini ni wala ndzai nam ata si, wala kǝlara dǝna yarɛ,

³⁹ wala dzǝgamkur alǝti wala dzǝgamkur alǝghǝl, wala kǝlara su damwa akwa sanga dunya, ata mǝzi ka ndǝghǝba tǝ muri aka yiɗǝdzǝr Hyal nam akwa Kǝrsti Yɛsu Thlakǝr muri wɛ.