Ndzǝr Rauma 4 - Kibaku NT

Ibrahim Ɓui Ndzai Kalkalkur atar Hamnta Dzǝrǝrni

¹ Sǝr mi dza tǝ muri awa nkǝrɛ tǝ Ibrahim, kakár muri, tara wula akwa sǝ ǝni?

² Ma apǝri, dzǝri, Hyal nkǝrɛ apǝri Ibrahim kal-kal kadǝbar ka sǝ nam tǝ dzǝ 'yati, dza aka su tǝ dzǝ ata agula ata kǝri—ama adi akǝma Hyal wɛ.

³ Sǝr mi tǝ Labar Hyal nkǝrɛ? “Ibrahim mbǝrsa aka Hyal, ba Hyal ka rǝbwai ata nya alari apǝri kalkalkur.”

⁴ Kulini sakatǝ ndzǝ 'ya kǝthlǝr yarɛ, wadzǝɓar dar yarɛ ndɛ adi ada la dar apa sǝ apanda wɛ, ama apa sǝ nam tǝ dar dza ɓui tǝ kǝr dar.

⁵ Ama dza, ala ndɛ nam kura ta 'ya kǝthlǝr ama dzǝ vu mbǝrsarni akwa Hyal nam ada mǝrti ndzǝ kǝmangar ka ndzai kal-kal, hamnta dzǝrǝrni nda Hyal ada rǝbwai alari apa kalkalkur.

⁶ Dauda nkǝrɛ su tsu apani sakatǝ tǝ dzǝ ndǝrɛ ata kǝra kutsari nǝr ndǝ nam tǝ Hyal rǝbwai alari kalkalkur kura ka sǝ nam tǝ dzǝ tara 'yati:

⁷ “Kutsari aka ndzǝ nam tǝ Hyal kyifǝnta bikǝr dar, ba ndzǝ nam tǝ Hyal mbui bikǝr dar.

⁸ Kutsari aka ndǝ nam tǝ bikǝrni Thlaku ni adi ata saga tsɛ ata kǝrari wɛ.”

⁹ Kutsari ǝni ɗiɗi ala ndzǝ nam tara thlakatsa ya, kǝna ala ndzǝ nam kura ta thlakatsa yɛ? Yar ada nkǝrɛ apǝri hamnta dzǝrǝr Ibrahim mǝrti tǝ Hyal rǝbwai ata nya alari apǝri kalkalkur.

¹⁰ Sǝr mi tara 'ya tǝ Hyal rǝbwai alari ahani? Ká aghǝla tǝ dzǝ thlakatsa, kǝna kǝmata tǝ dzǝ awa thlanta? Adi aghǝla tǝ dzǝ thlakatsa wɛ, ama kǝmatari!

¹¹ Ba dzǝ dlutsi thlakatsa, sǝ nam ada tsanti ndzai kalkalkur nam tǝ dzǝ ɓui atar hamnta dzǝri sakatǝ dzǝ zumbulǝm. Ani dza, dzǝ dza ani atǝgǝra sanga ndzǝ nam tara mbǝrsa ama dar ta thlakatsa wɛ, akuya ka Hyal rǝbwai ala dar ndzi kalkalkur.

¹² Ba dzǝ tsu ani atǝgǝra ndzǝ nam tara thlakatsa ndzǝ nam adi ɗiɗi dar thlakatsa wɛ ama dar ada mwari yɛ akwa kǝrtu thlǝla hamnta dzǝri nam tǝ tada muri Ibrahim akǝri kǝmata tǝ dzǝ awa thlakatsa.

¹³ Akuya adi atar mabari tǝ Ibrahim ba kulfǝrni dlutsi alkawal apǝri dzǝ ata ndzai ndǝr sǝm wartar dunya wɛ, ama atar kalkalkur nam tara si atar hamnta dzǝri.

¹⁴ Akuya ma ndzǝ nam ada ndzai tǝ mabari dar ndzǝr sǝm warta yarɛ, hamnta dzǝri adi aka paida wɛ ba alkawal ni yɛ ɓǝrtu,

¹⁵ kadǝbar mabari ada si aka sǝwa ɗǝfu. Ba vui nam kura mabari akwa sǝwati su adi wɛ.

¹⁶ Kadǝbar ǝni, alkawal ni si atar hamnta dzǝri. Əni Hyal hamnta apanda, ba ka dzǝ ndzai alkawalǝr apǝri ata 'ya ala sanga kulfǝr Ibrahim—adi ɗiɗi ndzǝ nam nǝr mabari wɛ ama ala ndzǝ nam nǝr hamnta dzǝri nǝr Ibrahim ni yɛ. Dzǝ dza tada muri sang.

¹⁷ Apa rǝbwa-rǝbwa: “Yi mǝrti tǝngɛ atǝgǝra di yarɛ hang.” Dzǝ dza ani tada muri akǝma Hyal, dzǝ mbǝrsa akwa dza—Hyal ni nam ada la mpikɛ ala ndǝ ntǝnti ba dzǝ ada mǝrti sǝ yarɛ bǝlin kura aka mima.

¹⁸ Hyal 'ya alkawalǝr munya hang ala Ibrahim apǝri, “Ani apani tǝ kulfǝr ngɛ ata ndzai.” Ba saka nam tǝ ndɛ ada wulɛ apǝri tǝmatsǝni tsu adi wɛ, Ibrahim tsu aka mbǝrsa akwa Hyal ba dzǝ ka ndzai atǝgǝra mǝlmǝ yarɛ hang.

¹⁹ Kura aka lang-lang akwa hamnta dzǝrǝrni, dzǝ wul dzǝrkur nam adai apǝri dzari kal-kal apa ndǝ ntǝnti—tǝng tǝ dzǝ karamtsǝni fá kumthlani—ba Saratu yɛ atsǝr.

²⁰ Ama dzǝ ta ndzai aka dzamɛ su wala nkyiɗǝ laka wɛ atar pǝrakur mbǝrsa tǝbwar alkawalǝr Hyal, ama hamnta dzǝrǝrni lǝkǝma aka ndzai ɓaɓal ba dzǝ la nggakur ala Hyal,

²¹ dzǝ mbǝrsa sang-sang apǝri Hyal aka dǝnar 'yati sǝ nam tǝ dzǝ 'ya alkawalari.

²² Əni ani sǝ tara 'ya, “tǝ Hyal rǝbwai ata nya alari apǝri kalkalkur.”

²³ Ndǝrɛ yarni “Hyal rǝbwai alari” dar adi alari dzǝ duku wɛ,

²⁴ ama ala mur yɛ, muri nam tǝ Hyal ata rǝbwai ala muri kalkalkur—ala muri nam tara mbǝrsa akwa dza dzǝ nam tara hyanti Yɛsu Thlakǝr muri akwa ntǝnti ni.

²⁵ Hyal hamnta tǝni ka nti akuya bikǝr muri ba Hyal hyanti tǝni aka mpikɛ ka dzǝ mǝrti tǝ muri kal-kal akǝma Hyal.