Ndzǝr Rauma 3 - Kibaku NT

Dzǝrkurǝr Hyal

¹ Paidar mi ani akwa ndzai ndǝr Yahudi, kǝna paidar mi akwa thlakatsa?

² Hang akwa kǝlara whalɛ! Tangkǝma, ndǝ hau akwa tsiya dar ndǝrǝr Hyal ni.

³ Sǝr mi ma nakuma dar adi aka hamnta dzǝri wɛ? Pǝrakur hamnta dzǝrǝr dar ni ata mǝrti dzǝrkur Hyal ka dzǝ ndzai ɓǝrtu ya?

⁴ Adi ata 'ya wɛ! Ngyar ka Hyal ndzai dzǝri, ba kǝlara ndɛ ndzai ndǝr hawi. Apa rǝbwa-rǝbwa: “Ani ka ndǝ tsanti apǝri gǝri aka dzǝri sakatǝ gǝri ndǝrɛ ba ndzai aka dǝna sakatǝ gǝri 'ya haka.”

⁵ Ama ma kura kalkalkur muri sǝba aka kalkalkur Hyal hang ata babal, mǝ tǝ muri awa nkǝrɛ? Apǝri Hyal ta 'ya su kal-kal wɛ tǝ dzǝ si aka ɗǝfǝrni ata kǝra muri? (Yi ada 'ya ɓwalnya dzǝli nǝr kum aka masi.)

⁶ Adi ahani wɛ! Ma sǝ yarɛ ǝnda ahani, mǝmi tǝ Hyal awa 'ya haka ala dunya?

⁷ Ndǝ laka ata ɓwalnya, “Ma hawiyirna ada dzakti dzǝrkur Hyal ba ani ada dzakti nggakurni, kami tǝ ndǝ tsu ada tsi kǝrawai apǝri Yi ndǝr biku?”

⁸ Kami kura ndɛ awa nkǝrɛ—apa tǝ ndǝ thla hawi ata kǝra yar ada nkǝrɛ ba apa tǝ ndzǝ laka kǝtǝ apǝri yar nkǝrɛ—“Ngyar ka mur 'ya sǝ kulɗa ka sǝ ɗa ɓuidzi”? Tǝ ndǝ tsi kǝra dar ni kǝ ndzi kal-kal.

Ndɛ Kal-kal Adi wɛ

⁹ Mi tǝ yar awa dǝnta ati dza? Mur ɗaku ya? Adi ahani wɛ! Mur kurtaka nkǝrɛ apǝri ndzǝr Yahudi ba ndzǝ kura Yahudi tsu ahani dar akwi biku.

¹⁰ Apa rǝbwa-rǝbwa: “Ndǝ duku adi wɛ nam kal-kal, adi wɛ wala duku;

¹¹ ndǝ duku adi wɛ nam tara ngaba, ndǝ duku adi wɛ nam ada bara Hyal.

¹² Sanga ndzǝ mbalntadzi atǝra, dar atakǝmaduku ndzai sǝ ɓǝrtu; ndǝ duku adi wɛ nam ada 'ya su ɗa, adi wɛ wala duku.”

¹³ “Kuɗaha dar ani kul yarɛ mburmburi; kanyara dar yarɛ ghǝi aka thla hawi.” “Kǝlbur kyikǝhyɛ yarɛ ata kutsǝr nya dar.”

¹⁴ “Nya dar ghǝi-ghǝi aka ngǝngǝlɛ ba ɗǝwatukur.”

¹⁵ “Thlǝla dar ada dzala ka punta masi;

¹⁶ 'yanta su ba hau ndɛ akwa kalkuta ani whalǝr dar yarɛ,

¹⁷ ba whalǝr ndzaiyir lapiyakur dar ta zǝndi wɛ.”

¹⁸ “Dar adi ada hyivǝr Hyal wɛ.”

¹⁹ Kulini yar zǝndi apǝri kǝlara sǝ nam tǝ mabari nkǝrɛ, dzǝ nkǝrɛ ala ndzǝ nam akwi mabari, ani ka kǝlara nya ka dar ndzi kǝɗǝk ba sanga dunya ata ndzai akwi hakar Hyal.

²⁰ Kadǝbar ǝni ndɛ adi nam tǝ ndɛ ata nkǝrɛ apǝri dzǝ kal-kal akǝma Hyal atar ɓǝla mabari wɛ; ama, atar mabari tǝ mur zǝndi biku.

Kalkalkur Atar Hamnta Dzǝri

²¹ Ama kulini kalkalkur nam adzǝ Hyal, kura aka mabari, ndǝ kǝ zǝndi, nam tǝ mabari ba nabi yarɛ tara sakǝidatsǝni.

²² Kalkalkur nam adzǝ Hyal ni si atar hamnta dzǝri akwa Yɛsu Kǝrsti ala sanga ndzǝ nam tara mbǝrsa. Pampamkur adi wɛ,

²³ akuya sanga ndzi 'ya biku ba dar kǝtǝ ta nggakur Hyal,

²⁴ ba Hyal mǝrti tǝ gǝri kal-kal akǝmari ɓǝrtu tǝ ɗakurni atar pǝli ndɛ nam ada si atar Kǝrsti Yɛsu.

²⁵ Hyal si aka dza apa sǝr kǝdlǝrsu nǝr salautsǝnidzi, atar hamnta dzǝri akwa masǝrni. Dzǝ 'yati sǝ ǝni ka tsanti kalkalkurni, kadǝbar akwa ɓatǝ sǝrni dzǝ ngyar biku yarɛ nam tǝ ndǝ 'ya watsi kura haka—

²⁶ dzǝ 'yati ǝni ka dzǝ tsanti kalkalkurni ata saka ǝni, ani ka dzǝ ndzai kal-kal ba ndǝ nam ata la kalkalkur ala ndzǝ nam aka hamnta dzǝri akwa Yɛsu.

²⁷ Akwa madi, dza, tǝ agula awa ɓuidzi? Dza adi akwa wɛ. Ata nyar sǝr mi? Atar nyar ɓǝla mabari? A'a, ama ata nyar hamnta dzǝri nda.

²⁸ Akuya yar ngǝzi apǝri ndɛ ada ɓui ndzai kalkalkur atar hamnta dzǝri adi atar ɓǝla mabari wɛ.

²⁹ Hyal ni dzǝ Hyalǝr ndzǝr Yahudi ɗiɗi ya? Dza adi Hyalǝr ndzǝ kura Yahudi yarɛ yɛ wɛ? A, nǝr ndzǝ kura Yahudi yɛ,

³⁰ tǝng tǝ Hyal duku ɗiɗi ani adai, nam ata mǝrti kal-kal ndzaiyir ndzǝ nam aka thlakatsa atar hamnta dzǝri ba ndzǝ nam kura aka thlakatsa tsu atar hamnta dzǝri ǝnda.

³¹ Muri, dza, mur awa mǝrti mabari sǝ ɓǝrtu atar hamnta dzǝri ni ya? Adi ata 'ya wɛ! Ama, mur ngǝzi mabari ni.