Ndzǝr Rauma 12 - Kibaku NT

Sataka yarɛ Nam ata Mulɛ

¹ Kadǝbar ǝni, Yi kǝgyǝ tǝ gǝri, madar mama, atar kǝtǝrdzǝr Hyal, ka gǝr hamnta dza gǝri apa kǝdlǝrsu yarɛ nam ata mulɛ, alari ba ada panyi ɗǝfa Hyal—ǝni ani 'ya vǝkǝr sǝlaiyir gǝri akwa mambǝlɛ.

² Ta gǝr ta nu sǝr 'yar dunya ni, ama ka Hyal pali tǝ gǝri ka gǝr ndzai ndzǝ bǝlin atar pali whal nam tǝ gǝri ada ɗǝnga su. Antǝ gǝri ata zǝndi whal nam tǝ gǝri ata 'ya sǝ nam tǝ Hyal ada bara ka gǝri 'ya—sǝ nam ɗaku, ada panyi ɗǝfu ba kal-kal alari.

³ Akuya atar ɗakur Hyal nam tǝ Dzǝ lai Yi ada nkǝrɛ ala kǝlara ndɛ akwa ntsa gǝri: Ta gǝ ta kǝtǝ nggakur kǝr ɓwalta kǝra gɛ, ama kudzǝ ka gǝ 'ya ɗǝnga kal-kal ata kǝra kǝrngɛ, apa whal nam tǝ Hyal tara vi ka la gɛ akwa hamnta dzǝrǝr ngɛ.

⁴ Tsu apa tǝ kǝlara ndɛ akwa ntsa muri aka dzɛ duku aka palai yarɛ hang, ba palai yarɛ ni sang adi ada 'ya su dzǝli duku wɛ,

⁵ ani akwa Kǝrsti muri nam hang ni mur 'ya dzɛ duku, ba kǝlara palai dzǝ nǝr palai yarɛ damwa ni.

⁶ Muri aka sǝga yarɛ pam-pam, apa tǝ ɗakur Hyal tara la muri. Ma apǝri sǝgakur ndǝ laka ani nabikur, ngyar ka dzǝ 'ya kǝthlǝr akǝri kal-kal aka hamnta dzǝrǝrni.

⁷ Ma 'ya kǝthlǝrǝr mbana, ngyar ka dzǝ 'ya kǝthlǝr mbana; ma hyipɛ, ngyar ka dzǝ hyipɛ;

⁸ ma dǝnautsǝni ndɛ, ngyar ka dzǝ dǝnautsǝni; ma hamnta su ka mbana ndzǝ damwa yarɛ, ngyar ka dzǝ hamnta kura aka whunɛ; ma ndzai ngga ata kǝra ndzi, ngyar ka dzǝ 'ya kǝthlǝr kal-kal aka ufti; ma tsan kǝtǝrdzi, ngyar ka dzǝ 'ya aka kutsari.

Yiɗǝdzi

⁹ Yiɗǝdzi kǝ ndzai ntsakǝr ka dzǝ ndzai aka ɗǝfu duku. Ka gǝ ngǝla sǝ nam kulɗa; ka gǝ ngǝzi sǝ nam ɗaku ɓaɓal.

¹⁰ Hamntamɛ kǝr gǝri ala kǝma gǝri akwa yiɗǝdzi nǝr yar mamakur. Ka gǝri hǝmɛ kǝma gǝri ɓwalta kǝr gǝri.

¹¹ 'Yamɛ kǝthlǝr aka dǝna ba ta gǝr ta ndzai sǝrwai. Ka gǝri mau 'ya kǝthlǝr ala Thlaku Hyal ni.

¹² Kutsariyamɛ akwa tǝmatsǝni, 'yamɛ kǝmar akwa bwanai, lǝkǝmamɛ aka 'ya aduwa tatang.

¹³ Ka gǝri la su ala ndzǝr Hyal nam kura aka su. Ka gǝri mauwɛ dlu ndzǝr buraburá.

¹⁴ Ka gǝr vǝdzǝ barka ala ndzǝ nam ada tsanɛ ala gǝri bwanai; ka gǝr vǝkǝr barka ala su ta gǝr ta kǝl barkar su.

¹⁵ Kutsariyamɛ kaka ndzǝ nam ada kutsari; tuwamɛ kaka ndzǝ nam ada tuwa.

¹⁶ Ndziyamɛ aka tamtamkur kaka kǝma gǝri. Ta gǝr ta agula, ama ka gǝr yiɗǝ kǝltsǝnidzi kaka ndzǝ nam kura ngga-ngga. Ta gǝri ta kǝtǝ apǝri gǝri bǝrkawa.

¹⁷ Ta gǝr ta nkyǝ kulɗakur tǝ kulɗakur. Hankalamɛ ka gǝr 'ya sǝ nam kal-kal akǝma kǝlara ndɛ.

¹⁸ Ma apǝri awa mǝzi ka 'ya, tǝbwar gǝri, ka gǝri ndzai lapiya aka kǝlara ndɛ.

¹⁹ Ta gǝri ta nkyǝ sǝkur, pazǝrna yarɛ, ama ngyar ka Hyal dza nkyǝ sǝkur, akuya rǝbwa-rǝbwa: “Nkyǝ sǝkur nana; Yi ata nkyinta,” Ndǝ Thlaku ni.

²⁰ Pam ta ǝni: “Ma dawar ngɛ aka mi, lar ɗǝvɛ; ma dzǝ aka thlǝlai, lar su ka dzǝ sa. Akwa 'ya ǝni, gɛ ata tsaɓtsǝni hahikǝr u'u ata kǝrari.”

²¹ Ta kulɗakur ta 'ya aka dǝna ata kǝra gǝri, ama ka gǝri ngǝmba kulɗakur tǝ ɗakur.