Ndzǝr Kwalausi 3 - Kibaku NT

Tsau yarɛ ka Ndzai nǝr Hyalkur

¹ Antǝ, tǝng tǝ gǝri hyati akwa ntǝnti kaka Kǝrsti, ka gǝri vǝti ɗǝfa gǝri ata sǝ yari nam atahyal, akwa vui nam tǝ Kǝrsti ada ndzai ata bwa tsisǝma Hyal.

² Vǝtamɛ hankala gǝri ata sǝ yarɛ nam atahyal, adi ata sǝ yarɛ nǝr dunya wɛ.

³ Akuya gǝri nti, ba mpikɛ gǝri kulini ada ɗǝwar aka Kǝrsti akwa Hyal.

⁴ Sakatǝ Kǝrsti, dzǝ nam ani mpika gǝri, tsantǝdzi, gǝri yɛ gǝri ata tsantǝdzi kaka dza akwa nggakur.

⁵ Kadǝbar ǝni, ka gǝr tsai, kǝlara sǝ nam nǝr dunya akwa dzá gǝri: badawikur, ghyǝmburkur, mau su, tǝmá sǝ kulɗa ba lambwakur, dzǝ ani vǝkǝr sǝlai ala mǝlǝm yarɛ.

⁶ Kadǝbar sǝ ǝni yarɛ ni, sǝwa ɗǝfǝr Hyal aghǝli ada si.

⁷ Akwa ndzaiyir gǝri watsi gǝr kǝ 'ya dzǝli sǝ yarɛ ni.

⁸ Ama kulini kǝ ndzai ntsakǝr ka gǝri ngyar 'ya sanga sǝ yarni: ka gǝr ngyar kǝl ɗǝfu, duguntsǝni ndɛ, sǝwa thlǝma ndɛ, gha ndɛ, ba ta nya kulɗakur ta sǝba akwa nya gǝri.

⁹ Ta gǝri ta hawi ala kǝma gǝri, akuya gǝri kurtaka punta dzá gǝri nam halhali nǝr biku ni,

¹⁰ ba gǝri ka hadzɛ dzǝ bǝlin, nam tǝ Hyal tara mǝrti bǝlin akwa zǝndǝsu akwa dludzǝr Hyal.

¹¹ Akwani Gǝriku wala ndzǝr Yahudi adi wɛ, ndɛ aka katsa wala zumbulǝm, ndǝ si-si, ndǝr ntaku, fali wala kambɛ, ama Kǝrsti ani sanga su ba akwa sanga su.

¹² Kadǝbar ka ǝni, Hyal kǝ tsarba tǝ gǝri ka ndzai ndzǝrni nam tǝ dzǝ yiɗɛ, hadzamɛ ala kǝr gǝri kalhur, hankalkur, tǝrghǝlkǝr, kanadikur, ba kǝmar.

¹³ Ka gǝri ɓati su ala kǝma gǝri, ka gǝri kyifǝnta kǝlara sǝ nam tǝ gǝri akǝri ata kǝra kǝma gǝri. Kyifǝnta mɛ ala kǝma gǝri apa tǝ Kǝrsti tara kyifǝnta ala gǝri.

¹⁴ Ata kǝra sanga sǝ ǝni yarni ka gǝri hadzǝ yiɗǝdzi, nam tara mbwai tǝ dar sang atakǝmaduku akwa kǝltsǝni kǝr nam ɗaku.

¹⁵ Ngyar ka ndzai lapiyakur nǝr Kǝrsti 'ya kuhyikur akwa ɗǝfa gǝri sang, tǝng tǝ gǝri ndzǝ duku nǝr dzɛ Hyal ká tǝ gǝri ka ndzai lapiya. Ba ka gǝri gwaditsǝni.

¹⁶ Ngyar ka ndǝrǝr Kǝrsti ndzai akwa gǝri. Ka gǝri hyipǝ su ba gala kǝma gǝri aka sanga bǝrkawakur, Ka gǝri 'ya har Zabura, ba har hǝm Hyal ba ha yarɛ akwa mambǝlɛ aka gwaditsǝni akwa ɗǝfa gǝri ala Hyal.

¹⁷ Ba kǝlara sǝ tǝ gǝri ata 'ya, wala ndǝrɛ wala kǝthlǝr, ka gǝri 'ya sanga su akwa thlǝma Thlaku Yɛsu, tǝ gǝri ada gwaditsǝni ala Hyal Tada ni atarni.

Tsau yarɛ ala Kǝiyir Kǝrsan

¹⁸ Mwahyi, ka gǝri kǝlǝngkǝr ala salǝr gǝri yarɛ, akwa whal nam kal-kal akwa Thlaku ni.

¹⁹ Sǝli, ka gǝri yiɗɛ mwahyir gǝri yarɛ, ba ta gǝri ta 'ya mǝghyǝghyǝngkur ala dar.

²⁰ Madausai, ka gǝri ngandǝrǝr ndzǝr yar gǝri akwa kǝlara su, akuya ǝni ada panyi ɗǝfa Thlaku ni.

²¹ Tada yarɛ, ta gǝr ta 'ya sǝr sǝwa ɗǝfu ala madar gǝri ka kǝlba ɗǝfu ala dar.

²² Fali yarɛ ka gǝri ngandǝrǝr thlakǝr gǝri yarɛ nam akwa dunya akwa sanga su; ba ka gǝri 'ya su, adi ka tǝ dar ada wul tǝ gǝri, akuya ka gǝri ɓui maiwakur adzǝ dar wɛ; ama ka gǝri 'ya su aka ɗǝfu duku akuya ka hyivǝr Thlaku ni.

²³ Kǝlara sǝ tǝ gǝri ada 'ya, ka gǝri 'ya sanga su aka ɗǝfa gǝri, apa gǝri ada 'ya ala Thlaku ama adi apa ala ndzǝ wɛ.

²⁴ Tǝng tǝ gǝri zǝndi apǝri gǝri ata siya dlutsi warta aka Thlaku dza ani wadzǝɓar gǝri. Thlaku Kǝrsti ani tǝ gǝri ada kǝthlǝr alari.

²⁵ Kǝlara ndǝ nam tara 'ya sǝ nam kura kal-kal dza ata ɓui wadzǝɓar sǝ nam tǝ dzǝ 'ya, ba Hyal adi ada nkǝru wɛ.