Ndzǝr Ibrahim 9 - Kibaku NT

Vǝkǝr Sǝlai akwa Fǝr Nguzi nǝr Dunya

¹ Kulini sǝ mbwa-mbwa nam tangkǝma ni dzǝ aka tsau yarɛ nǝr 'ya vǝkǝr sǝlai ba tsuwɛ fǝr vǝkǝr sǝlaiyari tsu akwa dunya.

² Ndǝ tsati fǝr nguzi. Akwa kuta kwadzɛ nam tangkǝma ndǝ vi sǝr hai pitǝla, tɛbǝr ba mantsǝkǝl nam tǝ ndǝ hamnta ala Hyal; kuta fǝr ni ndǝ ada ka tǝ Vui Kartǝ ni.

³ Aghǝla lapǝlai nǝr sǝɗǝkur ni fǝr adai tǝ ndǝ ada ká tǝ Vui nam Kartǝ ta Sang ni,

⁴ nam tǝ muɓur dinar nǝr sǝ sǝwur ba ɗakwatiyir sǝ mbwa-mbwa tǝ ndǝ mbui aka dinar. Akwa ɗakwati ni gǝlam tǝ ndǝ 'ya aka dinar tǝ mana akwa, zuwar Haruna nam tara ɗǝɗa nda, ba whuwahumǝr paya yarɛ nǝr sǝ mbwa-mbwa ni akwa.

⁵ Ati ata kǝra ɗakwati ni ndǝ vi sǝ yarɛ nam aka bǝbǝgɛ, karibim nam ada tsanti apǝri nggakur Hyal akwanda, tǝ dar mbukǝr bǝbǝgɛ dar ala vui nam tǝ ndǝ ada ɓui kyifǝnta biku akwa. Ama yar adi ata mǝzi ka tsǝdzǝba sanga su ata kǝra sǝ yarni kulini wɛ.

⁶ Sakatǝ ndǝ ɗǝmhǝi sanga su apani, fǝrist yarɛ ni ada lǝkwa fǝr nam abǝlabǝla ni tatang ka 'ya kǝthlǝrǝr dar.

⁷ Ama ɗiɗi kuhyir fǝrist ani ada lǝkwa fǝr nam akwa-akwa ni, ba ɗiɗi ka duku akwa fá ba kǝ ndzai ntsakǝr adi kura aka masi wɛ, nam tǝ dzǝ ada hamnta ka kǝrni ba ka biku yarɛ nam tǝ ndzǝ 'ya akwa tǝrkur zǝndi.

⁸ Mambǝl Kartǝ ni ada tsanti atar ǝni apǝri whalǝr lǝkwa Vui nam Kartǝ ta Sang ni tsu ta mburntadzi wɛ tǝng tǝ kuta kwadzɛ nam tangkǝma ni tsu ada hyati.

⁹ Əni ani su tǝ ndǝ ata tsanti akuya ka saka nam kulini, nam ada tsanti apǝri sǝga yarɛ ba kǝdlǝrsu yar nam tǝ ndǝ ada hamnta adi ada mǝzi ka kǝtsǝnta ɗǝngar ɗǝfa ndzǝr vǝkǝr sǝlai wɛ.

¹⁰ Tsawur dar yarni kadǝbar ka ɗǝvɛ ba sǝr sa ba wudzǝr kǝtsǝdzi yarɛ ɗiɗi—tsau yarɛ nam tǝ ndɛ ada 'ya ala kum aka masi, tar saka nam tǝ whal nam ɗaku ni si.

Masǝr Kǝrsti ni

¹¹ Sakatǝ Kǝrsti si apa kuhyir fǝrist nǝr sǝ yarɛ nam ɗaku ni nam tara kurtaka si, dzǝ mwari atar fǝr nguzi nam ɗaku ta sang nam kura ndǝ dza 'ya, ani apǝri, nam kura akwa ntsa sǝ nam tǝ Hyal hǝnti akwa dunya.

¹² Dzǝ ta lǝkwa ata nyar masǝr kwai yarɛ ba kǝrná yarɛ wɛ; ama dzǝ lǝkwa Vui nam Kartǝ ta Sang ni kadukurau atar masǝrni, ani dzǝ ka ɓui ala muri pǝlidzi kura kurkuri.

¹³ Akuya ma masǝr kwai yarɛ ba bǝlan thla yarɛ ba pǝndzuwur nkwar thla nam tǝ ndɛ ada tǝtǝrkǝr ala ndzǝ nam kura kǝtsǝkǝtsi ada kǝtsǝnta tǝ dar ani ka dar ndzai kǝtsǝkǝtsi nǝr dzɛ abǝla.

¹⁴ Ma apǝri sǝ yarni dzǝri, mǝmi hangkur sǝ tǝ masǝr Kǝrsti ata 'yati? Atar Mambǝl nam kura kurkuri tǝ dzǝ hamnta kǝrni kura aka aibai ala Hyal, ka kǝtsǝnta ɗǝfa muri ta 'ya sǝ nam ada mwari aka ndɛ akwa nti, ani ka muri 'ya kǝthlǝr ala Hyal nam aka mpikɛ!

¹⁵ Akuya ka ǝni Kǝrsti dzǝ ani ndǝ nam akwa dabu nǝr sǝ mbwa-mbwa bǝlin, apǝri ndzǝ nam tǝ ndǝ tara kǝga ka dar dlutsi alkawalǝr warta nam kura kurkuri—kulini nam tǝ dzǝ nti apa sǝr pǝl ndɛ ka dzǝ pǝli tǝ dar akwa biku nam tǝ dar 'ya akwi sǝ mbwa-mbwa nam tang ni.

¹⁶ Ma ndǝ nam tara gha sǝ nam tǝ ndɛ ata 'ya aka wartarni kǝ ndzai ntsakǝr ka ndǝ zǝndi apǝri dzǝ nti kwataku,

¹⁷ kadǝbar sǝ tǝ sai nkǝrɛ ndɛ ada kǝthlǝr akǝri ɗiɗi sakatǝ ndari tara nti; ndɛ adi ada 'ya kǝthlǝr akǝri tǝ ndǝ nam tara gha sǝ ni tsu ata mpikɛ wɛ.

¹⁸ Ani sǝ tara 'ya wala sǝ mbwa-mbwa nam tangkǝma ni ma ndǝ ta 'ya kǝthlǝr akǝri kura aka masi wɛ.

¹⁹ Sakatǝ Musa tara tsǝba su ata kǝra kǝlara tsau yarɛ nǝr mabari ala sanga ndzi. Dzǝ kǝtǝ masǝr kǝrná yarɛ, vwam kaka yimi, tawal magza ba tsiya fur sǝ sǝwur yarɛ, ba kakadu pǝrpǝri tǝ kǝrni ba dzǝ ka ɓutsikǝr ala sanga ndzi.

²⁰ Dzǝ nkǝrɛ, “Əni ani masi nǝr sǝ mbwa-mbwa ni, nam tǝ Hyal tara tsau ala gǝri ka gǝri ɓǝla.”

²¹ Tsu akwa whal ǝni, dzǝ ɓutsikǝr masi ni yɛ ala fǝr nguzi ni aka sanga kariyir 'ya wudzǝr nam akwa.

²² Dzǝri, mabari ada bara apǝri kudzǝghɛ adzǝ kǝlara su ka ndǝ ɗagulnta aka masi, ba ma punta masi adi wɛ kyifǝnta biku adi wɛ.

²³ Kǝ ndzai ntsakǝr, dzá, ala sǝ yarɛ nǝr dludzǝr sǝ nam atahyal ka dar ndzai kǝtsǝkǝtsi atar sǝr kǝdlǝrsu yarɛ ni, ama sǝ yarɛ nam atahyal ni dar aka sǝr kǝdlǝr sǝ yarɛ nam ɗaku ta ǝni yarni.

²⁴ Akuya Kǝrsti ta lǝkwa fǝr nguzi nam tǝ ndǝ dza 'ya wɛ nam ani ɗiɗi dludzǝr nam dzǝrari; dzǝ lǝti ati akwa vui nam atahyal tǝ kǝrni, kulini dzǝ lǝngui akǝma Hyal ata vuiya muri.

²⁵ Wala dzǝ ta mwari alǝti atahyal ka dzǝ faya hamnta kǝrni tatang wɛ, tsu apa tǝ kuhyir fǝrist ada lǝkwa Vui nam Kartǝ ta Sang ni tatang fá aka masi nam kura nǝr dzari.

²⁶ Ma apǝri ahani, dzá, kǝ ndzai ntsakǝr ka Kǝrsti sa bwanai ka hang tǝng ata tǝ dunya vidzi. Ama kulini dzǝ sǝba aka kǝrni ka duku ɗiɗi ata dǝntar zaman yarɛ ni akuya ka sanga ndzi ka dzǝ kǝlnta biku atar hamnta kǝrni sǝr kǝdlǝrsu.

²⁷ Tsu apa tara vidzi ala ndɛ ka dzǝ nti ka duku ɗiɗi, aghǝla ǝni si hakar Hyal,

²⁸ ani tǝ Hyal tara hamnta Kǝrsti ka duku akuya ka kǝtǝ biku yarɛ nǝr ndzǝ hang; ba dzǝ ata sǝba nǝr sǝɗǝkur, adi ka kǝl biku wɛ, ama ka si aka mbatǝdzi ala ndzǝ nam ada sǝkǝ tǝni.