Ndzǝr Ibrahim 8 - Kibaku NT

Kuhyir Fǝrist nǝr Sǝ Mbwa-mbwa Bǝlin

¹ Sǝ nam tǝ yar ada ndǝrɛ ata kǝrni ani: muri aka dzǝli kuhyir fǝrist ni, nam tara ndzai ata bwa tsisǝma dǝgǝl kuhyikur nǝr Hyal nam ati.

² Akwanda dzǝ ndǝr kǝthlǝr akwa fǝr nguzi nam atahyal ni, nam ani vui nam dzǝri nǝr vǝkǝr sǝlai nam tǝ Thlaku ni dzǝ ani tara mǝrti, adi ndɛ wɛ.

³ Kǝlara kuhyir fǝrist, ndǝ ada kǝlba tǝni ka dzǝ hamnta sǝga yarɛ ba kǝdlǝrsu yarɛ gyapu, ba kǝ ndzai ntsakǝr alari yɛ ka dzǝ ɓui sǝ laka tǝ dzǝ ata hamnta.

⁴ Ma dzǝ akwa dunya, dzǝ adi ata ndzai fǝrist wɛ, akuya sǝli kurtaka 'ya adai nam ada hamnta sǝga yarɛ apa tǝ mabari nkǝrɛ.

⁵ Dar ada 'ya kǝthlǝrǝr vǝkǝr sǝlai ala Hyal nam tara dludzi ba sangura sǝ nam atahyal. Ani sǝ nam tara 'ya tǝ ndǝ ɗǝmnya ala Musa sakatǝ dzǝ angwada tsa fǝr nguzi ni: “Ka gǝ wula apǝri gǝ mǝrti kǝlara su akwa whal nam tǝ ndǝ tsanti ala gɛ ati akwa paya.”

⁶ Ama kulini Yɛsu, fǝrist nam ngga ta sang nam tǝ muri akǝri ni, ndǝ lari kǝthlǝr nam ɓwalta nǝr fǝrist yarɛ nam halhali, akuya dzǝ ani ndǝ nam ada ndǝrɛ akwa dabwa ndzǝ aka Hyal akuya ka muri nǝr sǝ mbwa-mbwa nam ɗaku ta sang aka Hyal, ata nyar alkawal nam ɗaku.

⁷ Akuya ma sǝ mbwa-mbwa nam tangkǝma ni dzǝ ani ndzai kura aka aibai, vui adai nam tǝ ndǝ awa bara nǝr sǝɗǝkur wɛ.

⁸ Ama Hyal ɓui aibai aka ndzǝrni yarni ba dzǝ ka nkǝrɛ: “Saka ata si, ndǝ Thlaku, saka nam tǝ Yi ata 'ya sǝ mbwa-mbwa bǝlin aka kǝiyir Izǝraila ba aka kǝiyir Yahuda.

⁹ Adi ata ndzai apa sǝ mbwa-mbwa ni nam tǝ Yi 'ya kaka kakár dar yarɛ wɛ sakatǝ Yi kǝtǝ tǝ dar ata tsai ka faba tǝ dar akwa Masar, kadǝbar dar ta ndzai aka dzǝrkur ala sǝ mbwambwarna wɛ, ba Yi ka mbaldzǝhǝi ala dar, ndǝ Thlaku.

¹⁰ Əni ani sǝ mbwa-mbwa nam tǝ Yi ata 'ya aka kǝiyir Izǝraila aghǝla saka ǝnda, ndǝ Thlaku. Yi ata pu mabariyirna yarɛ akwa hankala dar ba Yi ata rǝbwai tǝ dar akwa ɗǝfa dar. Yi ata ndzai Hyalǝr dar ba dar ata ndzai ndzǝrna.

¹¹ Ndǝ tsu awa hyipǝ su ala ntǝwhulǝrni wɛ, wala ndǝ tsu awa gha ala zǝrangǝri apǝri, ‘Ka gǝ zǝndi Thlaku wɛ,’ kadǝbar dar sang ata zǝndi tǝra, baditsǝni ata ndǝ nam, nkyiɗu akwa ntsa dar ka la ndǝ nam ngga ta sang.

¹² Akuya Yi ata kyifǝnta kǝmangarkur dar ba Yi tsu adi ata ɗǝngati bikǝr dar kǝra wɛ.”

¹³ Atar kǝga sǝ mbwa-mbwa ni “Bǝlin,” dzǝ mǝrti nam tangkǝma ni kura aka paida; ba sǝ nam kura aka paida ni ba sǝ nam ada hal ni kulini dzǝ ata santadzi.