Ndzǝr Ibrahim 6 - Kibaku NT

¹ Kadǝbar ǝni ka mur ngyar sǝr hyipǝ yarɛ nam butu-butu ata kǝra Kǝrsti ba ka mur lǝkǝma aka kǝlí, ta muri ta ndzai ka sǝr tsǝl yarɛ nam ata piyartsǝni nǝr tubi aka sǝr 'ya sǝ yarɛ nam ata mwari aka ndɛ akwa nti, ba hamnta dzǝri akwa Hyal,

² tsǝl su ata kǝra bamtizǝma yarɛ, pukǝr tsai yarɛ, hyati akwa ntǝnti yarni, ba haka nam kura kurkuri.

³ Ba Hyal yiɗɛ, muri ata lǝkǝma.

⁴ Ata 'ya dzau ala ndzǝ nam tara saga ɓui mbur kǝr, tara saga ɗar sǝga nam atahyal, nam tara ɓui Mambǝl Kartǝ,

⁵ ndzǝ nam tara saga ɗar ɗakur ndǝrǝr Hyal ba dǝna yarɛ nǝr zaman nam ata si ni,

⁶ ma dar dlantadzi, ka ndǝ ɓakta si aka dar ka dar tubi, kadǝbar dar ada ɓakta kukwanta Zǝr Hyal ni kadamwa, nam ata dǝntari ata siya 'yanta tǝ dar. Dar ada hau tǝni akwa sǝlai akǝma ndzi.

⁷ Dai nam ada sa yimi nam ada si ka hang ba ada ntsǝti sǝ nam aka paida ala ndzǝ nam tara tsǝwhɛ tǝni, ndzǝ nam tara tsǝwhɛ ni ada dlu barka aka Hyal.

⁸ Ama dai nam ada si aka ntsǝkǝɗa ba sǝ fwǝfwɛ yarɛ paidar ni adi wɛ ba dzǝ akwa whalǝr ɗu akwa bwaniyir suntadzi. Ata dǝntari ndǝ ata mbanta tǝni.

⁹ Wala tǝ yar ada ndǝrɛ ahani, pazi yarɛ nam tǝ yar yiɗɛ, yar aka mbǝrsa nǝr sǝ yarɛ nam ɗaku ala gǝri—sǝ yarɛ nam vwam kaka mbatǝdzi.

¹⁰ Hyal dzǝ aka dzǝri; dzǝ adi ata fwanta kǝthlǝrǝr gǝri wɛ ba yiɗǝdzi nam tǝ gǝri tsanti alari nam tǝ tara gǝri dlar ndzǝrni ba tǝ gǝri ada lǝkǝma aka dlar tǝ dar.

¹¹ Yar ada bara kǝlara ndɛ akwa ntsa gǝri ka dzǝ 'ya dzǝli ufti ni akuya ka gǝri dlutsi sǝ nam tǝ gǝri aka tǝmatsǝniyari ghǝi-ghǝi har ka la dǝnta.

¹² Yar adi ada bara ka gǝri ndzai sǝrwai wɛ, ama ka gǝr nu thlǝla ndzǝ nam atar hamnta dzǝri ba kǝmar sǝnya wartar sǝ nam tǝ Hyal 'ya alkawalari.

Alkawalǝr Hyal Kura ada Ɓǝlntadzi

¹³ Sakatǝ Hyal 'ya alkawal ala Ibrahim, tǝng tǝ ndǝ nam ngga ta dza tǝ dzǝ awa mbǝrɛ akǝri adi wɛ, dzǝ ka mbǝrɛ aka kǝrni.

¹⁴ Dzǝ nkǝrɛ, “Dzǝri Yi ata vǝdzǝ barka ala gɛ ba Yi ata hau tǝngɛ ka gǝ ɓui kulfɛ nam hangkurari.”

¹⁵ Ani apani aghǝla tǝ dzǝ tara sǝkɛ aka kǝmar, Ibrahim dlutsi sǝ nam tǝ Hyal 'ya alkawalari nda.

¹⁶ Sǝli ada mbǝrɛ tǝ ndǝ laka nam ɓwalta dar, ba mbǝr ni ada tsanti dzǝrkur sǝ nam tǝ ndǝ tara gha ba ada si aka thlanta sanga ɓwalnya.

¹⁷ Akuya ka ǝni Hyal ada bara ka dzǝ mǝrti ndzaiyir sǝ nam tǝ dzǝ ada bara 'ya kura ada palidzi ni ata babal ala ndzǝr sǝm wartar sǝ nam tǝ dzǝ 'ya alkawalari, dzǝ tsanǝba tǝni atar mbǝrɛ.

¹⁸ Hyal 'ya sǝ ǝni ani ka, atar sǝ sǝɗɛ; alkawal ba mbǝrǝrni nam kura ada palidzi ani adi awa mǝzi ka 'ya tǝ Hyal awa hawi wɛ, mur nam tara whui ka ngǝti tǝmatsǝni nam tǝ Hyal hamnta ala muri ka mur dǝnautsǝnidzi.

¹⁹ Muri aka tǝmatsǝni ǝni apa yang kǝgǝɓu sǝr ngǝzi sar nam ɓaɓal nam kura su awa tsǝkwar ala sangura muri. Tǝmatsǝni ni lǝkwa fǝr nam akwa-akwa aghǝla lapǝlai ni,

²⁰ vui nam tǝ Yɛsu, nam tara lǝkǝma ala muri, tara lǝkwa ata nyar muri. Dzǝ ka ndzai kuhyir fǝrist nam kura kurkuri, tsu apa Malkisadik.