Ndzǝr Ibrahim 5 - Kibaku NT

¹ Kǝlara kuhyir fǝrist ndǝ tsarba tǝ dar akwa ntsa sǝli ba ndǝ ka kǝlba ka vi tǝ tǝni ata vuiya dar akwa sǝr Hyal yarɛ, ka dar hamnta sǝga yarɛ ba kǝdlǝrsu nǝr biku yarɛ.

² Dzǝ ada mǝzi ka 'ya sǝ tǝ hankal kaka ndzǝ nam bǝlku nam tǝ dar ada pǝranta, tǝng tǝ dzǝ tǝ kǝrni ma dzǝ aka kǝtikǝtikur.

³ Ani sǝ nam tara 'ya kǝ ndzai ntsakǝr tǝ dzǝ ada 'ya kǝdlǝrsu akuya bikǝrni, ba akuya ka bikǝr ndzi yɛ.

⁴ Ndɛ adi nam awa kǝtǝ nggakur ǝni ala kǝrni wɛ; kǝ ndzai ntsakǝr Hyal dza ani tara kǝga tǝni, tsu apa tǝ Hyal kǝga Haruna.

⁵ Ani Kǝrsti yɛ dzǝ ta kǝtǝ ala kǝrni hǝmǝr ndzai kuhyir fǝrist ni wɛ. Ama Hyal nkǝrɛ alari, “Gǝ Zǝrna; asǝna Yi kǝ ndzai Babar ngɛ.”

⁶ Ba dzǝ nkǝrɛ akwa vui damwa, “Gǝ fǝrist kura kurkuri, tsu apa nǝr Malkisadik.”

⁷ Akwa vǝr yarɛ nǝr ndzaiyir Yɛsu akwa dunya, dzǝ hamnta aduwa yarɛ ba kǝgyǝ su ata nyar ndzi aka tuwa yarɛ ngga-ngga ba sǝmwai yarɛ ala ndǝ nam ata mǝzi ka mbatǝ tǝni akwa nti, ba Hyal ka ngati tǝni kadǝbar tǝ dzǝ vǝkǝr sǝlai alari.

⁸ Wala ahani tǝ dzǝ zǝr, dzǝ tsǝli ngandǝrɛ atar sa bwanai

⁹ ba, aghǝla tǝ dzǝ tara ghǝiyabadzi, dzǝ kǝ ndzai vui tǝ ndǝ ada ɓui mbatǝdzi nam kura ada kuri ala sanga ndzǝ nam tara ngandǝrǝrni

¹⁰ ba Hyal vi tǝni kuhyir fǝrist tsu apa Malkisadik.

Ɗǝmnya ta Dlantadzi

¹¹ Yar aka su hang tǝ yar ata nkǝrɛ ata kǝra ǝni, ama tsǝdzǝbari dzau kadǝbar gǝri adi ada tsǝli su sam wɛ.

¹² Wala ahani, ata saka ǝni ka gǝri ndzai ndzǝr hyipǝ su ala ndzi, gǝri tǝ kǝr gǝr ma gǝr ada bara ka ndǝ hyipǝ ala gǝri dzǝrkur nǝr ndǝrǝr Hyal nam butu-butu sang kadamwa. Gǝri ada bara u'uwa, adi ɗǝvɛ ɓaɓal wɛ!

¹³ Kǝlara ndɛ nam ada ndzai tǝ u'uwa dzǝ tsu mbǝghyiwa, dzǝ ta zǝndi sǝr hyipɛ nam ata kǝra ndzai kalkalkur ni wɛ.

¹⁴ Ama ɗǝvɛ ɓaɓal akuya ka ndzǝ nam tara kǝlí, ndzǝ nam atar kǝthlǝr akǝri tatang dar tsǝldzɛ ala kǝr dar tǝ dar ka zǝndi pampamkur ɗaku aka kulɗa.