Ndzǝr Ibrahim 4 - Kibaku NT

Vǝr Sǝbdu ala Ndzǝr Hyal

¹ Kadǝbar ǝni, tǝng tǝ alkawalǝr lǝkwa ghǝrbadzǝrni tsu adai, ngyar ka mur vǝdzǝ hankal ta duku akwa ntsa gǝri ta ɗi kura ta ɓui alkawalǝr lǝkwa ghǝrbadzari.

² Akuya yar yɛ yar ɓui tǝ ndǝ 'ya ala yar ndǝr nam sǝɗa tsu apa tǝ dar 'ya; ama ndǝrǝr Hyal nam tǝ dar ngati ta 'ya aka paida ala dar wɛ, kadǝbar ndzǝ nam tara ngati dar ta kǝltsǝni tǝni aka hamnta dzǝri wɛ.

³ Kulini muri nam tara mbǝrsa kǝ lǝkwa ghǝrbadzi ǝnda. Ala laka ndzi, Hyal nkǝrɛ, “Ani Yi mbǝrɛ akwa ɗǝfu sǝwa-sǝwa, ‘Dar adi ata saga lǝkwa ghǝrbadzǝrna wɛ.’ ” Ba kǝthlǝrǝrni kurtaka kuri tǝng ata baditsǝni dunya.

⁴ Akuya akwa vui laka dzǝ nkǝr su ata kǝra vǝr murfwǝkur ni akwa ndǝr yarɛ ǝni: “Ba ata vǝrǝr murfwǝkur Hyal ghǝrbadzi akwa sanga kǝthlǝrǝrni.”

⁵ Ba kadamwa akwa ndǝr ǝni ati ni dzǝ nkǝrɛ, “Dar adi ata saga lǝkwa ghǝrbadzǝrna wɛ.”

⁶ Tsu apani apǝri ndzǝ laka adai nam ata lǝkwa ghǝrbadzi nda, ba ndzǝ nam watsi tǝ dar tara ɓui tǝ ndǝ tara nkǝrba ala dar ndǝrǝr Hyal nam sǝɗa ni dar adai ta lǝkwa wɛ, kadǝbar ka kura ngandǝrǝr dar.

⁷ Ani Hyal ka vi kadamwa vǝr laka, tǝ ndɛ ada ka tǝ “Asǝna.” Aghǝla saka yarɛ hang tara kwatsǝni dzǝ ndǝrɛ ata kǝr atar Dauda, apa tǝ ndǝ gha kǝma-kǝma: “Asǝna, ma gǝri ngati kuɗahari, ta gǝri ta mǝrti ɗǝfa gǝri ɓaɓal.”

⁸ Akuya ma Dzasuwa kara la dar ghǝrbadzi, Hyal adi ata ndǝrɛ alǝkǝma ata kǝra vǝr damwa wɛ.

⁹ Tsu adai dzá, ghǝrbadzǝr sǝbdu ala ndzǝr Hyal;

¹⁰ Akuya kǝlara ndǝ nam tara lǝkwa ghǝrbadzǝr Hyal dzǝ ada ghǝrbadzi akwa kǝthlǝrǝrni, tsu apa tǝ Hyal tara 'ya akwa nǝni.

¹¹ Ngyar ka muri ha sanga dǝna dzá ka muri lǝkwa ghǝrbadzi nda, ani ka ta ndǝ duku ta dla atar nu kura ngandǝrkur dar nda.

¹² Akuya ndǝrǝr Hyal ata mulɛ ba ada kǝthlǝr. Aka hyir ta kǝlara katsakar nam aka nyari sǝɗɛ, dzǝ ada lǝkwa ka ndǝghǝba ɓwanga sangura aka mambǝlɛ, ɓwanga mǝdlɛ yarɛ ba gulǝr kuta ɗahyi; dzǝ ada 'ya haka ala ɗǝnga yarɛ ba hal yarɛ nǝr ɗǝfu ni.

¹³ Sǝ adai nam ɗǝwa-ɗǝwa ta Hyal wɛ. Kǝlara su mburmburi ba ata babal akǝma ntsa dzǝ nam tǝ muri ata tsǝnta sǝ nam tǝ mur tara 'ya.

Yɛsu ani Kuhyir Fǝrist nam Ngga ta Sang

¹⁴ Kadǝbar ǝni, tǝng tǝ mur aka kuhyir fǝrist nam ngga ta sang nam tara mwari alǝti atahyal, Yɛsu Zǝr Hyal ni, ngyar ka mur ngǝzi hamnta dzǝri nam tǝ muri akǝri ɓaɓal.

¹⁵ Muri aka kuhyir fǝrist nam ata mǝzi ka kǝtǝrdzi ata kǝra kǝtikǝtikur muri yarɛ, nam tǝ ndǝ nkǝrti tǝni akwa kǝlara whalɛ, tsu apa tǝ ndɛ tara 'ya ala muri—wala ahani dzǝ ta 'ya biku wɛ.

¹⁶ Ngyar dzá ka muri mwari adzǝ dǝgǝl kuhyikur nǝr ɗakur Hyal aka mbǝrsa, ani ka mur dlutsi kǝtǝrdzi ba ka mur ɓui ɗakur Hyal ka dlar tǝ muri akwa saka nam tǝ mur ada bara.