Ndzǝr Ibrahim 3 - Kibaku NT

Yɛsu Ɓwalta Musa

¹ Kadǝbar ǝni, madar mama kaka nkwaiyir mama yarɛ nam nǝr Hyal, nam akwa ntsa ndzǝ nam tǝ ndǝ kǝga atahyal, vǝtamɛ ɗǝngar gǝri ata Yɛsu, ndǝr hya ni ba kuhyir fǝrist nam tǝ yar ada sakǝidatsǝni.

² Dzǝ aka dzǝrkur ala ndǝ duku nam tara kǝlba tǝni ni, tsu apa tǝ Musa aka dzǝrkur akwa sanga kǝiyir Hyal.

³ Hyal la nggakur ala Yɛsu ɓwalta Musa, tsu apa tǝ ndǝ nam tara tsati kǝi dzǝ aka hǝmɛ ɓwalta kǝiyari.

⁴ Akuya kǝlara kǝi aka ndǝ nam tara tsa tǝni, ama Hyal dzǝ ani ndǝr tsa kǝlara su.

⁵ Musa ndzai zǝr kǝi nam aka dzǝrkur akwa sanga kǝiyir Hyal, dzǝ ada nkǝrnta sǝ nam tǝ Hyal ata gha akwa saka nam ata si.

⁶ Ama Kǝrsti dzǝ zǝr nam aka hamnta dzǝri ata kǝra kǝiyir Hyal. Ba mur dza ndzǝr kǝiyirni ma mur ngǝzi dǝnautsǝnidzi ba tǝmatsǝniyir muri nam tǝ muri ada agula akǝri.

Ɗǝmnya ta Ndzai Kura Mbǝrsa

⁷ Ani, apa tǝ Mambǝl Kartǝ nkǝrɛ: “Asǝna, ma gǝ ngati kuɗahari,

⁸ ta gǝr ta mǝrti ɗǝfa gǝr ɓaɓal apa tǝ gǝri tara 'ya akwa lǝkǝdzǝkur ni, akwa vǝr nkǝrti akwa ntaku ni,

⁹ vui nam tǝ tada gǝri yarɛ tara nkǝrti tǝra ba dar ka wula sǝ nam tǝ Yi 'yati nǝr fá fwaɗǝthlani.

¹⁰ Əni ani sǝ nam tara 'ya tǝ ɗǝfawai sǝwa ala ndzǝr zaman ǝnda, ba Yi ka nkǝrɛ, ‘Kǝlara saka ɗǝfa dar ada pǝranta, ba dar ta zǝndi whalǝrna yarɛ wɛ.’

¹¹ Ani Yi ka mbǝrɛ tǝ ɗǝfu, ‘Dar adi ata saga lǝkwa vui ghǝrbadzǝrna wɛ.’ ”

¹² Hankalamɛ, madar mama yarɛ, apǝri ta ndǝ duku akwa ntsa gǝri ta 'ya aka biku, kura mbǝrsa akwa ɗǝfu nam ada mbalntadzi ta Hyal nam aka mpikɛ.

¹³ Ama ka gǝri dǝnautsǝni kǝma gǝri tatang, har ma tsu “Asǝna,” ani ka ta ɗǝfa duku akwa ntsa gǝri ta 'ya ɓaɓal atar zǝlar biku.

¹⁴ Yar si akuya ka muri ndǝghǝi akwa Kǝrsti ma mur ngǝzi ɓaɓal har ka la dǝnta mbǝrsa nam tǝ yar akǝri ata baditsǝni.

¹⁵ Apa tǝ ndǝ tara nkǝrɛ: “Asǝna, ma gǝri ngati kuɗahari, ta gǝri ta mǝrti ɗǝfa gǝri ɓaɓal apa tǝ gǝri tara 'ya akwa lǝkǝdzǝkur ni.”

¹⁶ Wa yarɛ nam tara ngati ba dar ka 'ya kǝngkur ni? Adi dar dza sanga ndzǝ nam tǝ Musa faba akwa Masar ni wɛ?

¹⁷ Ba ɗǝfari sǝwa nǝr fá fwaɗǝthlani ni ala wa yarɛ? Adi ala ndzǝ nam tara 'ya biku ni, ndzǝ nam tara kurntadzi akwa ntaku ni wɛ?

¹⁸ Ba ala wa yarɛ tǝ Hyal mbǝrɛ apǝri dar adi ata saga lǝkwa ghǝrbadzǝrni wɛ ma adi ala ndzǝ nam kura ada ngandǝrɛ wɛ?

¹⁹ Ani mur wula apǝri dar ta mǝzi ka lǝkwa wɛ, kadǝbar dar adi aka hamnta dzǝri wɛ.