Ndzǝr Ibrahim 12 - Kibaku NT

Hyal ada 'Yi Madarni

¹ Kadǝbar ǝni, tǝng tǝ sakǝida yarɛ nǝr dlamiyir ndzi dlǝti tǝ muri, ngyar ka mur punta kǝlara sǝ nam ada ndǝrghǝl tǝ muri ba biku nam ada ngwatiya tapǝrtsi tǝ muri, ba ngyar ka mur whui aka ɓatǝsu akwa kǝ abarabara nam tǝ ndǝ vi akǝma muri ni.

² Ngyar ka muri vǝti ntsa muri ata Yɛsu, dzǝ nam tara sǝba akǝri ba dzǝ ani ndǝr ghǝiyaba hamnta dzǝrǝr muri, dzǝ nam akuya ka kutsari nam tǝ ndǝ vi akǝmari dzǝ ɓati tǝ ndǝ kukwanta tǝni, dzǝ kǝtǝ sǝr sǝlai ni adi mima wɛ, ba dzǝ ndzai tǝbwar tsisǝma dǝgǝl kuhyikur Hyal.

³ Ɗǝngatamɛ tǝni dzǝ nam tara ɓati dzǝli imaikur tǝ ndzǝr biku 'ya alari ni, ani ka gǝri yɛ ta gǝr ta 'ya kura dǝna ba ndzai kura ufti akwa ɗǝfu.

⁴ Akwa bǝbǝkǝi mpar gǝri ta biku, gǝri ta ɓati kwataku nam tara tsǝbti punta masǝr gǝr wɛ.

⁵ Ba gǝri fwanta labarǝr dǝnautsǝnidzi nam akwa Labar Hyal nam tǝ Hyal tara ndǝrɛ ala gǝri apa madar sǝliyirni: “Zǝrna, ta gǝ ta gyali aka sǝr tsǝlǝr Thlaku, ba ta gǝ ta 'ya ɗǝfu sakatǝ dzǝ ɗǝmnya ala gɛ,

⁶ kadǝbar Thlaku ni dzǝ ada tsǝl su ala ndzǝ nam tǝ dzǝ yiɗɛ, ba dzǝ ada 'ya haka ala kǝlara ndǝ nam tǝ dzǝ dlutsi apa zǝr ni.”

⁷ Ɓatamɛ bwanai nam tǝ gǝri ada sa, kǝtamɛ apǝri tsǝl su. Ani ahani, Hyal ada 'ya ala gǝri apa madar sǝliyirni yarɛ. Akuya zǝr madi nam kura atǝgǝri ada tsǝlɛ alari su?

⁸ Ma Hyal adi ta tsǝl su ala gǝri apa tǝ dzǝ ada tsǝl ala madausiyirni wɛ, tsanti apǝri gǝri adi madausiyirni nam dzǝri wɛ, ama gǝri mǝkulɛ.

⁹ Tǝng tǝ, mur sang aka tada yarɛ nǝr kum aka masi nam tara 'yiti tǝ muri ba muri ada la dar sǝlai kari. Mǝmi hangkur tǝ muri awa kǝlǝngkǝr ala tada muri nǝr mambǝlɛ ka muri ɓui mpikɛ?

¹⁰ Tada muri yarɛ 'yi tǝ muri nǝr saka nkyiɗǝ laka apa tǝ dar ada ɗǝnga apǝri kal-kal; ama Hyal ada 'yi tǝ muri akuya ka ɗakur muri, apǝri ka mur ɓui nǝbwa ani ka muri ndzai apa dza.

¹¹ Kǝlara 'yi nam tǝ ndǝ 'ya ala muri adi sǝɗa ata sakari wɛ, ama ada kalɛ. Ama aghǝla ǝni dzǝ ada si aka ɓui ndzai kalkalkur ba ndzai lapiya ala kǝlara ndzǝ nam tara ɓui tsǝlǝrni.

¹² Kadǝbar ǝni, haɓǝtamɛ tsiya gǝri nam tara ghǝri ba ka gǝr dǝnautsǝni ɓungya gǝri yarɛ nam kura aka dǝna.

¹³ “Dzǝgutamɛ whalɛ lǝlǝpu ala thlǝla gǝri,” ani ka ta kadal ta 'yanta kǝrni, ama ka dzǝ mbǝtǝdzi.

Ɗǝmnya ta Ngǝla Hyal

¹⁴ Hawamɛ sanga dǝna ka gǝri ndzai lapiya aka sanga ndzi ba ka gǝri ndzai kartǝ; kura aka kartǝkur ndǝ adi ata wula Thlaku ni wɛ.

¹⁵ Ka gǝr vǝdzǝ hankal ta waima ta nai ta ɓui ɗakur Hyal ba apǝri ta ɗǝwatukur ta kǝlí akwa ntsa gǝri ka si aka bwanai ka sǝwati ndzǝ hang.

¹⁶ Ka gǝri wula apǝri ta ndǝ duku ta 'ya ndǝr badawi, wala kura hyivǝr Hyal apa Isuwa, nam akuya ka ɗǝvǝr sǝm ka duku dzǝ ɗǝlnta wartar ndzai zǝr nam nggakurni.

¹⁷ Aghǝla ǝnda apa tǝ gǝri zǝndi, sakatǝ dzǝ ada bara sǝm wartar barka ǝni, Hyal ngǝla tǝni. Dzǝ tsu awa ɓui whalɛ ka tubi wɛ, wala tǝ dzǝ bara barka ni aka sǝmwai.

¹⁸ Gǝri ta si adzǝ paya nam kura ndɛ awa mǝzi ka tsǝkwar wɛ, wala adzǝ u'u nam ada mba dzau wɛ, wala vui kuthlǝ nam mǝngǝl pǝlǝk, ba tar yimi,

¹⁹ wala mbǝr tǝmbǝlɛ wala dzǝli kuɗahɛ nam ada ndǝrɛ nam tǝ ndzǝ nam tara ngati dar nkǝrɛ aka dǝna apǝri dar adi ada bara ka dar ngati labar damwa wɛ,

²⁰ kadǝbar dar adi awa mǝzi ɓati sǝ nam tǝ ndǝ tsau ni wɛ: “Ma wala mawi ani tara tsǝkwar paya ni, kǝ ndzai ntsakǝr ka ndǝ tsi tǝni tǝ ɗǝgal paya.”

²¹ Sǝ ǝni tǝ Musa wula ni dzǝ sǝr hyivǝr nam dzau, har tǝ Musa nkǝrɛ, “Yi ada kǝgǝdzi tǝ hyivǝr.”

²² Ama gǝr si adzǝ Payar Sihiyauna, ba akwa mǝlmǝr Hyal nam aka mpikɛ, Ursalima nam atahyal, ba vui nam tǝ tsaɓtsǝnidzǝr kutsari nǝr ndzǝr hyantǝr hyal yarɛ nam hang akwa,

²³ ala ikǝlizǝyar yarkǝma ni nam tǝ thlǝma dar yarɛ rǝbwa-rǝbwa atahyal. Gǝri si adzǝ Hyal, ndǝr 'ya haka ala sanga ndzi, ala mambǝl yarɛ nǝr ndzǝ nam kal-kal nam tǝ Hyal ghǝiyaba tǝ dar,

²⁴ gǝri si adzǝ Yɛsu dzǝ nam akwa dabwa muri kaka Hyal akwa sakar sǝ mbwa-mbwa bǝlin ni, ba adzǝ vui nam tǝ ndǝ ɓutsǝnta masi nam ada nkǝrɛ labar ɗaku ɓwalnta masǝr Habila.

²⁵ Ka gǝr wula apǝri gǝri ta ngǝla ndǝ nam tara ndǝrɛ ni wɛ. Ka gǝr zǝndi apǝri ndzǝ yarɛ ǝnda nam tara ngǝla dlutsi ndǝ nam tara 'ya ala dar ɗǝmnya akwa dunya ni dar ta ɓui mbulbadzi wɛ, mǝnika muri! Mǝmi tǝ muri awa mbulba kǝra muri, ma apǝri mur ngǝla ndɛ nam ada ɗǝmnya ala muri atahyal?

²⁶ Ata saka ǝnda kuɗahari kǝngǝrti dunya, ama kulini dzǝ 'ya alkawal, “Ka pathlu kadamwa Yi ata kǝngǝrti adi ɗiɗi dunya wɛ ama ba atahyal yɛ.”

²⁷ Ndǝrɛ yarni “ka pathlu kadamwa” ada tsanti apǝri ndɛ ata kǝlnta sǝ yarɛ nam ada mǝzi ka kǝngǝri—ǝnda ani, sǝ yarɛ nam tara mǝrtǝdzi—ani ka sǝ nam kura ada kǝngǝri ka dzǝ ndzai.

²⁸ Kadǝbar ǝni, tǝng tǝ muri ada dlu kuhyikur nam kura ada kǝngǝri, ka mur gwaditsǝni, ba ka mur vǝkǝr sǝlai ala Hyal nam tǝ dzǝ ata dlutsi aka sǝlai ba hyivǝr,

²⁹ akuya “Hyalǝr muri dzǝ u'u nam ada mbanta su.”