Ndzǝr Ibrahim 10 - Kibaku NT

Kǝrsti Hamnta Kǝrni Kadukurau akuya Kyifǝnta Biku

¹ Akuya mabari ni dzǝ sangura ɗiɗi nǝr sǝ nam ɗa yarɛ nam ata si—adi dar dza nam dzǝrari wɛ. Akuya ka ǝni adi awa saga 'ya, tǝ sǝr kǝdlǝrsu dzǝli duku tǝ ndɛ ada 'ya tatang kura ngyar-ngyar fá ka fá, awa kuraba ala ndzǝ nam tara si kudzǝghɛ ka vǝkǝr sǝlai wɛ.

² Ma mabari ni awa mǝrti ndzǝ apa ǝnda, dar adi ta ngyar lǝkǝma aka 'ya kǝdlǝrsu wɛ? Akuya ndzǝr vǝkǝr sǝlai yarni dar ata ɓui kǝtsǝntadzi ka duku ɗiɗi, ba dar tsu adi ata nga apa dar tsu aka biku yarni wɛ.

³ Ama sataka yarɛ ǝnda dar sǝr ɗǝngati biku yarɛ ala ndɛ tatang fá,

⁴ kadǝbar adi awa mǝzi ka 'ya tǝ masǝr thla ba kwai awa kǝlnta biku yarɛ wɛ.

⁵ Kadǝbar ǝni, sakatǝ Kǝrsti si akwa dunya, dzǝ nkǝrɛ: “Kǝdlǝrsu ba hamnta su gɛ adi ada bara wɛ, ama dzɛ ani tǝ gǝ ɗǝmhǝi alai;

⁶ gɛ adi ada nga sǝɗar sǝr hamnta yarɛ nǝr mba-mba ba sǝr hamnta yarɛ ka biku wɛ.

⁷ Antǝ Yi nkǝrɛ, ‘Ndza yɛ—rǝbwa-rǝbwa ata kǝrawai akwa kakadu pǝrpǝri— Yi si ka Yi 'ya sǝ nam tǝ gǝ ada bara, ya Hyal.’ ”

⁸ Tangkǝma dzǝ nkǝrɛ, “'Ya kǝdlǝrsu yarɛ ba sǝr hamnta yarɛ, sǝr hamnta yarɛ nǝr mba-mba ba sǝr hamnta yarɛ ka biku gɛ adi ada bara wɛ, wala nga sǝɗar dar wɛ” (wala mabari ni bara ka ndǝ 'ya tǝ dar).

⁹ Antǝ dzǝ ka nkǝrɛ, “Ndza Yɛ, Yi kǝ si ka Yi 'ya sǝ nam tǝ gɛ ada bara.” Dzǝ vi tǝ ngwam nam tangkǝma ni ani ka dzǝ sǝba aka nǝr sǝɗǝkur ni.

¹⁰ Kadǝbar Yɛsu Kǝrsti 'yati sǝ nam tǝ Hyal ada bara ka dzǝ 'ya, muri ɓui ka ndzai kartǝ atar kǝdlǝrsu tǝ dzá Yɛsu Kǝrsti kadukurau.

¹¹ Tatang vǝri kǝlara fǝrist ada hyati ka 'ya kǝthlǝrǝrni; dzǝ ada hamnta sǝr kǝdlǝrsu yarɛ dzǝli duku atakǝr-atakǝr, nam kura awa saga kǝlnta biku yarɛ.

¹² Ama sakatǝ fǝrist ǝni tara hamnta kǝdlǝrsu ka duku akuya ka biku yarɛ, dzǝ ndzai ata bwa tsisǝma Hyal nǝr sanga saka.

¹³ Tǝng ata saka ǝnda dzǝ ada sǝkɛ ka dawarni yarɛ 'ya sǝr vǝ thlǝlɛ alari,

¹⁴ kadǝbar atar kǝdlǝ su ka duku Kǝrsti ghǝiyaba kura kurkuri ndzǝ nam tǝ Hyal ada mǝrti tǝ dar kartǝ.

¹⁵ Mambǝl Kartǝ yɛ sakǝidatsǝni ala yar ata kǝra sǝ ǝni. Tangkǝma dzǝ nkǝrɛ:

¹⁶ “Əni ani sǝ mbwa-mbwa ni nam tǝ Yi ata 'ya kaka dar aghǝla saka ǝnda, ndǝ Thlaku. Yi ata pu mabariyirna yarɛ akwa ɗǝfa dar, ba Yi ata rǝbwai tǝ dar akwa hankala dar.”

¹⁷ Antǝ dzǝ dzakti: “Bikǝr dar yarɛ ba ndzai kura ɓǝla mabariyir dar yarɛ Yi tsu adi ata ɗǝnga kǝra wɛ.”

¹⁸ Ani sakatǝ tǝ ndzǝ yarni ɓui kyifǝnta biku, kǝdlǝrsu akuya ka biku tsu adi wɛ.

Kǝga Akuya ka Ɓati Su

¹⁹ Kadǝbar ǝni, madar mama yarɛ, tǝng tǝ mur aka ɓui kǝr ka lǝkwa Vui nam Kartǝ ta Sang ni atar masǝr Yɛsu,

²⁰ atar whal nam bǝlin ba aka mpikǝ nam tǝ ndǝ mburnta ala muri akwa lapǝlai ni, ǝnda ani, ata whalǝr kumǝr dzari,

²¹ ba tǝng tǝ muri aka nggar fǝrist ata kǝra kǝiyir Hyal,

²² ngyar ka mur si kudzǝghɛ adzǝ Hyal aka ɗǝfu duku akwa mbǝrsa nam kura hyivǝr, aka ɗǝfa muri tǝ ndǝ ɓutsǝba ka kǝtsǝnta tǝ muri ta ndzai aka ɗǝngar ɗǝfu nam aka aibai ba dzá mur kǝtsǝntadzi aka yimi nam lau-lau.

²³ Ngyar ka mur ngǝzi ɓaɓal tǝmatsǝni nam tǝ muri ada nkǝrɛ muri akǝri, akuya ndǝ nam tara 'ya alkawalari dzǝ aka hamnta dzǝri.

²⁴ Ba ngyar ka muri ɗǝnga kǝma muri akwa whal nam tǝ muri awa dǝnautsǝnidzi tǝbwar yiɗǝdzi ba 'ya sǝ nam kal-kal.

²⁵ Ta muri ta ngǝla tsaɓtsǝnidzǝr muri atakǝmaduku apa tǝ ndzǝ laka ada 'ya, ama ngyar ka muri dǝnautsǝni kǝma muri—ka hang apa tǝ gǝri ada wula Vǝrari angwada si.

²⁶ Ma apǝri mur lǝkǝma aka 'ya biku tǝ kǝngkur aghǝla tǝ mur kurtaka ɓui zǝndi dzǝrkur ni, kǝdlǝrsu akuya ka kǝlnta biku yarɛ tsu adi wɛ,

²⁷ ama ɗiɗi hyivǝr haka nam ata si ba mbar u'u nam ata mbanta dawar Hyal yarni.

²⁸ Kǝlara ndǝ nam tara ngǝla mabariyir Musa dzǝ ada nti kura aka kǝtǝrdzi ma ndzǝ sǝɗɛ wala makǝr 'ya sakǝida ata kǝrari.

²⁹ Mǝmi hangkur dzaukur haka tǝ gǝ ada ɗǝnga nam ata ɓui ndǝ nam tara dlaɓu Zǝr Hyal tǝ thlǝlɛ, ndǝ nam tara kǝli ata masi ni nǝr sǝ mbwa-mbwa ni nam tara mǝrti tǝni kura aka aibai, ba ndǝ nam tara ngǝngǝl Mambǝl ni nam tara la muri ɗakurni?

³⁰ Akuya mur zǝndi tǝni dzǝ nam tara nkǝrɛ, “Nkyǝ sǝkur nana; Yi ata nkyinta,” ba kadamwa, “Thlaku ni ata 'ya haka ala ndzǝrni.”

³¹ Dzǝ sǝr hyivǝr tǝ ndǝ awa ɗu akwa tsiya Hyal nam aka mpikɛ.

³² Ɗǝngatamɛ vǝri yarɛ nam kǝma-kǝma nda aghǝla tǝ gǝri dlutsi paraku, sakatǝ gǝri hyati ɓaɓal akwa bǝbǝkǝi nam ngga ata nyá sa bwanai.

³³ Saka yarɛ laka ndǝ ada ngǝngǝl tǝ gǝri ba la gǝri bwanai akwa ntsa ndɛ; akwa saka yar damwa gǝri ada hyati atakǝmaduku kaka ndzǝ nam tǝ ndǝ 'ya ala dar dzǝli sǝ yarni.

³⁴ Gǝri ada tsan kalhur ala ndzǝ nam akwa fǝrsǝna ba gǝri ada yiɗɛ aka kutsari tǝ ndǝ ada mbugǝli kariyir gǝri, akuya gǝr zǝndi apǝri gǝr tǝ kǝr gǝri gǝri aka kari nam ɗaku kura ada hali.

³⁵ Ani ta gǝr ta ɗalnta kura hyivǝrkur gǝri; gǝri ata ɓui wadzǝɓari hang.

³⁶ Ka gǝr lǝkǝma aka ɓati su ani ka sakatǝ gǝri 'yati sǝ nam tǝ Hyal ada bara, gǝri ata ɓui sǝ nam tǝ dzǝ 'ya alkawalari.

³⁷ Akuya akwa saka nkyiɗǝ laka, “Dzǝ nam ata si ni dzǝ ata si kura aka santa saka.

³⁸ Ama ndǝrna nam ada 'ya sǝ kal-kal dzǝ ata ndzai atar hamnta dzǝri. Ba ma dzǝ lǝghǝl tǝ hǝi, ɗǝfawai adi ata 'ya sǝɗa alari wɛ.”

³⁹ Ama mur adi nǝr ndzǝ nam ada lǝghǝl tǝ hǝi ba ada santadzi wɛ, ama mur nǝr ndzǝ nam tara mbǝrsa ba ada ɓui mbatǝdzi.