Ndzǝr Galatiya 3 - Kibaku NT

Hamnta Dzǝri Kǝna Bǝla Mabari

¹ Gǝr ndzǝr Galatiya nam dlang! Wa tara zǝlanta gǝri? Gǝr nam tǝ Yi tsanti ala gǝri Yɛsu Kǝrsti nam kukwakukwa tǝ gǝri ngaba.

² Sǝ duku ɗiɗi tǝ Yi ada bara ka Yi zǝndi adzǝ gǝri: Gǝr dlutsi Mambǝlǝr Hyal akuya nu mabari Musa, kǝna atar mbǝrsa ala ndǝrǝr Hyal nam sǝɗa ni nam tǝ gǝri tara ngati?

³ Asi gǝri dlang apani ya? Tǝ gǝr baditsǝni aka Mambǝlǝr Hyal, antǝ kulini aka halǝr ndǝkur tǝ gǝr ata dǝnta?

⁴ Azarɛ ɓǝrtu tǝ gǝr ɗar bwanai? Ma apani bwaniyir gǝri adi ndzai ɓǝrtu wɛ!

⁵ Hyal nam ada hamnta ala gǝri Mambǝlǝrni, tsuwɛ ada 'ya sǝr ndati akwa ntsa gǝri kadǝbar gǝri ada nu mabari, kǝna kadǝbar gǝri mbǝrsa aka sǝ nam tǝ gǝri tara ngati?

⁶ Wulamɛ Ibrahim “Dzǝ mbǝrsa aka Hyal, Hyal ka rǝbwai ata nya alari apǝri kalkalkur.”

⁷ Ka gǝri ngaba, dzá, apǝri ndzǝ nam aka hamnta dzǝri dar madar Ibrahim.

⁸ Watsi, Labar Hyal kǝ nkǝrɛ apǝri Hyal ata mbulba ndzǝ kura Yahudi atar hamnta dzǝrkur. Antǝ dzǝ ka 'ya labar nam ɗaku ala Ibrahim apǝri, “Atar ngɛ ndɛ ata la barka ala ndzi.”

⁹ Antǝ ndzǝ nam aka hamnta dzǝri dar ani tǝ ndǝ la dar barka atakǝmaduku kaka ndǝr hamnta dzǝrǝr Ibrahim.

¹⁰ Kadǝbar sanga ndǝ nam tara mbǝrsa aka nu mabari barkar dar kǝlkǝli, akuya rǝbwa-rǝbwa akwa Labar Hyal apǝri, “Kǝlara ndǝ nam kura ata 'yati Labar Hyal akwa kakadǝr mabari, dzǝ ndǝ kura barka.”

¹¹ Ata babal, Hyal adi ada mǝrti ndǝ kal-kal akǝmari atar nu mabari wɛ, kadǝbar, “Ndǝ nam kal-kal dzǝ ata ndzai atar hamnta dzǝri.”

¹² Ama mabari tsuwɛ adi ada ndzai atar hamnta dzǝri wɛ, kadǝbar dzǝ nkǝrɛ, “Ndǝ nam ada nu tǝni, atarni antǝ dzǝ ata ndzai.”

¹³ Kǝrsti dlutsi tǝ muri aka kǝlnta barka ǝni nǝr mabari, nam tara 'ya sǝr kǝlnta barka akuya muri, kadǝbar kǝ rǝbwaidzi apǝri, “Kǝlara ndǝ nam tǝ ndǝ hai ata dzá fwɛ, adi aka barka wɛ.”

¹⁴ Ndǝ 'ya ǝni kadǝbar barka nam tǝ ndǝ la Ibrahim tara kǝlghǝl ala ndzǝ kura Yahudi atar Kǝrsti Yɛsu, mur tsuwɛ atar whalǝr hamnta dzǝri ka mur ɓui Mambǝl Kartǝ ni nam tǝ ndǝ 'ya alkawalari.

Mabari aka Alkawalǝr Hyal

¹⁵ Madar mama, ngyar kǝi la gǝri karabu ata sǝ nam tǝ gǝr tsǝli. Ma apǝri ndzǝ sǝɗɛ vi sǝ mbwa-mbwa ata kǝra sǝ laka, tǝ dar gyapu ka yiɗɛ, ndǝr mpǝli adi wɛ, tsuwɛ ndǝr dzakti sǝ ata kǝr adi wɛ.

¹⁶ Alkawal yarni ndǝ nkǝrɛ ala Ibrahim ba ala kulfǝrni. Labar Hyal ni ta nkǝrɛ apǝri, “ba ala kulfǝ yarɛ” wɛ, apa ala ndzǝ hang, ama “ba ala kulfǝr ngɛ,” nam ani ndǝ duku, nam ani Kǝrsti.

¹⁷ Sǝ nam tǝ Yi ada nkǝrɛ ani: Mabari ni, nam tǝ ndǝ tara hamnta tǝng fá kumthlani fwaɗu aka makǝr thlani aghǝla sǝ mbwa-mbwa ni nam tǝ Hyal tara mǝrti aka Ibrahim adi ta ɓǝlnta sǝ mbwa-mbwa nda wɛ, ba ka dzǝ sazǝnta alkawal ni.

¹⁸ Ma apǝri warta ni atar whalǝr mabari tǝ ndǝ ata ɓui, azarɛ, dzǝ adi ata ndzai alkawal wɛ. Ama Hyal la Ibrahim atar alkawal.

¹⁹ Kami, dzá, tǝ ndǝ si aka mabari? Ndǝ dzakti tǝni kadǝbar ka kǝlba biku ata babal, tar vǝr tǝ kulfǝr nyavǝr alkawal ni tara si ala ndǝ nam tǝ ndǝ 'ya alari alkawal. Hyal la mabari ni tsuwɛ atar ndzǝr hyantǝr Hyal, akwa tsiya ndǝ nam akwa dabu, dzǝ dza Musa.

²⁰ Ndǝ nam akwa dabu ni, dzǝ adi ata vuiya albwa duku wɛ; ama Hyal dzǝ duku.

²¹ Kasa mabari kǝ ndzai dawar alkawalǝr Hyal ya? A'a, wala kudzǝghɛ! Kadǝbar ma apǝri mabari ata mǝzi la mpikɛ ala ndzi, antǝ ndǝ ata ɓui kalkalkur ata whalǝr nu mabari.

²² Ama Labar Hyal kǝ nkǝrɛ apǝri kǝlara ndɛ akwi dǝnar biku, ani ka alkawal nam tǝ ndǝ 'ya ala ndzǝ tara hamnta dzǝri akwa Yɛsu Kǝrsti ni, ka dzǝ ndzai ala dar.

²³ Kabutu hamnta dzǝri ala Kǝrsti ta si, ndǝ dǝltǝ tǝ muri akwi mabari, mur dǝldǝli ambwa tar vǝr tǝ hamnta dzǝri tara tsantǝdzi.

²⁴ Azarɛ mabari kǝ ndzai ndǝr pwar tǝ muri nam tara mwari aka muri adzǝ Kǝrsti nam tǝ muri ata ɓui ndzai kalkalkur atar hamnta dzǝri.

²⁵ Kulini tsuwɛ tǝ hamnta dzǝri kǝ si, ndzaiyir muri akwa tsiya pwarɛ nǝr mabari damwa adi wɛ.

Madar Hyal

²⁶ Kadǝbar sanga gǝr madar Hyal, atar hamnta dzǝri ala Kǝrsti Yɛsu.

²⁷ Antǝ kǝlara ndɛ tǝ ndǝ 'ya alari bamtizǝma ka nu Kǝrsti, dzǝ kǝ ndzai apa Kǝrsti.

²⁸ Akuya ǝni ma apǝri ndǝr Yahudi wala ndǝ kura Yahudi, fali wala kambɛ, sal wala mwala, Sang gǝri duku nǝr Kǝrsti Yɛsu.

²⁹ Ma apǝri gǝri nǝr Kǝrsti, azarɛ, gǝr nyavǝr Ibrahim, antǝ gǝr ata dlutsi sǝ tǝ Hyal tara 'ya alkawal alari.