Ndzǝr Galatiya 1 - Kibaku NT

Thlawardzǝr Bulusu

¹ Kakadu ni hyati aka Bulusu, ndǝr hya—adi ndǝr hyar ndǝ wɛ, adi hyati aka ndzǝ laka tsuwɛ, ama aka Yɛsu Kǝrsti, ba Hyal Tada nam tara hyanti tǝni akwa ntǝnti—

² ba sanga madar mama nam tǝ dar atakǝmaduku aka yɛ. Yi ada rǝbwa ala ikǝlizǝya yarɛ nǝr diyir Galatiya, yar ada thlawar tǝ gǝri.

³ Ka Hyal Tada ni ba Kǝrsti Yɛsu Thlakǝr muri la gǝri ɗakur Hyal ba ndzai lapiyakur.

⁴ Dzǝ nam tara hamnta kǝrni akuya bikǝr muri, kadǝbar ka dzǝ mbuli tǝ muri akwa dunya nam kulɗa ni, apa ɗǝngar Hyalǝr muri ani Tada muri.

⁵ Vǝkǝr sǝlai kǝ ndzai alari ba saka madi. Apani.

Ndǝrǝr Hyal nam Sǝɗa Damwa Adi wɛ

⁶ Yi ndatǝdzi kura aka santa sakatǝ gǝri ada ngyar Hyal nam tara kǝga tǝ gǝri atar ɗakur Kǝrsti ba gǝri ada tǝra ka ngyar ndǝrǝr Hyal nam sǝɗa ka nam hawi.

⁷ Dzǝrkurari ndǝrǝr Hyal nam sǝɗa damwa adi wɛ. Ama ata babal ndzǝ laka adai nam ada hyanti hankala ndzi tǝ dar ada bara pali ndǝrǝr nam sǝɗa nǝr Kǝrsti.

⁸ Ama wala yar, wala ndǝr hyantǝr Hyal nam atahyal ata 'ya ala gǝri ndǝrǝr Hyal nam sǝɗa ni pam ta nam tǝ yar tara 'ya ala gǝri, ngyar ka barkarni kǝlntadzi har kura kurkuri!

⁹ Apa tǝ yar kurtaka nkǝrɛ, apani tsuwɛ tǝ Yi ada dzakti gha: Ma kǝlara ndǝ nam ada nkǝr ndǝrɛ ala gǝri ndǝrǝr Hyal nam sǝɗa pam ta nam tǝ gǝri tara dlutsi, ngyar ka barkarni kǝlntadzi har kura kurkuri!

¹⁰ Yi ada bara ka ndzǝ mbǝrsa aka yɛ kǝna, ka Yi mǝrti ɗǝfa Hyal mwapu? Kǝna Yi ada 'ya kǝi mǝrti ɗǝfa ndzi mwapu? Ma apǝri ndzi tǝ Yi ada mǝrti ɗǝfa dar mwapu, Yi adi ata ndzai faliyir Kǝrsti nam ɗa wɛ.

Hyal Kǝga Bulusu ka Ndzai ndǝr Hya

¹¹ Yi ada bara ka gǝri zǝndi madar mama kaka nkwaiyir mama yarɛ, ndǝrǝr Hyal nam sǝɗar tǝ Yi tara nkǝr ndǝrɛ ni adi nǝr ndǝ wɛ.

¹² Kadǝbar adi aka ndǝ tǝ Yi ɓui wɛ, adi ndǝ dza hyipɛ alai tsuwɛ, tar aka tsantǝdzǝr Yɛsu Kǝrsti alai ani tǝ Yi ɓui tǝni.

¹³ Gǝri kǝ ngati dzǝli ndziyirna watsi akwa adiniyir Yahudi, apa tǝ Yi ada la bwanai ala ikǝlizǝyar Hyal aka dzǝrkur, nam tǝ Yi ada bara huzanta tǝni.

¹⁴ Yi ada lǝkǝma-lǝkǝma akwa adiniyir Yahudi ta hanga ndzǝr Yahudi nam kǝlamarna, Yi vu dǝna tǝm-tǝm akwa nuwur sǝr kakár tada yar.

¹⁵ Ama tǝng kura ndǝ ata yaba tǝra, Hyal tsarba ka kǝgati tǝra akwa ɗakurni. Dzǝ ngati sǝɗakur

¹⁶ tsantǝdzǝr Zǝrǝrni alai, kadǝbar kǝi nkǝr labar nam ɗaku ala ndzǝ kura Yahudi. Yi ta 'ya sawari aka ndǝ wɛ.

¹⁷ Tsuwɛ Yi ta mwari akwa Ursalima adzǝ ndzǝ nam tara ndzai ndzǝr hya kǝmata Yi wɛ, Yi mwari akwa diyir Arapu, ani Yi dzakti si akwa mǝlmǝr Damaskus.

¹⁸ Aghǝla fá makǝr tsuwɛ Yi ka tǝra akwa Ursalima kǝi wuti Bitrusu, antǝ Yi pi vǝr kum kapu ntufu adzǝni.

¹⁹ Ama Yi ta wula wala duku akwa mbiya ndzǝr hya yarɛ wɛ, tar Yakubu zǝr angǝra Thlaku.

²⁰ Sǝ ǝni tǝ Yi ada rǝbwa ala gǝri, adi hawi tǝ Yi ada 'ya wɛ, akǝma Hyal tǝ Yi ada gha.

²¹ Aghǝla ǝni tsuwɛ, Yi tǝra akwa diyir Siriya aka nǝr Kilikiya.

²² Ama tsuwɛ ikǝlizǝya yarɛ nǝr Kǝrsti nam akwa diyir Yahudiya, ta zǝndi tǝra kwataku wɛ.

²³ Dar ngati apǝri, Ndǝ nam watsi ada la bwanai ala muri nda, kulini dzǝ ada nkǝr labar nam ɗaku, nam watsi tǝ dzǝ ada huzanta!

²⁴ Ani dar ka hǝm Hyal kadǝbarna.