Ndzǝr Filibi 4 - Kibaku NT

¹ Akuya ǝni, madar mana, gǝri nam tǝ Yi yiɗɛ ba tǝ Yi ada bara ka Yi wula, Yi ada kutsari ba agula aka gǝri, ǝnda ani whal nam tǝ gǝri ata hyati ɓaɓal akwa Thlaku, pazǝrna yarɛ!

Ndǝrǝr Dǝnautsǝnidzi

² Yi kǝgyǝ Iyaudiya ba Yi kǝgyǝ Sintiki ka nya dar 'ya duku akwa Thlaku.

³ A, ba Yi kǝgyǝ tǝ gǝri, ndzǝr kǝthlǝrǝrna nam dzǝri, mbana mɛ mwahyi yarni nam tara 'ya kǝthlǝr dzau aka yɛ akwa nkǝr ndǝrǝr Hyal nam sǝɗa, atakǝmaduku kaka Kǝlamɛnt ba bwadukwa ndzǝr kǝthlǝrǝrna yarɛ, ndzǝ nam tǝ thlǝma dar akwa kakadǝr mpikɛ.

⁴ 'Yamɛ kutsari akwa Thlaku kǝlara saka. Yi ata dzakti nkǝrɛ 'yamɛ kutsari!

⁵ Ngyar ka kanadikur gǝri nam ɗa tsantǝdzi ala sanga ndɛ. Thlaku kǝ 'ya kudzǝghɛ.

⁶ Ta gǝri ta damitsǝnidzi ata kǝra kǝlara su, ama akwa sanga su, atar aduwa ba kǝgyɛ aka Hyal, aka gwaditsǝni, siyamɛ aka kǝgyir gǝri ala Hyal.

⁷ Ba ndzaiyir lapiyakur Hyal, nam tara kwatsǝni sanga ngaba, ata ɓǝla ɗǝfa gǝri ba ɗǝngar gǝri akwa Kǝrsti Yɛsu.

⁸ Ata dǝnta, madar mama, kǝlara sǝ nam dzǝri, kǝlara sǝ nam ɗaku, kǝlara sǝ nam kal-kal, kǝlara sǝ nam kǝtsǝkǝtsi, kǝlara sǝ nam tǝ ndǝ yiɗɛ, kǝlara sǝ nam tara mǝzi hǝmɛ—ma kǝlara sǝ nam ɗawurwur wala nam tara mǝzi hǝmɛ—ɗǝngamɛ ata kǝra sǝ yarni.

⁹ Kǝlara sǝ nam tǝ gǝri tsǝli wala dlutsi wala ngati akai, wala wula akwa yɛ—lǝkǝmamɛ aka 'yari. Ba Hyal nam ada la ndɛ ndzi lapiyakur ata ndzai adzǝ gǝri.

Bulusu Gwaditsǝni ka Sǝr Hamnta tǝ Ndǝ Lari

¹⁰ Yi 'ya kutsari aka dǝna akwa Thlaku apǝri ata dǝnta gǝri dzakti tsanti yiɗǝdzǝr gǝri bǝlin alai. Dzǝri, gǝri damitsǝnidzi, ama gǝri adi aka whalǝr tsanti wɛ.

¹¹ Yi adi ada nkǝrɛ ǝni kadǝbar Yi ada bara su wɛ, akuya Yi kǝ tsǝli ɓati ndzai aka sǝ nam tǝ Yi akǝri.

¹² Yi zǝndi ndzai kura aka su, ba Yi zǝndi ndzai aka su hang. Yi tsǝli asǝra ndzai ka ɓatǝsu akwa kǝlara ndzai, wala Yi ghǝi-ghǝi wala Yi aka mi, wala Yi ada ndzai aka su hang wala Yi adi aka su wɛ.

¹³ Yi ata mǝzi 'ya kǝlara su atarni dzǝ nam tara lai dǝna.

¹⁴ Wala ahani kǝ 'ya ɗaku tǝ gǝri mbana tǝra saka nam tǝ Yi akwa dzǝli bwanai ni.

¹⁵ Tsuwɛ, apa tǝ gǝri ndzǝr Filibi zǝndi, akwa baditsǝniyir vǝr yarɛ nam tǝ gǝri zǝndǝbadzi aka ndǝrǝr Hyal nam sǝɗa, sakatǝ Yi sǝba ka ngyar Makidauniya, ikǝlizǝya wala duku adi wɛ nam tara 'ya hamnta su tǝ Yi dlutsi ɗiɗi gǝri;

¹⁶ akuya wala sakatǝ Yi akwa Tasalaunika, gǝr hyanti alai mbana atakǝr-atakǝr sakatǝ Yi akwa bara.

¹⁷ Adi apǝri Yi ada bara sǝr hamnta wɛ, ama Yi ada bara ka gǝri dlutsi barkar Hyal akuya ka mbana tǝra.

¹⁸ Yi kǝ dlutsi nkyɛ tsǝpu har hang wur-wur; ndǝ si akǝri alai sǝ nam tara mǝzi, kulini nam tǝ Yi dlutsi aka Ipafǝraditus sǝr hamnta nam tǝ gǝri hyanti. Dar ani sǝr hamnta apa sǝ sǝwur nam sǝɗa, kǝdlǝrsu nam tǝ Hyal dlutsi, ba ada panyi ɗǝfari.

¹⁹ Ba Hyalǝrna ata ghǝiyati tǝ gǝri aka sanga sǝ tǝ gǝri ada bara akwa barkar ɓwalkur bǝrbakurni akwa Kǝrsti Yɛsu.

²⁰ Nggakur ala Hyal Tada muri kǝ ndzai har kura awa kurkuri. Apani.

Thlawardzǝr Bulusu ata Dǝnta

²¹ Thlawar sanga ndzǝr Hyal nam akwa Kǝrsti Yɛsu. Madar mama nam vwam kaka yɛ hyanti thlawardzi yarɛ.

²² Sanga ndzǝr Hyal hyanti thlawardzi ala gǝri, apamá ndzǝ nam akwa kǝiyir Kaisar.

²³ Ka ɗakur Thlaku Yɛsu Kǝrsti ndzai adzǝ mambǝlǝr gǝri. Apani.