Ndzǝr Filibi 3 - Kibaku NT

Mbǝrsa adi akwa Kumǝr Dzǝ wɛ

¹ Ata dǝnta, madar mana, ka gǝri 'ya kutsari akwa Thlaku! Adi ata ndzai dzau alai kǝi dzakti rǝbwa ala gǝri sǝ tǝ Yi rǝbwatsǝni ala gǝri kadamwa wɛ, ba ata ndzai sǝr ɓǝla tǝ gǝri.

² Ka gǝr hankal aka kǝya yarnda, ndzǝ nam ada 'ya sǝ kulɗa-kulɗa, ndzǝr thlǝthla kumǝr dzá ndɛ ɓǝrtu.

³ Akuya muri dza ndzǝ nam aka thlakatsa nam dzǝri, mur nam ada vǝkǝr sǝlai aka Mambǝlǝr Hyal, mur nam ada agula akwa Kǝrsti Yɛsu, mur adi ada agula aka sǝ nam tǝ mur 'yati wɛ.

⁴ Wala ahani Yi tǝ kǝrna Yi aka ufti yarɛ akuya dzǝli mbǝrsa akwa kumǝr dzǝ ni. Ma ndǝ damwa ada ɗǝnga dzǝ aka uftiyir mbǝrsa akwa kumǝr dzǝ ni, Yi akǝri hang ta dza:

⁵ ndǝ thlakatsa alai ata vǝr ntsisukur, Yi ndǝr Izǝraila, nǝr nyavǝr Bandzami, ndǝr Ibrahim nǝr ndzǝr Ibrahim; tǝbwar ɓǝla mabari, Yi ndǝr Farisi;

⁶ tǝbwar ha dǝna akwa kǝthlǝr, Yi ndǝr la bwanai ala ikǝlizǝya; tǝbwar ɓǝla mabari Yi adi aka sǝr ngǝl wɛ.

⁷ Ama kǝlara sǝ nam tǝ Yi ada ɗǝnga apǝri ɗǝruwurna kulini Yi ada ɗǝnga apǝri kǝ ndzai su ɓǝrtu akuya ka Kǝrsti.

⁸ Mǝ damwa, Yi kǝtǝ kǝlara su ɓǝrtu akuya ka sǝ nam ɓwaltasang ani zǝndi Kǝrsti Yɛsu Thlakǝrna, akuya ata nyarni tǝ Yi ngyar sanga su. Yi kǝtǝ tǝ dar ngǝzǝkǝi, apǝri ka Yi ɓui Kǝrsti

⁹ ba ka Yi ɓuidzi akwa dza, adi ka kalkalkurna atar ɓǝla mabari wɛ, ama atar hamnta dzǝri akwa Kǝrsti—kalkalkur nam tara si adzǝ Hyal atar hamnta dzǝri.

¹⁰ Yi ada bara ka Yi zǝndi Kǝrsti ba dǝnar hyatǝrni akwa ntǝnti ba ka yar ndǝghǝi bwaniyirni, ka Yi ndzai apa dza akwa ntǝrni,

¹¹ ani ka, akwa whal madǝma ka Yi hyati akwa ntǝnti ka ɓui mpikɛ!

Vu Dǝna Tǝbwar Sǝ tǝ Ndɛ ada Bara

¹² Adi apǝri Yi kurta ɓui sanga su ǝni wɛ, wala Yi kurta tsǝbti sǝ nam tǝ Yi ada bara wɛ, ama Yi ada vu dǝna ka Yi ngǝzi wadzǝɓa sǝ nam tǝ Kǝrsti Yɛsu ngǝzi tǝra kari.

¹³ Madar mama, Yi ta kǝtǝ kǝrna kwataku apǝri Yi kǝ ɓui tǝni wɛ. Ama sǝ duku tǝ Yi ada 'ya: Yi fwanta sǝ nam tara kwatsǝni ba Yi ada ha dǝna ka sǝ nam alǝkǝma,

¹⁴ Yi ada vu dǝna tǝbwar sǝr bara ka Yi sǝnya wadzǝɓa nam tǝ Hyal kǝ kǝga tǝra atahyal kari akwa Kǝrsti Yɛsu.

¹⁵ Sanga muri nam tara kǝlí akwa mambǝlɛ ka mur kǝtǝ hal dzǝli ǝni. Ama ma ndzǝ laka akwa ntsa gǝri aka dzǝli hal damwa pam, Hyal ata tsanǝba ala gǝri ata babal.

¹⁶ Ngyar ka muri ndzai kal-kal apa sǝ nam tǝ muri kurtaka tsǝli ɗiɗi.

¹⁷ Madar mama, kǝltsǝniyamǝdzi kaka ndzǝ damwa akwa nu sǝr tsǝlǝrna, ba ka gǝri hyiptǝ su aka ndzǝ nam ada ndzai akwa whal sǝr tsǝlɛ nam tǝ yar la gǝri.

¹⁸ Akuya, apa tǝ Yi ada gha ala gǝri ka hang kǝma-kǝma ba kulini tǝ Yi ada nkǝrɛ kadamwa har aka sǝmwai, ndzǝ hang ndzai dǝgunmar sǝr tsǝlɛ ata kǝra ntǝr Kǝrsti ata undzum kadlǝkadlɛ.

¹⁹ Dǝntar dar ani santadzi, hyalǝr dar ani kuta dar, ba dar ada agula aka sǝr sǝlai nam tǝ dar 'ya. Ɗǝngar dar ani ata kǝra sǝ yarɛ nǝr dunya.

²⁰ Ama vui ndzaiyir muri ani atahyal. Ba muri ada sǝkɛ ba dzala ka siyir Ndǝr Mbati akwanda, Thlaku Yɛsu Kǝrsti,

²¹ ndǝ nam, atar dǝna nam tǝ dzǝ akǝri tara mǝrti sanga su akwa tsiyari, dzǝ ata pali dzá muri nam kura aka dǝna ni ani ka dar ndzai apa dzari nam ɗa wurwuri.