Ndzǝr Filibi 1 - Kibaku NT

¹ Kakadu ni hyati aka Bulusu ba Timathlawus, madar kǝiyir Kǝrsti Yɛsu, ada hyanti thlawardzi. Yar ada rǝbwa ala sanga ndzǝr Hyal atar hamnta dzǝri akwa Kǝrsti Yɛsu, nam akwa Filibi, sang kaka ndzǝ ngganggar ikǝlizǝya ba ndzǝr mbana.

² Ka Hyal Tada ni ba Kǝrsti Yɛsu Thlakǝr muri la gǝri ɗakur Hyal ba ndzai lapiyakur.

Gwaditsǝni ba Aduwar Bulusu

³ Yi ada usar Hyalǝrna kǝlara saka nam tǝ Yi ɗǝngati tǝ gǝri,

⁴ akwa sanga aduwarna ala sanga gǝri, Yi ada 'ya aduwa aka kutsari kǝlara saka;

⁵ kadǝbar ka kǝltsǝni kǝrǝr gǝri aka yɛ akwa nkǝr labar Hyal vǝr nam tang ka la kulini,

⁶ tsuwɛ Yi mbǝrsa apǝri Hyal nam tara baditsǝni kǝthlǝr ǝni nam ɗaku akwa ntsa gǝri ni ata pwar tǝ gǝri ka vǝdzɛ ala sakatǝ kǝthlǝr ni ata kuri har vǝr tǝ Yɛsu Kǝrsti ata si.

⁷ Kal-kal alai tsuwɛ kǝi ɗǝnga ata kǝra sanga gǝri apani, tǝng tǝ Yi aka gǝri akwa ɗǝfawai; akuya wala Yi akwa tsalala wala tǝ Yi ada mbulɛ ba tsanǝba dzǝrkurǝr ndǝrǝr Hyal nam sǝɗa, sanga gǝri ɓui ɗakur Hyal kaka yɛ.

⁸ Hyal ani sakǝidarna dzǝ zǝndi whal nam tǝ Yi yiɗǝ sanga gǝri akwa dzǝri Yi yiɗǝ tǝ gǝri aka dzǝli yiɗǝdzǝr Kǝrsti Yɛsu.

⁹ Ba ǝni ani aduwarna: apǝri ka yiɗǝdzǝr gǝri ka dzǝ dzagǝi hang ka hang akwa zǝndi su ba ngaba sǝ sang,

¹⁰ ani ka gǝri mǝzi ka ngaba sǝ nam ɗaku ba ka gǝr ndzai kǝtsǝkǝtsi kura aka aibai har ka la vǝrǝr Kǝrsti,

¹¹ ka gǝr ndzai ghǝi-ghǝi aka kalkalkur nam tara si atar Yɛsu Kǝrsti—ka la nggakur ba hǝmɛ ala Hyal.

Mbwa Bulusu Dzakti Lǝkǝma aka Ndǝr Hyal nam Sǝɗa

¹² Kulini Yi ada bara ka gǝr zǝndi, madar mama, apǝri sǝ nam tara ɓui tǝra ni kǝ mbana akwa lǝkǝmar nkǝr ndǝr Hyal nam sǝɗa.

¹³ Ata nyar sǝ ǝni, kǝ ndzai ata babal ala sanga ndzǝr ɓǝla kǝiyir kuhyikur ni ba sanga ndzǝ nam akwa vui damwa apǝri ndǝ mbwai tǝra akwa fǝrsǝna ni kadǝbar Yi ada kǝthlǝrǝr Kǝrsti.

¹⁴ Kadǝbar ka ndziyirna akwa fǝrsǝna ni, hanga madar mama nam akwa Thlaku kǝ dǝnautsǝnidzi nam kulini dar ada mǝzi nkǝr ndǝrǝr Hyal aka dǝna kura hyivǝr.

¹⁵ Dzǝri apǝri ndzi laka ada nkǝrnta ndǝrǝr Kǝrsti kadǝbar sǝlku aka bara mpa ama ndzǝ laka ada 'ya aka ɗǝfu nam ɗaku.

¹⁶ Ndzi ǝni dar ada nkǝrnta ndǝr Hyal nam sǝɗa ni aka yiɗǝdzi akuya dar zǝndi apǝri ndǝ hau tǝra akwa fǝrsǝna akuya tǝ Yi ada mbul ndǝrǝr Hyal nam sǝɗa.

¹⁷ Ama ndzi ǝnda yarni dar ada nkǝrɛ ndǝrɛ ata kǝra Kǝrsti akuya ka yiɗǝr kǝr dar, adi aka dzǝrkur wɛ, barar dar ka dar hyanti bwanai alai saka nam tǝ Yi akwa fǝrsǝna.

¹⁸ Ama awa 'ya mi? Sǝ nam ɗaku ani akwa kǝlara whalɛ, wala ɗǝnga nam hawi yarɛ wala dzǝri, ndǝ nkǝrnta ndǝrǝr Kǝrsti. Ba kadǝbar ǝni Yi ada kutsari. A, ba Yi ata lǝkǝma aka kutsari,

¹⁹ akuya Yi zǝndi apǝri atar aduwar gǝri ba mbanar Mambǝlǝr Yɛsu Kǝrsti, sǝ nam tara 'ya alai ata ndzai sǝr mbuli tǝra.

²⁰ Yi aka tǝmatsǝni ba hau akwa ɗǝfu apǝri Yi adi ata lǝkwa sǝlai wɛ, ama Yi ata ɓui dǝnautsǝnidzi nam tara mǝzi ani ka kulini tsu apa tatang Kǝrsti ata haɓtǝdzi akwa kǝlara sǝ nam tǝ Yi ada 'ya, wala Yi aka mpikɛ wala Yi ntǝnti.

²¹ Akuya alai, ma Yi aka mpikɛ Yi nǝr Kǝrsti ma Yi nti ani ɗǝru.

²² Ma apǝri Yi ata lǝkǝma aka ndzai akwa kumǝr dzɛ ǝni ata ndzai kǝthlǝr nam ata ya munya alai. Ama dzá madi tǝ Yi awa yiɗɛ? Yi ta zǝndi wɛ!

²³ Kǝrawai sǝsǝɗɛ: Yi ada bara ka Yi mwari adzǝ Kǝrsti ka yar ndzai aka dza kadǝbar ǝni kwatsǝni alai sanga su;

²⁴ Ama kǝ ndzai ntsakǝr akuya ka gǝri apǝri ka Yi ndzai akwa kumǝr dzɛ ni.

²⁵ Kadǝbar Yi mbǝrsa aka ǝni, Yi zǝndi apǝri Yi ata ndzai aka mpikɛ, akuya ka Yi lǝkǝma aka mbana tǝ gǝri sang, ka gǝr lǝkǝma ka kǝlí akwa hamnta dzǝrǝr gǝri aka kutsari,

²⁶ ani ka atar ndziyirna kaka gǝri ata ɓakta mǝrti kutsari gǝri akwa Kǝrsti Yɛsu ata 'ya hang ata nyarna.

²⁷ Kǝlara sǝ nam tara 'ya, dzǝkutamɛ ndzaiyir gǝri akwa whal nam tara 'ya kal-kal aka ndǝrǝr Hyal nam sǝɗa nǝr Kǝrsti. Antǝ, wala ma Yi si ka wula tǝ gǝri wala ɗiɗi ngati su ata kǝra gǝri kura Yi akwa ntsa gǝri, Yi ata zǝndi apǝri gǝri ada hyati aka dǝna akwa mambǝlɛ, tǝ gǝri ada gha su apa ndǝ duku akuya ka hamnta dzǝri nǝr ndǝrǝr Hyal nam sǝɗa

²⁸ ta gǝri ta hyivǝr akwa kǝlara whal nam tǝ dawar gǝri ata bara tsi kǝra gǝri. Əni ani parsu ala dar apǝri Hyal ata santa tǝ dar, ama gǝri Hyal ata mbatǝ tǝ gǝri.

²⁹ Akuya ata nyar Kǝrsti, Hyal la gǝri adi ɗiɗi ka gǝri mbǝrsa aka dza wɛ ama tsuwɛ ka gǝr ɗar bwanai akuya dza,

³⁰ tǝng tǝ gǝr ada ɗar dzǝli bwanai nam tǝ gǝri wula tǝ Yi ɗar, ba har kulini gǝr ada ngati bwanai nam tǝ Yi tsu akwa.