Ndzǝr Afisa 5 - Kibaku NT

¹ Akuya ǝni ka gǝr ndzai ndzǝr kǝl sǝr tsǝlɛ aka Hyal, gǝr nam madarni nam tǝ dzǝ yiɗɛ,

² ba ka gǝr ndzai ndzǝr yiɗǝ ndɛ, apa tǝ Kǝrsti tara yiɗǝ tǝ muri, ba dzǝ ka hamnta kǝrni akuya muri apa sǝr hamnta nam ada sǝwur sǝɗa ba kǝdlǝrsu ala Hyal.

³ Ama akwa ntsa gǝri kǝ ndzai ntsakǝr ta ndǝ ta ngati labarǝr badawikur, wala kǝlara dzǝli ghǝmburkur, wala lambwakur, akuya sǝ ǝni yarni ta nkyi aka ndzǝr Hyal wɛ.

⁴ Wala ta gǝri ta hau kǝr gǝri akwa gha sǝr sǝlai, labar dlangdlangkur, wala kǝliyir thlamparkur, akuya adi kal-kal wɛ, ama ata vuiya ǝni ka gǝr usar Hyal.

⁵ Akuya gǝr zǝndi apǝri: ndǝr 'ya badawikur, ghyǝmburkur, wala ndǝr 'ya lambwakur—nam tǝ dar duku aka vǝkǝr sǝlai ala mǝlǝm—adi ata ɓui warta akwa kuhyikur Kǝrsti ba Hyal wɛ.

⁶ Ta ndǝ laka ta zǝlanta gǝri aka labar ɓǝrtu mai, akuya ka dzǝli sǝ ǝni yarni antǝ kǝl ɗǝfǝr Hyal ada si ata kǝra ndzǝ nam kura ada ngandǝrɛ.

⁷ Apani ta gǝr ta mwardzi kaka dar mai.

⁸ Akuya saka laka gǝri ndzai apa kuthlɛ nǝr vǝri, ama kulini nam tǝ gǝri paktsǝnidzi aka Thlaku ni, gǝri kǝ ndzai apa paraku nǝr tsǝtsi ni. Ani ka gǝri ndzai apa madar paraku ni

⁹ (akuya paraku ni ani ada yai sǝ nam aka ɗakur, kalkalkur ba dzǝrkur)

¹⁰ ba ka gǝri tsǝli sǝ nam ada panyi ɗǝfa Thlaku ni.

¹¹ Ka gǝr 'ya pǝɗǝm ta kǝthlǝr kuthlɛ nam ɓǝrtu kura paida, ama ka gǝri sǝba aka dar ata babal.

¹² Akuya sǝr sǝlai ka ndǝ ghaba sǝ nam tǝ ndzǝ nam kura ada ngandǝrɛ ada 'ya akwa ɗǝwa-ɗǝwa.

¹³ Ama kǝlara sǝ nam tara sǝba ata paraku ndǝ ada wula,

¹⁴ akuya paraku ani ada mǝrti kǝlara su tǝ ndǝ ada wula. Əni ani sǝ nam tara 'ya tǝ ndǝ nkǝrɛ: “Hyati, Gǝ nam ata hanyi, hyati akwa ntǝnti, ba Kǝrsti ata mbǝli ata kǝra gɛ.”

¹⁵ Ka gǝri vǝdzǝ hankal, dzá, whal nam tǝ gǝri ata ndzai—adi apa ndǝ kura bǝrkawa wɛ ama apa ndǝ bǝrkawa.

¹⁶ 'Yamɛ kǝthlǝr nam ɓwaltasang akwa kǝlara saka nam tǝ gǝri ɓui, kadǝbar kulɗakur vǝr yarni.

¹⁷ Kadǝbar ǝni ta gǝr ta ndzai dlang mai, ama ka gǝri ngaba sǝ nam tǝ Thlaku ada bara.

¹⁸ Ta gǝri ta ghǝi aka yimǝr inabi mai, nam ada sǝzǝwati ndɛ. Ata vuiya ǝni, ka gǝri ghǝi aka Mambǝl ni.

¹⁹ Ka gǝri ndǝrɛ ala kǝma gǝri aka zabura, har hǝmɛ ba ha yarɛ nǝr mambǝlɛ. Ka gǝri ha aka kuɗahu sǝɗa akwa ɗǝfa gǝri ala Thlaku ni,

²⁰ kǝlara saka ka gǝri hamnta gwaditsǝni ala Hyal Tada akuya kǝlara su, akwa thlǝma Thlakǝr muri Yɛsu Kǝrsti.

²¹ Ka gǝri kǝlǝngkǝr ala kǝma gǝri akuya ka hyivǝr Kǝrsti.

Mwahyi Kaka Salǝr Dar yarɛ

²² Mwahyi, ka gǝri kǝlǝngkǝr ala salǝr gǝri yarɛ apa ala Thlaku ni.

²³ Akuya sal ni ani kǝr ata kǝra mwala apa tǝ Kǝrsti ani kǝr ata kǝra ikǝlizǝya, dzari, nam tǝ dzǝ dza Ndǝr Mbati tǝni.

²⁴ Kulini apa tǝ ikǝlizǝya ada kǝlǝngkǝr ala Kǝrsti, ani tsu apani mwahyi ka dar kǝlǝngkǝr ala salǝr dar yarɛ akwa kǝlara su.

²⁵ Sal yarɛ, ka gǝri yiɗǝ mwahyir gǝri, tsu apa tǝ Kǝrsti yiɗǝ ikǝlizǝya ni ba dzǝ hamnta mpikari akuya ka dza

²⁶ ka mǝrti tǝni ka dzǝ ndzai nǝr Hyal, tǝ dzǝ ada ɗangulnta tǝni tǝ kǝtsɛ aka yimi aka ndǝrǝrni,

²⁷ ba ka dzǝ hamnta tǝni ala kǝrni apa ikǝlizǝya nam ada mbǝli, kura aka mangivar wala kura kultsǝkultsi wala kura kǝlara sǝr ngǝlɛ damwa, ani ka ndǝ vi tǝni alari dzǝ ɗiɗi kura aka aibai.

²⁸ Tsu akwa whal ǝni, sal yarɛ kǝ ndzai kal-kal ka dar yiɗǝ mwahyir dar apa dzá dar. Ndǝ nam tara yiɗǝ mwalarni dzǝ yiɗǝ kǝrni.

²⁹ Kadǝbar, ndɛ adi tara saga ngǝla dzari wɛ, ama dzǝ ada lari sǝr sǝmɛ ba wulhǝ tǝni, tsu apa tǝ Kǝrsti ada wulhǝ ikǝlizǝya ni—

³⁰ akuya muri dza palai yarɛ nǝr dzari.

³¹ “Akuya ka ǝni sal ata ngyar atǝgǝri aka angǝri ba ka dar paktsǝnidzi aka mwalarni, ba ndzǝ sǝɗǝ ni ata ndzai dzǝ duku.”

³² Əni ani dzǝri ɗǝwa-ɗǝwa nam dzǝgam— ama Yi ada ndǝrɛ ata kǝra Kǝrsti ba mwardzǝrni aka ikǝlizǝya ni.

³³ Wala apani, kǝlara ndɛ akwa ntsa gǝri tsuwɛ ntsakǝr ka dzǝ yiɗǝ mwalarni apa tǝ dzǝ yiɗǝ kǝrni, ba mwala ni ntsakǝr ka dzǝ vǝkǝr sǝlai ala salǝrni.