Ndzǝr Afisa 3 - Kibaku NT

Bulusu Ndǝr Nkǝr Ndǝrɛ ala Ndzǝ kura Yahudi yarɛ

¹ Kadǝbar ǝni Yi, Bulusu, Yi ndzai ndǝr fǝrsǝna nǝr Kǝrsti Yɛsu ata nyar gǝri, gǝri ndzǝ kura Yahudi yarɛ.

² Pakat gǝri ngati labar ata kǝra kǝthlǝr ɗakur Hyal nam tǝ ndǝ tara lai akuya ka gǝri,

³ ani apani, kakadǝ ǝni ada gha ala gǝri sǝ nkyiɗǝ laka ata kǝra whal tǝ Hyal tara tsanti alai whalǝr dzǝri ɗǝwaɗǝwarni yarɛ.

⁴ Sakatǝ gǝri ada kǝra kakadu ni, dzá, gǝri ata mǝzi ka ngaba apǝri Yi ngaba sanga sǝr dzǝri ɗǝwa-ɗǝwa ata kǝra Kǝrsti ni,

⁵ nam tǝ akwa zaman yarɛ damwa ndǝ ta tsanti ala ndzǝ wɛ apa kulini nam tǝ ndǝ tsanti atar Mambǝl ni ala ndzǝr hyar Hyal ba nabi Hyal yarɛ.

⁶ Sǝ nam tǝ Hyal ada tsanɛ kulini ni ani ǝni: Hyal kǝthlǝr aka ndǝrǝr Hyal nam sǝɗa ni ka dzǝ la ndzǝ kura Yahudi yarni warta tsu apa nam tǝ ndzǝr Yahudi yarni tara dluwɛ. Dar gyapu ndzai mǝdlǝmǝdlɛ atakǝmaduku kaka ndzǝr Yahudi yarɛ ka mǝrti dzǝ duku, ba dar gyapu ata ɓui su akwa alkawal nam tǝ Hyal hamnta, kadǝbar dar ndzai nǝr Kǝrsti Yɛsu.

⁷ Yi kǝ ndzai zǝr kǝi nǝr ndǝrǝr Hyal nam sǝɗa ǝni atar sǝga nǝr ɗakur Hyal tǝ Hyal tara lai atar kǝthlǝrǝr dǝnarni.

⁸ Wala Yi dza nkyiɗu ta ndǝ nam nkyiɗu ta sang akwa ntsa ndzǝr Hyal, ɗakur ǝni ndǝ kǝ lai: ka Yi nkǝr ndǝrɛ ala ndzǝ kura Yahudi yarɛ hangkur barkar Kǝrsti ni kura ndǝ awa mǝzi nkǝrti,

⁹ ba ka Yi mǝrti ata babal ala kǝlara ndɛ whal kǝthlǝr nǝr dzǝri ɗǝwa-ɗǝwa ǝni, nam tǝ zaman nam tara kwatsǝni dzǝ ɗǝwa-ɗǝwa akwa Hyal, dzǝ nam tara hǝnti sanga sǝ yarɛ.

¹⁰ Sǝ nam tǝ Hyal ada bara kulini ani, atar ikǝlizǝya, ka ndǝ nkǝrnta bǝrkawakur Hyal nam pam-pam hang ni ala ndzǝr kuhyi yarɛ ba ndzǝr wada nam atahyal.

¹¹ Hyal 'yati sǝ ǝni tsu apa tǝ dzǝ tara ɗǝmhǝi tǝni kǝmata hǝnti dunya, atar Kǝrsti Yɛsu Thlakǝr muri.

¹² Atar Kǝrsti ba atar hamnta dzǝri akwa dza muri ata lǝngui adzǝ Hyal aka ɓui kǝr ba aka mbǝrsa.

¹³ Yi ada kǝgyǝ tǝ gǝri, apǝri, ta gǝr ta ngǝla ha dǝna kadǝbar ka bwanai yarɛ nam tǝ Yi ada ɗar akuya ka gǝri, nam ada si ala gǝri aka nggakur.

Aduwa ala Hyal ka Ndzǝr Afisa

¹⁴ Kadǝbar ǝni Yi zǝɗi akǝma Tada ni,

¹⁵ adzǝni tǝ yalǝrni sang nam atahyal ba ata dai tara ɓui thlǝma dar.

¹⁶ Yi ada 'ya aduwa apǝri akwa hangkur nggakurni dzǝ ata dǝnautsǝni tǝ gǝri aka dǝna atar Mambǝlǝrni aivi akwa dzá gǝri,

¹⁷ ani ka Kǝrsti ndzai akwa ɗǝfa gǝri atar hamnta dzǝri. Ba Yi ada 'ya aduwa apǝri gǝri, ka gǝri 'ya ngǝyang ba ka gǝri bǝbǝlntadzi akwa yiɗǝdzi,

¹⁸ ka gǝr ɓui dǝna, atakǝmaduku kaka sanga ndzǝr Hyal, ka gǝr ngaba mǝmi dlaɓukur ba dzǝgamkur ba dzǝgamkurni alǝti ba saɓǝlkur ani yiɗǝdzi nǝr Kǝrsti,

¹⁹ ba ka gǝr zǝndi yiɗǝdzi ǝni nam tara kwatsǝni zǝndǝsu—apǝri ka gǝri ndzai ghǝi-ghǝi aka sanga ghǝighǝikur ni nǝr Hyal.

²⁰ Kulini ala dzǝ nam ada mǝzi ka 'yati ɓwalta sanga sǝ nam tǝ muri kǝgyɛ wala tǝ muri ada ɗǝnga, atar dǝnarni nam ata kǝra kǝthlǝr akwa muri,

²¹ ka nggakur ndzai alari akwa ikǝlizǝya ba akwa Kǝrsti Yɛsu akwa sanga zaman yarɛ, kura kurkuri! Apani.