Ndzǝr Afisa 2 - Kibaku NT

Ndǝ Mǝrti tǝ Muri aka Mpikɛ akwa Kǝrsti

¹ Ba akwa saka nam tara kwatsǝni gǝri apa dzǝ ntǝnti akwa kura ngandǝrɛ ba 'ya biku yarɛ,

² akwa whal nam tǝ gǝri tara ndzai sakatǝ gǝri nuti whal yarɛ nǝr dunya ǝni ba nǝr ndǝr kuhyi nǝr kuhyikur nǝr sambar ni, mambǝl ni nam kulini ada kǝthlǝr akwa ndzǝ nam kura ada ngandǝrǝr Hyal.

³ Sanga muri tsuwɛ mur ndzai akwa ntsa dar ata saka duku, tǝ muri tara 'ya su kulɗa nam tǝ dzá ndɛ ada bara ba nu mau sǝ nam tǝ dzɛ aka ɗǝnga ada bara. Tsu apa sanga laka ndzǝ muri 'ya sǝ nam tara sǝwati ɗǝfa Hyal ba dzǝ angwada hakatsǝni tǝ muri.

⁴ Ama kadǝbar yiɗǝdzǝrni nam ngga ala muri, Hyal, nam aka kǝtǝrdzi hang,

⁵ dzǝ mǝrti tǝ muri aka mpikɛ aka Kǝrsti wala sakatǝ muri ntǝnti akwa biku yarɛ—atar ɗakur tǝ ndǝ mbati tǝ gǝri.

⁶ Ba Hyal ka hyanti tǝ muri kaka Kǝrsti ba dzǝ ka vi tǝ muri kaka dza atahyal akwa paktsǝnidzǝr muri aka Kǝrsti Yɛsu,

⁷ ani ka apǝri akwa zaman yarɛ nam ata si ka dzǝ tsanti hangkur ɗakurni nam kura awa tsǝbadzi, tǝ hankalkurni ala muri nam sǝ duku aka Kǝrsti Yɛsu.

⁸ Akuya atar ɗakur Hyal tǝ gǝri ɓui mbatǝdzi, atar hamnta dzǝri—ba ǝni adi 'yar gǝri wɛ, ama sǝgar Hyal—

⁹ Adi ata nyar kǝlara sǝ nam tǝ muri 'yati wɛ, ani ka ndǝr mǝzi agula adi wɛ.

¹⁰ Akuya muri sǝr kǝthlǝrǝr Hyal, nam tǝ dzǝ hǝnti akwa Kǝrsti Yɛsu ka 'ya kǝthlǝr yarɛ nam ɗaku, nam tǝ Hyal tara ɗǝmhǝi tsu din ala muri ka mur 'ya kǝlara saka.

Ndzai Sǝ Duku akwa Kǝrsti

¹¹ Kadǝbar ǝni, ɗǝngatamɛ apǝri watsi gǝri ndzǝ kura Yahudi yarɛ atar ya ba ndǝ kǝga tǝ gǝri “zumbulǝm” ndzǝ nam ada kǝga kǝr dar apǝri dar “thlakatsa” (nam tǝ ndǝ 'yati ata dzɛ aka tsiya ndzi)—

¹² ɗǝngatamɛ apǝri ata saka ǝnda gǝri ndǝghǝndǝghǝi aka Kǝrsti, gǝri adi akwa ntsa ndzǝr Izǝraila wɛ ba gǝri mǝthlǝɓi yarɛ nǝr sǝ mbwa-mbwa yarɛ nǝr alkawal ni, gǝri adi aka tǝmatsǝni wɛ ba gǝri adi aka Hyal akwa dunya ni wɛ.

¹³ Ama kulini gǝri paktsǝnidzi aka Kǝrsti Yɛsu. Gǝri nam akwa saka nam tara kwatsǝni gǝri pǝɗǝm ta Hyal, ama kulini ndǝ ka si aka gǝri kudzǝghɛ adzǝni atar masǝr Kǝrsti.

¹⁴ Akuya dzǝ tǝ kǝrni ani ndzai lapiyakur muri, dzǝ nam tara mǝrti ndzǝr Yahudi ba ndzǝ kura Yahudi ka ndzai ndzǝ duku ba dzǝ ka whuzanta garuwur dǝgunkur nam tara ndǝghǝba ɓwanga muri,

¹⁵ dzǝ 'yati sǝ ǝni atar tǝ dzǝ whuzanta mabari aka tsawurni yarɛ ba wadarni yarɛ. Dzǝ mǝrti sǝ ǝni akuya ka albwa sǝɗǝ yarni ka dar hǝntǝdzi akwa dza apa ndǝ bǝlin duku, ani ka ndzai lapiya ɓuidzi,

¹⁶ ba dzǝ salautsǝni tǝ dar gyapu ala Hyal akwa dzǝ duku atar undzum kadlǝkadlɛ ni, dzǝ ka tsai dǝgunkur dar.

¹⁷ Dzǝ kǝ si ka nkǝr labarǝr ndzai lapiya ala gǝri nam pǝɗǝm ba ndzai lapiya ala ndzǝ nam kudzǝghɛ.

¹⁸ Akuya atarni tǝ gyapa muri kǝ ɓui whal si adzǝ Tada atar Mambǝl duku.

¹⁹ Ba kadǝbar ǝni, gǝri tsu adi mǝthlǝɓi ba ndzǝ si-si kǝra wɛ, ama gǝri kǝ ndzai apa ndzǝr di duku kaka ndzǝr Hyal ba gǝri ndzǝr kǝiyir Hyal,

²⁰ tǝ ndǝ tsati ata kǝra piyartsǝni nǝr ndzǝr hya ba nabi yarɛ, aka Kǝrsti Yɛsu tǝ kǝrni ani payar kuɗǝma ni.

²¹ Akwa paktsǝnidzi aka dza tǝ sanga tsa kǝi ni ada hyati atakǝmaduku ba dzǝ ka hyati ka ndzai fǝr Hyal akwa Thlaku ni.

²² Ba akwa paktsǝnidzi aka dza gǝri yɛ ndǝ tsati tǝ gǝri atakǝmaduku ka siya ndzai vui ndzai nam tǝ Hyal atar Mǝmbǝlǝrni ada ndzai akwa.