Ndzǝr Afisa 1 - Kibaku NT

Thlawardzi

¹ Kakadu ǝni hyati aka Bulusu, ndǝr hyar Kǝrsti Yɛsu aka barar Hyal. Yi ada rǝbwa ala ndzǝr Hyal nam akwa Afisa, ndzǝ nam aka dzǝrkur akwa Kǝrsti Yɛsu.

² Ka Hyal Tada ba Kǝrsti Yɛsu Thlakǝr muri la gǝri ɗakur Hyal ba ndzai lapiyakur.

Barka yarɛ nǝr Mambǝlɛ akwa Kǝrsti

³ Ka hǝmɛ ndzai ala Hyal ni ba Atǝgǝra Thlakǝr muri Yɛsu Kǝrsti, dzǝ nam tara la muri barka akwa vui yarɛ nam atahyal aka kǝlara barka yarɛ nǝr mambǝlɛ kadǝbar paktsǝnidzǝr muri aka Kǝrsti.

⁴ Akuya Hyal tsarba tǝ muri atar paktsǝnidzǝr muri kaka Kǝrsti kǝmata hǝnɛ dunya ni ka muri ndzai ndzǝrni ba kura aka aibai akǝmari. Akwa yiɗǝdzi

⁵ Hyal kurtaka ɗǝmhǝi ala muri tǝ dzǝ ata kǝtǝ tǝ muri ka muri ndzai madarni atar Yɛsu Kǝrsti, akwa whal nam tǝ dzǝ yiɗɛ ba tǝ dzǝ ada bara—

⁶ akuya ka hǝmɛ nǝr nggakur ɗakurni, nam tǝ dzǝ la muri ɓǝrtu kadǝbar tǝ mur paktsǝnidzi aka Zǝrǝrni nam tǝ dzǝ yiɗɛ.

⁷ Akuya atar masǝr Kǝrsti ni mur ɓui pǝlidzi, ani, bikǝr mur yarɛ kyifǝntadzi. Mǝmi hangkur ɗakur Hyal ni,

⁸ nam tǝ dzǝ pukǝr ala muri aka sanga bǝrkawakur ba ngaba su.

⁹ Ba Hyal tsanti ala muri dzǝri ɗǝwa-ɗǝwa nǝr su tǝ dzǝ bara akwa whalǝrni nam ɗaku tǝ dzǝ ada yiɗɛ, nam tǝ dzǝ tara vi akwa Kǝrsti.

¹⁰ Hyal ata ghǝiyaba sǝ nam tǝ dzǝ ɗǝmhǝi ata sakari nam kal-kal—dzǝ ata paktsǝni sanga sǝ akwa Kǝrsti, sǝ yarɛ nam atahyal ba ata dai.

¹¹ Kadǝbar tǝ mur paktsǝnidzi kaka Kǝrsti, muri dlutsi warta adzǝ Hyal, akuya dzǝ tsarba tǝ muri tsu din, ba dzǝ mǝrti tǝ sanga su 'yatǝdzi akwa whalɛ nam tǝ dzǝ ada bara.

¹² Ani ka apǝri, muri nam tangkǝma aka tǝmá akwa Kǝrsti, ka mur si aka hǝmɛ ba nggakur ala Hyal.

¹³ Ba gǝri tsuwɛ nam tara ɓui ka lǝkwa Kǝrsti sakatǝ gǝri tara ngati ndǝrǝr dzǝrkur ni, ndǝrǝr Hyal nam sǝɗa nǝr mbatǝdzǝr gǝri. Aghǝla tǝ gǝri mbǝrsa, Hyal vǝti ntarni ata gǝri apǝri gǝri nǝni. Əni ani Mambǝl Kartǝ ni nam tǝ dzǝ tara 'ya alkawalari tsu din.

¹⁴ Mambǝl ni ani sǝ nam tǝ Hyal tara vi nam ada tsanti apǝri dzǝ ata la muri warta nam tǝ dzǝ 'ya alkawalari ba apǝri dzǝ ɗǝlba tǝ muri ka muri ndzai ndzǝrni har ka la vǝrǝr pǝlidzi. Dzǝ 'yati ǝni ani ka muri hǝm tǝni ba lar nggakur.

Gwaditsǝni ba Aduwa

¹⁵ Akuya ka ǝni, tǝng tǝ Yi ngati ata kǝra hamnta dzǝrǝr gǝri akwa Thlaku Yɛsu ni ba yiɗǝdzǝr gǝri akuya sanga ndzǝr Hyal,

¹⁶ Yi ta ngyar usar Hyal akuya ka gǝr wɛ, tǝ Yi ada ɗǝngati tǝ gǝri akwa aduwarna yarɛ.

¹⁷ Yi ada lǝkǝma aka kǝgyɛ apǝri Hyal, dzǝ nam ngga Atǝgǝra Thlakǝr muri Yɛsu Kǝrsti, dzǝ ata hau Mambǝlǝrni ka mǝrti tǝ gǝri bǝrkawa ba Mambǝlǝrni nda ata tsanti Hyal ala gǝri ani ka gǝri zǝndi tǝni ɗaku.

¹⁸ Yi ada 'ya aduwa tsuwɛ apǝri ka ɗǝfa gǝri ghǝiyatǝdzi aka parakǝ ani gǝri ata zǝndi tǝmatsǝni ni nam tǝ dzǝ tara kǝga tǝ gǝri kari, bǝrbakurni nǝr wartarni nam ngga akwa ndzǝr Hyal,

¹⁹ ba dǝnarni nam ɓwaltasang akuya muri nam ada mbǝrsa. Dǝna ǝnda apa kǝthlǝrǝr dǝnarni nam ɓwaltasang,

²⁰ nam tǝ dzǝ 'yati akwa Kǝrsti sakatǝ dzǝ hyanti tǝni akwa ntǝnti ba vi tǝni ata bwa tsisǝmari akwa vui yarɛ nam atahyal,

²¹ pǝɗǝm ati ata kǝra sanga ndzǝr kuhyi ba wada, dǝna ba thlakukur, ba kǝlara thlǝmɛ nam tǝ ndǝ ata la ndɛ, adi ɗiɗi akwa zaman ǝni wɛ ama akwa zaman nam ata si yɛ.

²² Ba Hyal ka pui sanga su akwi dza ba Hyal vi tǝni ka dzǝ ndzai kǝr ata kǝra sanga su akuya ka ikǝlizǝya ni,

²³ ba ikǝlizǝya ni ani dzari; dzǝ ndzai ghǝi-ghǝi sang atar Kǝrsti, dzǝ nam ada ghǝiyati sanga su akwa kǝlara vui aka kǝrni.