Mata 9 - Kibaku NT

Yɛsu Mbǝti Ngurngudi

¹ Yɛsu ka lǝkwa sar, dzǝ ka mwari alǝba tǝbwa ǝnda manda ka lǝkwa Kafarnahum, ani diyirni.

² Ndzǝ laka ka siya kǝr alari ngurngudi laka ada pi ata butsi. Sakatǝ Yɛsu wuti hamnta dzǝrǝr dar, “Ta gǝ ɗǝnga, zǝrna; ndǝ kǝ kyifǝnta ala gǝ bikǝr ngɛ.”

³ Antǝ ndzǝ laka akwa ntsa malǝmǝr mabari yarni ka nkǝrɛ ala kǝma dar, “Ndɛ ǝni kǝ rutsǝni Hyal.”

⁴ Ama akuya tǝ Yɛsu tara zǝndi ɗǝngar dar, dzǝ ka nkǝrɛ, “Kami tǝ gǝri ada ɗǝnga nam kulɗa akwa ɗǝfa gǝri?

⁵ Madi ani kǝsǝkai: ka ndǝ nkǝrɛ, ‘Yi kyifǝnta ala gǝ bikǝr yarɛ,’ kǝna ka ndǝ nkǝrɛ, ‘Hyati ka gǝ mwari’?

⁶ Ama ani ka gǝri zǝndi apǝri Zǝr Ndɛ aka wada akwa dunya ka dzǝ kyifǝnta biku yarɛ....” Antǝ dzǝ ka nkǝrɛ ala ngurngudi ni, “Hyati, ka gǝ kǝtǝ butsǝr ngɛ ka gǝ tǝra livi.”

⁷ Ndɛ ni ka hyati ka tǝra alivi.

⁸ Sakatǝ dlamiyir ndzi tara wula ǝni, dar ka ndatǝdzi, ani dar ka hǝm Hyal nam tara la dzǝli wada ni ala ndzi.

Kǝga Mata ni

⁹ Sakatǝ Yɛsu kǝ lǝkǝma ka tǝra akwanda, dzǝ ka wuti ndǝr dlu tsimɛ laka, tǝ thlǝmari Mata, ada ndzai ata vui dlu tsǝmɛ; dzǝ ka nkǝrɛ alari, “Nu tǝra.” Mata ka hyati ka nuti tǝni.

¹⁰ Sakatǝ Yɛsu tara ndzai ka sǝm sǝr sǝmɛ ahar Mata, ndzǝr dlu tsimɛ hang kaka “ndzǝr biku” dar ka si ka sǝm sǝr sǝmɛ aka Yɛsu ba ndzǝr nuwurni atakǝmaduku.

¹¹ Sakatǝ ndzǝr Farisi tara wula ǝni, dar ka yu ndzǝr nuwurni apǝri, “Kami tǝ malǝmǝr gǝri ada sǝmɛ atakǝmaduku kaka ndzǝr dlu tsimɛ ba ndzǝr biku?”

¹² Sakatǝ Yɛsu ngati ǝni, dzǝ ka nkǝrɛ, “Ndzǝ nam kalang adi ada bara ndǝr kuzugu wɛ, ama ndzǝ kura kalang.

¹³ Ama mwaramɛ ka gǝri ghyǝngaba sǝ nam tǝ ndǝr yarɛ ni ada nkǝrɛ: ‘Kǝtǝrdzi ani tǝ Yi ada bara, adi kǝdlǝrsu wɛ.’ Akuya Yi ta si ka Yi kǝga ndzǝ nam kal-kal wɛ, ama ndzǝr biku yarɛ.”

Ndǝ Yu Yɛsu ata Kǝra Asam

¹⁴ Antǝ ndzǝr nuwur Yawhana Ndǝr 'ya Bamtizǝma ka si adzǝ Yɛsu ka yuwɛ tǝni apǝri, “Ka mǝrɛ tǝ yar kaka ndzǝr Farisi ada kǝl asam, ama ndzǝr nuwur ngɛ adi ada kǝl asam wɛ?”

¹⁵ Yɛsu ka sǝnau, “Mǝmi tǝ pazǝr salakambǝl yarɛ awa ndzai aka sǝngǝlɛ tǝ salakambǝl tsu adzǝ dar? Saka ata si nam tǝ ndǝ ata siya kǝlnta salakambǝl ni ka ngyar tǝ dar; antǝ dar ata kǝl asam.

¹⁶ “Ndǝ adi ada mbu lǝkutu halhali aka dina bǝlin wɛ, akuya mbu nam bǝlin ni ata murdzǝba ka thlǝkwanta nam hal-hal ni, antǝ thlǝkwari ata 'ya kulɗa wurwuri.

¹⁷ Tsuwɛ ndǝ adi ada pu yimǝr inabi bǝlin akwa ngǝrkǝr yarɛ nam hal-hal wɛ. Ma ndǝ 'ya, ngǝrkǝr ni ata ndǝlantadzi, antǝ yimǝr inabi ni ata puntadzi ba ngǝrkǝr yarni ata sǝwatǝdzi. A'á, dzǝ pu yimǝr inabi bǝlin akwa ngǝrkǝr yarɛ nam bǝlin, ba gyapa dar ata ɓǝlatǝdzi.”

Nkwa Ntǝnti ba Mwala Kura Kalang

¹⁸ Sakatǝ Yɛsu ada ndǝr ǝni, ndǝ ngga laka si ka zǝɗi akǝmari ka nkǝrɛ, “Nkwarna hata nti kulini. Ama azǝrɛ ka gǝ pukǝr tsai alari dzǝ ata hyati.”

¹⁹ Yɛsu hyati dar ka tǝra, vwam kaka ndzǝr nuwurni yarɛ.

²⁰ Antǝ mwala laka nam tara kǝtǝ fá kum kapu sǝɗɛ tǝ masi ada whui akur dza, dzǝ ka si aghǝla Yɛsu ka tsǝkwar nya lǝkutǝrni.

²¹ Dzǝ gha akwa ɗǝfari, “Ma Yi tsǝkwar wala lǝkutǝrni ɗiɗi Yi ata mbǝtǝdzi.”

²² Yɛsu ka mbaltǝdzi ka wular tǝni, dzǝ ka nkǝrɛ, “Nkwarna, panyi ɗǝfa gǝ, hamnta dzǝrǝr ngɛ kǝ mbǝti tǝngɛ.” Mwala ni ka mbǝtǝdzi tsu ata saka ǝnda.

²³ Sakatǝ Yɛsu kǝ livi akwa kuta kǝiyir ndǝ ngga ni, ka wula ndzi ada mbǝr sala akwa vui tuwa ni kaka dlamiyir ndzǝ nam ata kǝra i'ya nya,

²⁴ dzǝ ka nkǝrɛ, “Tǝramɛ lǝba. Zǝr nkwani ta nti wɛ ama dzǝ ata hanyi.” Ama dar ka ngusi tǝni.

²⁵ Ama sakatǝ ndǝ tara kǝdlǝba dlamiyir ndzi ni abǝla, ani Yɛsu ka lǝmbwa akwa fǝr nam tǝ nkwani akwa ka ngǝzi tsiyari, antǝ nkwani ka hyati.

²⁶ Ndǝrɛ ata kǝra sǝ ǝni ani kǝ kikilntadzi akwa sanga palai ndari.

Yɛsu Mbǝti Ghyang ba Ndǝ Kura ada Ndǝrɛ ni

²⁷ Sakatǝ Yɛsu tǝra ka ngyar vui ǝnda, ghyang sǝɗɛ ka nuti tǝni, dar ada kǝga tǝni aka dǝna, “'Ya kǝtǝrdzi ala yar, Zǝr Dauda!”

²⁸ Sakatǝ Yɛsu kǝ livi, antǝ ghyang yarni ka livi adzǝni, ba dzǝ ka yuwɛ tǝ dar, “Gǝri mbǝrsa apǝri Yi ata mǝzi ka mbǝti tǝ gǝri ya?” Dar ka kalaktsǝni, “A, Thlaku.”

²⁹ Antǝ Yɛsu tsǝkwar ntsa dar ka nkǝrɛ, “Atar hamnta dzǝrǝr gǝri ngyar ka dzǝ ndzai ala gǝri tsu apani”;

³⁰ Ba ntsa dar ka mbugǝrntadzi. Yɛsu ka tsau ala dar aka dǝna apǝri, “Ta gǝri ta gha sǝ ǝni ala waima.”

³¹ Ama dar ka tǝra lǝka kikilnta ndǝr ni ata kǝra Yɛsu akwa sanga palai ndari.

³² Sakatǝ ndzi ni ata kǝra tǝra lǝba, ndǝ laka nam aka mambǝl nam kulɗa kura ada mǝzi ndǝrɛ, ndǝ ka si aka dza ala Yɛsu.

³³ Ama sakatǝ ndǝ kǝdlǝba mambǝl nam kulɗa ni ndǝ ni ka ndǝrɛ. Hangkur ndzi ni ka ndatǝdzi ka nkǝrɛ, “Ndǝ ta saga wuti sǝ apani akwa Izǝraila wɛ.”

³⁴ Ama ndzǝr Farisi nkǝrɛ, “Kuhyir mambǝl yarɛ nam kulɗa ani tara lar dǝnar kǝdlǝba mambǝl yarɛ nam kulɗa ni.”

Ndzǝr Kǝthlǝr ni Yiɗau Laka

³⁵ Yɛsu kǝ mwari akwa sanga mǝlmɛ nam ngga-ngga kaka nam nkyǝnkyiɗu, ada tsǝlɛ akwa fǝr vǝkǝr sǝlaiyir dar, ka nkǝr ndǝrǝr Hyal nam sǝɗa ata kǝra kuhyikur Hyal ba mbǝti kǝlara kasuwa yarɛ ba kura kalangkur yarɛ.

³⁶ Sakatǝ dzǝ tara wula dlamiyir ndzi, dzǝ nga kalhur dar, kadǝbar dar ada ɗar bwanai apa bǝri tǝma kura ndǝr ɓǝla.

³⁷ Antǝ dzǝ ka nkǝrɛ ala ndzǝr nuwurni, “Dlǝ kari fwaku ni hang ama ndzǝr kǝthlǝrari nkyiɗu.

³⁸ Ka gǝri kǝgyǝ Thlakǝr dlǝ kari fwaku ni, kadǝbar ka dzǝ hyanti ndzǝr kǝthlǝr akwa fwakǝrni ni.”