Mata 8 - Kibaku NT

Ndɛ nam Aka Dǝlima ni

¹ Sakatǝ Yɛsu tara sǝgǝl ata ngwama paya, dlamiyir ndzi hang ka nuti tǝni.

² Ndǝ laka nam aka kasuwar dǝlima si ka zǝɗi akǝmari ka nkǝrɛ, “Thlaku, ma gǝ yiɗɛ, gǝ ata mǝzi mǝrtǝ tǝra kǝtsǝkǝtsi.”

³ Yɛsu ka harar tsiyari ba dzǝ ka tsǝkwar ndǝ ni. Dzǝ ka nkǝrɛ, “Yi kǝ yiɗɛ. Ka gǝ ndzai kǝtsǝkǝtsi!” Tǝkǝma dzǝ ka mbǝtǝdzi aka kasuwar dǝlimarni ni.

⁴ Antǝ Yɛsu ka nkǝrɛ alari, “Ta gǝ ta gha ala kǝlara ndɛ. Ama mwari, ka gǝ tsanti kǝrngɛ ala fǝrist ba ka gǝ hamnta sǝga apa tǝ Musa tara tsau, akuya ka dzǝ tsanti ala sanga ndzi apǝri gǝ kǝ mbǝtǝdzi.”

Hamnta Dzǝrǝr Katsalar Saudza Kumthlani ni

⁵ Sakatǝ Yɛsu tara lǝkwa Kafarnahum, katsalar saudza kumthlani nǝr Rauma ka si adzǝni, ka kǝgyǝ tǝni ka mbana.

⁶ Dzǝ ka nkǝrɛ, “Thlaku, zǝr kǝiyirna ada pi aivi masǝkǝn, ba dzǝ akwa bwanai nam dzau.”

⁷ Yɛsu ka nkǝrɛ alari, “Yi ata mwari ka Yi mbǝti tǝni.”

⁸ Katsalar saudza kumthlani ni ka kalaktsǝni alari, “Thlaku, Yi ta mǝzi ka gǝ mwari aharna wɛ. Ama ka gǝ gha ndǝr duku, ani zǝr kǝiyirna ata mbǝtǝdzi.

⁹ Akuya Yi aka kǝrna Yi ndǝ nam akur wada, aka saudza yarɛ akur yɛ. Yi ata gha ala ndǝ ǝni, ‘Mwari,’ ani dzǝ ata mwari; ba ala ndǝ, ‘Azǝrɛ,’ ani dzǝ ata si. Yi ada gha ala zǝr kǝiyirna, ‘Ya ǝni,’ ani dzǝ ada 'ya.”

¹⁰ Sakatǝ Yɛsu tara ngati ǝni, dzǝ kǝ ndatǝdzi ba dzǝ ka nkǝrɛ ala ndzǝ nam ada nu tǝni, “Yi ada gha ala gǝri dzǝri, Yi ta ɓui ndǝ duku akwa Izǝraila aka dzǝli hamnta dzǝri nam ngga apani wɛ.

¹¹ Yi ada gha ala gǝri apǝri, ndzǝ hang ata si tǝbwar sǝtǝr tsǝtsi aka ɗǝyir tsǝtsi, ka dar ndzai ka sǝmɛ atakǝmaduku aka Ibrahim, Isaku ba Yakubu akwa kuhyikur nam atahyal.

¹² Ama ndzǝr Izǝraila, nam dar dza ndzǝr kuhyikur ndǝ ta puba tǝ dar abǝla, akwa kuthlɛ, vui nam tǝ dar ata tuwa aka ɗi hyir.”

¹³ Antǝ Yɛsu ka nkǝrɛ ala katsalar mpa ni, “Mwari! Antǝ sǝ nam tǝ gǝ kǝ hamnta dzǝri akǝri ni, ka dzǝ ndzai ala gǝ tsu apani,” Apani tsu ata saka nda antǝ zǝr kǝiyir katsalar saudza kumthlani ni tara mbǝtǝdzi.

Yɛsu Mbǝti Ndzǝ Hang

¹⁴ Sakatǝ Yɛsu tara mwari aivi ahar Bitrusu dzǝ ka ɓui angǝra mwalar Bitrusu ada pi aka dzǝkdzǝku.

¹⁵ Dzǝ ka tsǝkwar tsiyari ani dzǝkdzǝku ni ka ngyar tǝni, ba dzǝ ka hyati ka baditsǝni ɗǝmhǝi alari sǝr sǝmɛ.

¹⁶ Sakatǝ tǝhaku 'ya, ndzǝ hang nam aka mambǝl yarɛ nam kulɗa tǝ ndzi si akǝri alari, ani dzǝ ka kǝdlǝba mambǝl nam kulɗa yarni aka ndǝrɛ ba dzǝ ka mbǝti sanga ndzǝ nam kura kalang.

¹⁷ Əni ka ndǝ ghǝiyaba sǝ nam tǝ nabi Isaya tara nkǝrɛ, “Dzǝ kǝtǝ bwaniyir muri, ba dzǝ kǝtǝ kasuwar muri.”

Bwanai nam akwa Nu Yɛsu ni

¹⁸ Sakatǝ Yɛsu tara wula dlamiyir ndzi tara dlǝti tǝni, dzǝ ka tsau ka ndǝ fǝlba tǝbwar palai bwa nda manda.

¹⁹ Antǝ malǝmǝr mabari laka ka si ka nkǝrɛ alari, “Malǝm, Yi ata nu tǝngɛ kǝlara vui nam tǝ gǝ ata mwari akwa.”

²⁰ Yɛsu ka kalaktsǝni alari, “Ufwa yarɛ aka kauwur dar, ika yarɛ aka kǝiyir dar, ama Zǝr Ndɛ adi aka vui nam tǝ dzǝ awa pi ka ghǝrbadzi ati wɛ.”

²¹ Ndǝ laka akwa ntsa ndzǝr nuwurni ka nkǝrɛ alari, “Thlaku, tangkǝma ngyar ka Yi mwari lǝka harnta bana kwataku.”

²² Ama Yɛsu gha alari, “Nu tǝra, ngyar ka ndzi ntǝnti ka dar harnta ndzi ntǝntǝr dar.”

Yɛsu Hyantani Sambar

²³ Antǝ Yɛsu ka lǝkwa sar ba ndzǝr nuwurni ka nuti tǝni.

²⁴ Kura aka zǝndi, ndza sambar ka hyati ata manda ni ani yimi kǝ baditsǝni mbiya sar ni ama Yɛsu ada hanyi.

²⁵ Ndzǝr nuwurni ka mwar hyanti tǝni ka gha, “Thlaku, mbati tǝ muri; muri angwa ada ntsǝghǝldzi!”

²⁶ Dzǝ kalaktsǝni, “Gǝri nam aka mbǝrsa nam nkyiɗu, kami tǝ gǝri ada hyivǝr?” Antǝ dzǝ ka hyati ka ntsǝhati sambar ba takur yimi ni apǝri ka dar ndzai kǝtsik, antǝ dar ka ndzai kǝɗǝk.

²⁷ Ndzi ka ndatǝdzi ka yuwɛ, “Dzǝli ndǝr mi ahani? Wala sambar ba takur yimi ada ngandǝrɛ alari!”

Mbǝtǝdzǝr Ndzǝ Sǝɗɛ nam aka Mambǝl nam Kulɗa yarni

²⁸ Sakatǝ Yɛsu tara si tǝbwar palai damwa akwa diyir Gadarina, ndzǝ sǝɗɛ aka mambǝl nam kulɗa tara sǝba akwa ntsa kulɛ ka ɓui tǝni, dar dzau aka dǝna kura ndǝ awa mǝzi nu whal ndari.

²⁹ Dar ndǝri lǝlɛ, “Mi tǝ gǝ ada bara aka yar, Zǝr Hyal? Gɛ kǝ si akuya ka gǝ la yar bwanai kǝma ta sakari ta 'ya ya?”

³⁰ Kudzǝghɛ aka vui ǝnda antǝ bǝriyir gadu yarɛ adai hang nam ada ɓǝla akwanda.

³¹ Mambǝl yarɛ nam kulɗa ni ka kǝgyǝ Yɛsu, “Ma gǝ kǝdlǝba tǝ yar, ka gǝ hyanti tǝ yar lǝkwa bǝriyir gadu yarɛ ni.”

³² Yɛsu ka nkǝrɛ ala dar, “Mwaramɛ!” Ani dar ka sǝba ka tǝra lǝkwa dzá gadu yarni, ba sanga bǝri gadu yarɛ ni ka whui alǝghǝl ata vui nam saratu ka pughǝldzi akwa manda dar ka kurntadzi akwa yimi.

³³ Ndzǝr ɓǝla gadu yarɛ ni ka whuiya livi akwa kuta dai ka mwara gha sanga ndǝr ni, aka sǝ nam tara 'ya ala ndzǝ nam aka mambǝl yarɛ nam kulɗa ni.

³⁴ Antǝ sanga ndzǝr kuta dai ni ka sǝba ka thla kǝma Yɛsu; sakatǝ dar wula tǝni, dar ka kǝgyǝ tǝni ka dzǝ ngyar diyir dar.