Mata 5 - Kibaku NT

Nkǝr Ndǝrǝr Yɛsu ati ata Kǝra Gar

¹ Sakatǝ Yɛsu tara wula ndzǝ hang, dzǝ ka lǝti ata ngwama paya dzǝ ka ndzai. Antǝ ndzǝr nuwurni ka sǝti adzǝni,

² ba dzǝ ka baditsǝni hyipɛ ala dar ka nkǝrɛ:

³ “Kutsari aka ndzǝ nam tara zǝndi kǝtikǝtikur dar akwa mambǝlɛ, akuya kuhyikur Hyal nǝdar.

⁴ Kutsari ala ndzǝ nam ada sǝngǝlɛ, akuya ndǝ ata siya sǝkǝti ɗǝfa dar.

⁵ Kutsari aka ndzǝ nam kǝlam, akuya dar ani ata siya fa wartar dunya.

⁶ Kutsari aka ndzǝ nam ada nga mi aka thlǝlai akuya ka kalkalkur, akuya ndǝ ata siya ghǝiyati tǝ dar.

⁷ Kutsari aka ndzǝ nam aka kǝtǝrdzǝkur, akuya ndǝ ata tsanti ala dar kǝtǝrdzi.

⁸ Kutsari aka ndzǝ nam aka ɗǝfu kǝtsǝkǝtsi, akuya dar ata wula Hyal.

⁹ Kutsari aka ndzǝ nam ada si aka ndzaiyir lapiyakur akuya ka tǝ ndǝ ata ká tǝ dar madar Hyal.

¹⁰ Kutsari aka ndzǝ nam tǝ ndǝ ada 'ya ala dar kulɗakur kadǝbar ka kalkalkur, akuya kuhyikur nam atahyal nǝdar.

¹¹ “Kutsari aka gǝri sakatǝ ndzǝ ada ngǝngǝl tǝ gǝri, ba tsan bwanai ala gǝri kadǝbar yɛ.

¹² Ka gǝr ndzai aka kutsari ba ɗǝfu sǝɗa, akuya wadzǝɓar gǝri adai atahyal, akuya tsu apani tǝ dar tara tsan bwanai ala nabi yarɛ nam tara si akǝma ta gǝri.

Kagǝla ba Paraku

¹³ “Gǝr dza kagǝla ala dunya, ama ma sǝɗakur kagǝla ni kǝ tsabntadzi, mǝmi tǝ dzǝ awa 'ya sǝɗa kadamwa? Dzǝ adi aka paida kǝra wɛ, tar ka ndǝ punta tǝni ka ndzǝ dlǝdlaɓunta aka thlǝlɛ.

¹⁴ “Gǝr dza parakǝr dunya ni. Mǝlmɛ nam ati ata kǝra gar adi ata mǝzi ɗǝwardzi wɛ.

¹⁵ Tsuwɛ ndǝ adi ada ngyu u'u akwa pitǝla ka mbui akur kugwa wɛ; ama dzǝ ata hai ata sǝr ha tǝni, akuya ka dzǝ mbǝli ala sanga ndzǝ nam akwa kuta kǝiyari.

¹⁶ Tsu akwa ǝni ngyar ka parakǝr gǝri mbǝli akǝma ndzi, nam tǝ dar ata wula sǝr 'yar gǝri yarɛ nam ɗaku ka dar hǝm Tada gǝri nam atahyal.

Ghǝiyabadzǝr Mabari ni

¹⁷ “Ta gǝri ta ɗǝnga apǝri Yi si ka Yi whuzanta Mabari wala nabi yarɛ; Yi ta si ka whuzanta tǝ dar wɛ ama ka Yi ghǝiyaba tǝ dar.

¹⁸ Yi ada gha ala gǝri dzǝri, tar atahyal aka aghǝli kwatsǝni, tǝ rǝbwa nkyiɗǝ laka wala ntǝɗak nǝr rǝbwa laka, nam awa ɗǝntadzi akwa mabari ni wɛ tar ma kǝlara su ghǝiyabadzi.

¹⁹ Kǝlara ndǝ nam tara ɓǝlnta duku nkyiɗu akwa ntsa tsau yarni ba hyipɛ ala ndzǝ damwa yarɛ ka 'ya tsu apani ndǝ ata kǝga tǝni nkyiɗu akwa kuhyikur nam atahyal, ama kǝlara ndǝ nam tara kǝthlǝr akǝri ka hyiptǝ tsau yarni ndǝ ata kǝga tǝ ndǝ ngga akwa kuhyikur nam atahyal.

²⁰ Yi ada gha ala gǝri apǝri tar ma kalkalkur gǝri kwatsǝni nǝr Farisi yarɛ ba nǝr malǝmǝr mabari yarni, dzǝri gǝri adi ata lǝkwa kuhyikur nam atahyal wɛ.

Tsa Ndɛ

²¹ “Gǝr kǝ ngati apǝri ndǝ gha ala ndzǝ tsu din, ‘Apǝri ta gǝri tsa ndɛ, ama kǝlara ndǝ nam tara tsi ndɛ, ndǝ ata 'ya alari haka nam dzau.’

²² Ama Yi ada gha ala gǝri apǝri kǝlara ndǝ nam tǝ ɗǝfari sǝwa ala zǝrangǝri ndǝ ata 'ya alari haka. Kadamwa, kǝlara ndǝ nam tara nkǝrɛ ala zǝrangǝri, ‘Dlang,’ ndǝ ata mwari aka dza akwa vui hakar ndzǝr Yahudi. Ama kǝlara ndǝ nam tara nkǝrɛ, ‘Gǝ dlang!’ dzǝ ata lǝkwa u'u kura kuri.

²³ “Kadǝbar ǝni, ma gǝ angwa hamnta sǝgar ngɛ ata muɓwɛ ba gǝ ka ɗǝngati sǝ laka akwa ɓwanga gǝri aka zǝrma,

²⁴ ngyar sǝgar ngari akǝma muɓwari. Tangǝlangkǝma ka gǝ mwara dzǝkutamǝdzi aka zǝrma kama gǝ si hamnta sǝgar ngari.

²⁵ “Ma ndǝ laka angwa lǝka bǝrkutsǝni tǝngɛ ka gǝ 'ya bǝtu ka gǝri dzǝkuti tǝng tǝ gǝri tsu akwa whalɛ ma gǝri ata tsǝbti vui haka, ta dzǝ ta mwari aka gɛ ala ndǝr haka. Ndǝr haka ni ata la tǝngɛ ala ndǝ ngga akwa kwatu, ba dzǝ ata ɗalmbwa tǝngɛ akwa fǝrsǝna.

²⁶ Yi ada gha ala gǝ dzǝri, gǝ adi ata sǝba wɛ, tar tǝ gǝ nkyinta sanga sǝ nam ata kǝra gɛ, wala anini adi ata mbi wɛ.

Badawikur

²⁷ “Gǝri kǝ ngati tǝ ndǝ gha, ‘Ta gǝ ta 'ya badawikur.’

²⁸ Ama Yi ada gha ala gǝri apǝri kǝlara ndǝ nam tara wul mwala tǝ dzǝ mauti dzǝ kurtaka 'ya badawikur aka dza akwa ɗǝfari.

²⁹ Ma ntsa gɛ nǝr bwar tsisǝmɛ ata hau tǝngɛ ka gǝ 'ya biku, kwaɗǝba tǝni ka gǝ ɗalnta. Kudzǝ ka gǝ nai ta bwa duku akwa dzá gɛ ta tǝ sanga dzá gɛ awa lǝkwa u'u kura kuri.

³⁰ Ma tsisǝmɛ gɛ ata hau tǝngɛ ka gǝ 'ya biku, dǝlnta tǝni ka gǝ ɗalnta. Kudzǝ ka gǝ nai ta bwa duku akwa dzá gɛ ta tǝ sanga dzá gɛ awa lǝkwa u'u kura kuri.

Ngǝla Mwala

³¹ “Tsuwɛ ndǝ kǝ nkǝrɛ apǝri, ‘Kǝlara ndǝ nam tara ngǝla mwalarni ntsakǝr ka dzǝ lari kakadǝr ngǝla tǝni.’

³² Ama Yi ada gha ala gǝri apǝri kǝlara ndǝ nam tara ngǝla mwalarni, ma adi ata kǝra badawikur wɛ, dzǝ hau tǝni tǝ dzǝ ata ndzai ndǝr badawikur, ba kǝlara ndǝ nam tara kǝtǝ mwala nam tǝ ndǝ ngǝla ni dzǝ 'ya badawikur.

Mbǝrɛ

³³ “Kadamwa, gǝr kǝ ngati tǝ ndǝ nkǝrɛ ala ndzǝ watsi apǝri, ‘Gǝ adi ata mbǝrɛ ata kǝra hawi wɛ, ama ka gǝ 'ya sǝ nam tǝ gǝ kǝl mbǝrɛ ata kǝri ala Thlaku.’

³⁴ Ama Yi ada gha ala gǝri, Ta gǝr ta mbǝr tǝm, wala aka atahyal, akuya dzǝ ani vui ndzaiyir Hyal;

³⁵ wala aka dai, akuya dzǝ ani vui vǝ thlǝlari; wala aka Ursalima, akuya dzǝ ani mǝlmǝr kuhyi nam ngga.

³⁶ Ba ta gǝ ta mbǝrɛ aka kǝra gɛ, akuya gǝ adi ata mǝrti wala sǝsi duku mwapu wala mǝngǝl wɛ.

³⁷ Ama ngyar ka ‘Ar’ gǝri ndzai ‘A,’ ba ‘A'ár,’ gǝri ‘A'á’; kǝlara sǝ nam tara kwatsǝni ǝni hyati aka ndǝ kulɗa ni.

Ntsɛ akuya ka Ntsɛ

³⁸ “Gǝri ngati tǝ ndǝ gha, ‘Ntsɛ ata vuiya ntsɛ, aka hyir ata vuiya hyir.’

³⁹ Ama Yi ada gha ala gǝri, Gǝr adi ata nkyǝ sǝkur ata kǝra ndǝ nam tara 'ya ala gǝri kulɗakur wɛ. Ama ma ndǝ laka kǝ tsa tǝngɛ ata pahyim tsisǝmɛ gǝ, ka gǝ ndalti alari bwa nda yɛ.

⁴⁰ Ma ndǝ laka ada bara bǝrkwɛ tǝngɛ ka dzǝ dlutsi lǝkutǝr ngɛ, ka gǝ ngyar alari wala lǝkutǝr gudzǝbar ngɛ ma.

⁴¹ Ma ndǝ laka ntsakǝr ala gɛ mwarǝr mǝyal pathlu, mwaramɛ aka dza mǝyal sǝɗɛ.

⁴² La ndǝ nam tara kǝgyǝ su aka gɛ, ba ta gǝ ta whui ta ndǝ nam tara bara kimbǝl aka gǝ.

Yiɗɛ Dǝgun yarɛ

⁴³ “Gǝri kǝ ngati tǝ ndǝ gha apǝri, ‘Ka gǝ yiɗǝ ntǝwhulǝr ngɛ ba ka gǝ ngǝla dǝgunmar ngɛ.’

⁴⁴ Ama Yi ada gha ala gǝri: ka gǝri yiɗɛ dǝgunmar gǝri yarɛ ba 'yamɛ aduwa ala ndzǝ nam ada tsan bwanai ala gǝri,

⁴⁵ akuya ka gǝri ndzai madar Tada gǝri nam atahyal. Dzǝ ada hau tsǝtsǝr ni ka dzǝ mbǝli ata kǝra ndzǝ nam kǝmangar ba ndzǝ nam ɗa, ba dzǝ ada hyanti yimi ata kǝra ndzǝ nam kal-kal ba ndzǝ nam kura kal-kal.

⁴⁶ Ma gǝri ada yiɗɛ ndzǝ nam tara yiɗɛ tǝ gǝri ɗiɗi, wadzǝɓar mi tǝ Hyal ata la gǝri? Wala ndzǝr dlu tsǝm yarni ma adi ada 'ya apani wɛ?

⁴⁷ Ma gǝri ada thlawar madar mamar gǝri ɗiɗi, aka mi tǝ gǝri 'ya nam tara kwatsǝni ndzǝ nam damwa? Wala ndzǝ nam kura ta zǝndi Hyal yarɛ ma dar adi ada 'ya apani wɛ?

⁴⁸ Ka gǝri ndzai kura aka aibai kadǝbar ka apa tǝ Tada gǝri nam atahyal kura aka aibai.”