Mata 4 - Kibaku NT

Satan 'Ya Sǝr Nkǝrti ala Yɛsu

¹ Antǝ Mambǝl ni ka mwari aka Yɛsu akwa ntaku akuya ka Satan nkǝrti tǝni.

² Aghǝla tǝ Yɛsu tara 'ya asam ɓukǝtsi fwaɗǝthlani aka vǝr fwaɗǝthlani, dzǝ ka nga mi.

³ Ndǝr nkǝrti ni ka si adzǝni ka nkǝrɛ, “Ma apǝri gǝ Zǝr Hyal dzá, nkǝrɛ ala paya yarni ka dar 'ya mantsǝkǝl.”

⁴ Yɛsu ka sǝnau, “Rǝbwa-rǝbwa apǝri: ‘Ndǝ adi ata ndzai ka mantsǝkǝl ɗiɗi wɛ, ama atar ndǝrɛ nam ada sǝba akwa nya Hyal.’ ”

⁵ Antǝ Satan ni ka kǝtǝ tǝni ka tǝra aka dza akwa Ursalima Mǝlmǝr Hyal ba dzǝ ka lǝti aka dza ata vui nam dzǝgam ta sang nǝr fǝr Hyal ni,

⁶ ba dzǝ ka nkǝrɛ apǝri, “Ma gǝ Zǝr Hyal, ɗǝghǝl tǝ kǝrngɛ asǝgǝl. Akuya rǝbwa-rǝbwa: “ ‘Dzǝ ata tsau ala ndzǝr hyantǝrni ata kǝra gɛ, ka dar kathlǝti tǝngɛ akwa tsiya dar, ani ka kura paya awa tsa thlǝla gɛ.’ ”

⁷ Yɛsu sǝnau alari, “Rǝbwa-rǝbwa tsuwɛ: ‘Gǝ adi ata hau Hyal Thlakǝr ngɛ akwa nkǝrti wɛ.’ ”

⁸ Satan ka kǝtǝ tǝni kadamwa dzǝ ka tǝra aka dza ata kǝra paya nam dzǝgam ba dzǝ ka tsanti alari sanga kuhyikur yarɛ nǝr dunya ni ba mbǝlǝr dar.

⁹ Dzǝ ka nkǝrɛ, “Əni sang Yi ata la gɛ, ma gǝ zǝɗi ka vǝkǝr sǝlai alai.”

¹⁰ Yɛsu ka nkǝrɛ alari, “Tǝra adzǝra, Satan! Akuya rǝbwa-rǝbwa: ‘Vǝkǝr sǝlai ala Thlaku Hyalǝr ngɛ, ba ka gǝ 'ya kǝthlǝr alari ɗiɗi.’”

¹¹ Antǝ Satan ka ngyar tǝni, ba ndzǝr hyantǝr Hyal si ka 'ya kǝthlǝr alari.

Yɛsu Baditsǝni Nkǝr Ndǝrɛ

¹² Sakatǝ Yɛsu tara ngati apǝri ndǝ hau Yawhana akwa fǝrsǝna, dzǝ ɓiti alǝkwa Galili.

¹³ Dzǝ ngyar Nazarat, dzǝ ka mwara lǝka ndzai akwa Kafarnahum, di nam kudzǝghɛ aka manda, akwa dabwa diyir Zibulun aka Nafǝtali—

¹⁴ Ka ghǝiyaba sǝ nam tǝ ndǝ tara nkǝrɛ atar nabi Isaya:

¹⁵ “Diyir Zibulun ba diyir Nafǝtali, whal nam ada mwari akwa kyagha, ka lǝba ata Urdun, Galili nǝr ndzǝ kura Yahudi—

¹⁶ ndzǝ nam ada ndzai akwa kuthlɛ dar wula paraku nam ngga; ndzǝ nam ada ndzai akwa diyir sanguraiyir nti paraku kǝ sǝba ala dar.”

¹⁷ Akwa saka ǝnda antǝ Yɛsu baditsǝni nkǝr ndǝrɛ, “Tubiyamɛ, akuya kuhyikur nam atahyal kǝ 'ya kudzǝghɛ.”

Kǝga Ndzǝr Nuwɛ nam Tangkǝma

¹⁸ Sakatǝ Yɛsu ata kǝra mwari ata nya mandar Galili, dzǝ ka wula madar mama sǝɗɛ, Simaun (nam tǝ ndǝ ada kǝga tǝni aka Bitrusu) aka zǝrangǝri Andǝrawusu. Dar ata kǝra tamwɛ kulfa akwa kyagha, aka lambusǝr akuya dar ndzǝr fa kulfa.

¹⁹ Yɛsu ka nkǝrɛ, “Azǝramɛ, ka gǝr nu tǝra, Yi ata mǝrti tǝ gǝri ndzǝr fa ndzi.”

²⁰ Tǝkǝma dar ka ngyar lambusǝr dar yarɛ ka nuti tǝni.

²¹ Sakatǝ dzǝ lǝkǝma dzǝ wula madar mama sǝɗɛ, Yakubu zǝr Zabadi aka zǝrangǝri Yawhana. Dar akwa sar kaka tada dar Zabadi, ada dzǝgu lambusǝr dar. Yɛsu ka kǝga tǝ dar,

²² kura aka santa saka dar ngyar sar ni ba tada dar ba dar ka nuti tǝni.

Yɛsu Mbǝti Ndzǝ Kura Kalang ni

²³ Yɛsu kǝ dlǝti sanga diyir Galili, tǝ dzǝ ada hyipɛ ala dar akwa fǝr vǝkǝr sǝlai ala Hyal, tǝ dzǝ ada nkǝr ndǝrǝr Hyal nam sǝɗa nǝr kuhyikur Hyal, ba mbǝti kǝlara kasuwa aka kura kalangkur akwa ntsa ndzi.

²⁴ Labar ata kǝrari ka kikilntadzi akwa sanga diyir Siriya, ba ndzǝ ka si akǝri alari sanga ndzǝ nam kura kalang kaka kasuwa yarɛ, ndzǝ nam ada ɗar bwanai aka kalɛ nam dzau, ndzǝ nam aka mambǝl yarɛ nam kulɗa, ndzǝ nam aka bwali, ba ndzǝ nam masǝkǝn, ba dzǝ ka mbǝti tǝ dar.

²⁵ Dlamiyir ndzǝ hang akwa Galili, Dikapaulis ni, Ursalima, Yahudiya, ba mǝlmɛ nam abǝla tǝbwanda Urdun ka nuti tǝni.