Mata 28 - Kibaku NT

Hyati akwa Ntǝnti ni

¹ Aghǝla vǝr Sǝbdu ni, tǝ daka baditsǝni mpǝli ata vǝr nam tang nǝr magu, Maryamu Magǝdaliya aka Maryamu nam damwa nda ka mwari lǝka wul kul ni.

² Tǝkǝma ndǝ ka 'ya kǝngǝrǝr dai, akuya tǝ ndǝr hyantǝr Hyal nǝr Thlaku ni tara sǝgǝl atahyal, ka mbiyanta paya nam ata nya kulɛ ni ka ndzai ata kǝri.

³ Dludzǝrni ani apa makǝi, ba lǝkutǝrni mwapu tǝyal apa mpurpwawa.

⁴ Ndzǝr sǝkɛ yarni kǝ hyivǝr tǝni aka dǝna nam tǝ dar kǝgǝdzi ka ndzai apa ndzǝ ntǝnti.

⁵ Ndǝr hyantǝr Hyal ni ka nkǝrɛ ala mwahyi yarni, “Ta gǝri ta hyivǝr mai, akuya Yi zǝndi apǝri gǝri ada bara Yɛsu, nam tǝ ndǝ tara kukwanta ni.

⁶ Dzǝ adi akwani wɛ; dzǝ hyati, tsu apa tǝ dzǝ tara nkǝrɛ. Azǝramɛ ka gǝri wula vui nam tǝ ndǝ tara panyi tǝni akwa.

⁷ Antǝ mwaramɛ bǝtǝbǝtu ka gǝri lǝka gha ala ndzǝr nuwurni apǝri, ‘Dzǝ hyati akwa ntǝnti ba dzǝ ata mwari akwa Galili kǝma ta gǝri. Gǝri ata lǝka wula tǝni akwanda.’ Nda Yi kǝ kurta gha ala gǝri.”

⁸ Ani mwahyi yarni ka tǝra ka ngyar kul ni aka dzala, ba hyivǝr tǝ dar ka ghǝi aka kutsari, ba dar ka whuiya lǝka gha ala ndzǝr nuwurni.

⁹ Tǝkǝma Yɛsu ka kǝɓai aka dar. Dzǝ ka nkǝrɛ, “Ka ndzai lapiya ndzai adzǝ gǝri,” Dar ka si adzǝni, ka thlaba thlǝlari ka vǝkǝr sǝlai alari.

¹⁰ Antǝ Yɛsu ka nkǝrɛ ala dar, “Ta gǝri ta hyivǝr mai. Mwaramɛ ka gǝri lǝka gha ala madar mana ka dar mwari akwa Galili; dar ata wula tǝra akwanda.”

Ndzǝr Sǝkɛ ni Si aka Labar

¹¹ Sakatǝ mwahyi yarni ata kǝra mwari, laka ndzǝr sǝkɛ ni ka mwari akwa kuta mǝlmɛ ka nkǝrɛ ala nggar fǝrist yarni sanga sǝ nam tara 'ya.

¹² Sakatǝ nggar fǝrist yarni ka tsaɓtsǝnidzi kaka ndzǝ nam ngga-ngga yarɛ ka ɗǝmhǝ apǝri dar ata la kwapa hang ala saudza yarni,

¹³ dar ka gha ala dar, “Ka gǝri gha ala ndzi apǝri, ‘Ndzǝr nuwurni ani si avǝrvǝri ka hǝlti tǝni sakatǝ yar ata hanyi.’

¹⁴ Ma labar ǝni ɓui gumna ni, yar ata nkǝrɛ alari ka kǝlba tǝ gǝri akwa bwanai.”

¹⁵ Ani saudza yarni ka dlutsi kwapa ni ka 'yati apa tǝ ndǝ tara gha ala dar. Ba ndǝr ǝni ka kikilntadzi akwa ntsa ndzǝr Yahudi har ba asǝna.

Yɛsu Tsantǝdzi ala Ndzǝr Nuwurni

¹⁶ Antǝ ndzǝr nuwurni kumɛ kasutang ni ka tǝra akwa Galili, ata paya vui nam tǝ Yɛsu tara gha ala dar ka dar mwari.

¹⁷ Sakatǝ dar tara wula tǝni, dar ka vǝkǝr sǝlai alari; ama laka akwa ntsa dar tsu aka dzamɛ akwa ɗǝfa dar.

¹⁸ Antǝ Yɛsu ka si adzǝ dar ka nkǝrɛ, “Sanga wada nam atahyal ba akwa dunya ndǝ kǝ hamnta alai.

¹⁹ Kadǝbar ǝni mwaramɛ ka gǝri mǝrti sanga ndzi ka dar ndzai ndzǝr nuwɛ, ka gǝri 'ya bamtizǝma ala dar akwa thlǝma Tada ba nǝr Zǝr ba nǝr Mambǝl Kartǝ,

²⁰ ba ka gǝri hyipɛ ala dar ka dar ngandǝrǝr kǝlara sǝ nam tǝ Yi tsau ala gǝri. Ba dzǝri Yi kaka gǝri tatang, har kurǝr zaman.”