Mata 27 - Kibaku NT

Yahuda Hai Kǝrni

¹ Tsu kula-kula mbǝk, sanga nggar fǝrist yarni ba ndzǝ ngganggar ndzi ka mbwai nya ata kǝra Yɛsu ka dar tsi tǝni.

² Dar ka mbwai tǝni, ka pwar tǝni alǝba ka hamnta tǝni ala Pǝlatus, gumna ni.

³ Sakatǝ Yahuda, ndǝ nam tara ɓǝlai tǝni, tara wula apǝri ndǝ kǝ kurta mbwai ka thlanta tsi Yɛsu, dzǝ ka pali ɗǝngar ni ka ɓakta ɓiti aka kwapa mwapu makǝr thlani ni ala nggar fǝrist yarɛ ba ndzǝ ngga-ngga yarni.

⁴ Dzǝ ka nkǝrɛ, “Yi kǝ 'ya biku, akuya Yi kǝ ɓǝlai ndǝ nam kura aka aibai ka ndǝ tsai.” Ama dar ka nkǝrɛ alari, “Mǝ lambwar yar akwa?” ndǝ dar. “Ənda mbi nǝngɛ.”

⁵ Ani Yahuda ka punta kwapa mwapu ni akwa fǝr Hyal ka ngyar. Antǝ dzǝ ka tǝra alǝba ka hai kǝrni.

⁶ Nggar fǝrist yarni ka ɗǝmnti kwapa mwapu ni ka nkǝrɛ, “Adi kal-kal ala mabari ni ka ndǝ pu ǝni akwa bitǝmbal wɛ, kadǝbar dzǝ kwapar masi.”

⁷ Ani dar ka ɗǝmhǝi ka kǝthlǝr aka kwapa ni ka ɗǝlba babalǝr ndǝr hǝn tughum ka dzǝ ndzai vui har mǝthlǝɓi yarɛ.

⁸ Ani sǝ nam tara 'ya tǝ ndǝ ada kǝga Babalǝr Masi ni har asǝna.

⁹ Antǝ sǝ nam tǝ ndǝ gha atar Irimiya nabi ni kǝ ghǝiyabadzi: “Dar kǝtǝ kwapa mwapu makǝr thlani ni, nam kǝ ndzai lǝbaya ni nam tǝ ndzǝr Izǝraila tara ɗǝlnta tǝni kari,

¹⁰ ba dar kǝthlǝr akǝri ka ɗǝlba babalǝr ndǝr hǝn tǝghum ni apa tǝ Thlaku tara tsau alai.”

Yɛsu Akǝma Pǝlatus

¹¹ Antǝ Yɛsu ka hyati akǝma gumna ni, ba gumna ni ka yu tǝni, “Gǝ dza kuhyir ndzǝr Yahudi ni ya?” Yɛsu nkǝrɛ, “A, apa tǝ gǝ gha.”

¹² Ama sakatǝ nggar fǝrist yarni ba ndzǝ nam ngga-ngga 'ya bǝrkwɛ ata kǝrari, dzǝ ta nkǝr mima wɛ.

¹³ Antǝ Pǝlatus ka yu tǝni, “Gǝ ta ngati sǝ yar nam tǝ dar ada nkǝrɛ ata kǝra gǝ ni wɛ?”

¹⁴ Ama Yɛsu ta kalaktsǝni wɛ, wala ala kǝlara bǝrkwɛ ni wɛ—gumna ni ka ndatǝdzi aka dǝna.

¹⁵ Akwa sakar Wudzǝr Ngǝmba gumna ada sǝnta ndǝr fǝrsǝna pathlu nam tǝ dlamiyir ndzi ni tara bara.

¹⁶ Ata saka ǝnda dar aka ndǝr fǝrsǝna laka pathlu nam tǝ ndzǝ hang tara zǝndi tǝni aka 'ya kulɗakur, tǝ ndǝ ada ka tǝ Barabas.

¹⁷ Ani sakatǝ dlamiyir ndzi ni tara tsaɓtsǝnidzi, Pǝlatus ka yu tǝ dar, “Ndǝ madi tǝ gǝri ada bara ka Yi sǝnta ala gǝri: Barabas kǝna Yɛsu nam tǝ ndǝ ada kǝga Kǝrsti?”

¹⁸ Akuya dzǝ kurta zǝndi apǝri ndzǝr Yahudi kǝ hamnta Yɛsu alari akuya tǝ dar ada sǝlku ata kǝrari.

¹⁹ Sakatǝ Pǝlatus ada ndzai ata sǝr ndzaiyir haka ni, mwalarni ka hyanti alari kuɗahu ǝni, “Ta gǝ ta 'ya kǝlara su ala ndǝ nda kura aka aibai ni, akuya Yi kǝ ɗar bwanai nam dzau asǝna akwa sǝni kadǝbar ni.”

²⁰ Ama nggar fǝrist yarni ba ndzǝ nam ngga-ngga yarɛ ka mbuti ɗǝfa dlamiyir ndzi ni ka dar kǝgyɛ ka Pǝlatus mpǝlnta ala dar Barabas ka ndǝ tsi Yɛsu.

²¹ “Madi akwa ntsa ndzǝ ni sǝɗǝ ni tǝ gǝri ada bara ka Yi sǝnta ala gǝri?” tǝ gumna ni yuwɛ. Dar ka puti lǝlɛ, “Barabas!”

²² Pǝlatus ka nkǝrɛ, “Mǝ tǝ Yi awa 'ya, dzá, aka Yɛsu nam tǝ ndǝ ada kǝga Kǝrsti?” Sanga dar ka puti lǝlɛ, “Ka ndǝ kukwanta tǝni!”

²³ Ama Pǝlatus ka yu, “Kami? Sǝr mi kulɗa tǝ dzǝ tara mǝrti?” Ama dar sang ka haɓǝti kuɗahu aka dǝna, “Ka ndǝ kukwanta tǝni!”

²⁴ Sakatǝ Pǝlatus tara wula apǝri sǝ tǝ dzǝ tsu awa 'yati kǝra adi wɛ, ama tar mpa ani ata hyati, dzǝ ka kǝtsi yimi ka kǝtsǝnta tsiyari akǝma dlamiyir ndzi ni. Dzǝ ka nkǝrɛ, “Yi adi aka aibaiyir masǝr ndǝ ǝni wɛ. Kǝ mbi nǝgǝri!”

²⁵ Sanga ndzǝ ni ka sǝnau, “Ngyar ka masǝrni ndzai ata kǝra yar ba ata kǝra madar yar!”

²⁶ Antǝ dzǝ ka sǝnta Barabas ala dar. Ama dzǝ hau ka ndǝ ngurtsǝni Yɛsu, ba dzǝ hamnta tǝni ka ndǝ kukwanta tǝni.

Saudza yarni Ɓǝl Magular Zǝla Yɛsu ni

²⁷ Antǝ saudzar gumna ni ka mwari aka Yɛsu ata whurkǝiyir gumna ni ka tsaɓtsǝni sanga hangkur saudza yarni ka dlǝti tǝni.

²⁸ Dar ka ngunta lǝkutǝrni ka hadzǝ lǝkutu magza alari,

²⁹ ba dar ka mǝrti aliyapǝr ntsǝkǝɗa ka ntsakur ata kǝrari. Dar ka hau zuwa akwa tsisǝmari ba dar ada zǝɗi akǝmari ka ɓǝl magula alari. Dar ka nkǝrɛ “Bundi, akwa kuta barka ngɛ, kuhyir ndzǝr Yahudi!”

³⁰ Dar ada kifǝ nkyǝli ata dza, ba dar ada dlutsi zuwa nam akwa tsiyari ka tsa tǝni akwa kǝrari atakǝr-atakǝr.

³¹ Aghǝla tǝ dar tara kurai ɓǝl magular zǝla tǝni, dar ka ngunta lǝkutu ni ka hadzɛ alari lǝkutǝrni. Antǝ dar ka tǝra aka dza abǝla akuya ka dar lǝka kukwanta tǝni.

Ndǝ Kukwanta Yɛsu ni

³² Sakatǝ dar ata kǝra lǝba, dar ka kǝɓai aka ndǝr Kairani laka nam tǝ thlǝmari Simaun, ba dar ka ntsakǝr alari ka dzǝ kǝl undzum kadlǝkadlɛ ni.

³³ Dar ka si ata vui nam tǝ ndǝ ada kǝga Gwalgwathla (nam ada nkǝrɛ Vui ni nǝr Hahai Kǝr).

³⁴ Akwanda dar ka la Yɛsu yimǝr inabi ka dzǝ sa, gwazǝgwazi aka sǝ nam ɗǝwatu; ama aghǝla tǝ dzǝ ɗar tǝni, dzǝ ka ngǝla sa.

³⁵ Sakatǝ dar tara kukwanta tǝni, antǝ dar ka ndǝghǝi lǝkutǝrni yarɛ atar dza nǝbwa.

³⁶ Ba dar ada ndzai akwanda ka ɓǝla tǝni.

³⁷ Ati ata kǝrari dar kukwai rǝbwa-rǝbwa sǝ nam tǝ ndǝ bǝrku tǝni kari apǝri: ƏNI ANI YƐSU, KUHYIR NDZƏR YAHUDI NI.

³⁸ Ndǝ ka kukwanta ndzǝr fa whalɛ sǝɗɛ adzǝni, pathlu tǝbwar tsisǝmari ba pathlu tǝbwar tsi aghyari.

³⁹ Ndzǝ nam ada kwatsǝni akwanda ada kǝngǝrnta kǝra dar, ka ngǝngǝl tǝni

⁴⁰ ka gha apǝri, “Gǝ nam ata whuzanta fǝr Hyal ka tsati tǝni akwa vǝr makǝr, mbati kǝrngɛ dzá! Ka gǝ sǝgǝl ata undzum kadlǝkadlɛ ni, ma gǝ dza Zǝr Hyal!”

⁴¹ Tsu akwa whal ǝni nggar fǝrist yarni, malǝmǝr mabari yarni ba ndzǝ ngga-ngga yarɛ ka 'ya magular zǝla tǝni.

⁴² Dar ka nkǝrɛ, “Dzǝ kǝ mbati ndzǝ laka, ama dzǝ ta mǝzi mbati kǝrni wɛ! Dzǝ ani Kuhyir ndzǝr Izǝraila ni! Ngyar ka dzǝ sǝgǝl ata undzum kadlǝkadlɛ ni kulini, ani muri ata mbǝrsa aka dza.

⁴³ Dzǝ mbǝrsa aka Hyal. Ngyar ka Hyal mbuli tǝni ma apǝri dzǝ yiɗǝ tǝni kulini, akuya dzǝ nkǝrɛ, ‘Yi ani Zǝr Hyal.’ ”

⁴⁴ Tsu akwa Whal ǝni ndzǝr fa whal yarni nam tǝ ndǝ tara kukwanta tǝ dar kaka dza ni yɛ dar kǝ ngǝngǝl tǝni.

Ntǝr Yɛsu ni

⁴⁵ Ata saka kum kapu sǝɗɛ tǝ tsǝtsi talangkǝr, kuthlɛ ka mbui dai ni sanga har ka la saka makǝr nǝr tǝhaku.

⁴⁶ Apa saka makǝr Yɛsu ka haɓǝti kuɗahu nam ngga ka nkǝrɛ, “Ɛlaui, Ɛlaui, lama sabaktani?”—nam ada nkǝrɛ, “Hyalǝrna, Hyalǝrna, kami tǝ gǝ ngǝla tǝra?”

⁴⁷ Sakatǝ ndzǝ laka nam ada hyati akwanda tara ngati ǝni, dar ka nkǝrɛ, “Dzǝ ada kǝga Iliya.”

⁴⁸ Tǝkǝma pathlu akwa ntsa dar ka whuiya lǝka kǝtǝ sausau. Dzǝ ka ntsu akwa yimǝr inabi nam mwamwasu, ka barti ata zuwa nam dzǝgam, dzǝ ka haɓǝti ala Yɛsu ka dzǝ sa.

⁴⁹ Mambiya dar nkǝrɛ, “Kulini ngyar tǝni. Ngyar ka muri wula tar Iliya awa si ka dzǝ mbati tǝni.”

⁵⁰ Ba sakatǝ Yɛsu kǝ haɓǝti kuɗahu nam ngga kadamwa, ani mpikari ka sǝba.

⁵¹ Ata saka nda, lapǝlai nam tara ndǝghǝba kuta fǝr nam akwa fǝr Hyal ni ntaudzi aka palai sǝɗɛ baditsǝni ati ka sǝgǝl aghǝli. Dai ni kǝngǝrtǝdzi ba paya yarɛ ka ntǝntantadzi.

⁵² Kul yarɛ ka mbugǝrntadzi ba dzǝ yarɛ nǝr ndzǝr Hyal nam tara nti hang hyati aka mpikɛ.

⁵³ Dar ka sǝba akwa kul yarni, ba aghǝla hyatǝr Yɛsu akwa ntǝnti dar mwari alǝkwa mǝlmǝr Ursalima ba dar tsantǝdzi ala ndzǝ hang.

⁵⁴ Sakatǝ katsalar saudza kumthlani ni ba ndzǝ nam kaka dza nam ada ɓǝla Yɛsu tara wula kǝngǝrǝr dai ni ba sanga sǝ nam tara 'ya, dar kǝ ndatǝdzi aka dǝna, “Dzǝri dzǝ ani Zǝr Hyal!”

⁵⁵ Mwahyi hang akwanda, ada wulɛ tsu pǝɗǝm. Tǝ dar tara nu Yɛsu tsu akwa Galili akuya ka wulhǝ tǝni.

⁵⁶ Akwa ntsa dar ani Maryamu Magǝdaliya, Maryamu angǝra Yakubu ba Yusufu, ba angǝra madar Zabadi ni.

Har Yɛsu ni

⁵⁷ Sakatǝ tǝhaku tara 'ya, ndǝ bǝrba laka tara hyati akwa Armathliya, thlǝmari Yusufu, nam tǝ dzǝ tǝ kǝrni dzǝ ndǝr nuwur Yɛsu.

⁵⁸ Ka mwari adzǝ Pǝlatus, dzǝ ka kǝgyǝ saiyir Yɛsu, ba Pǝlatus ka tsau apǝri ka ndǝ lari.

⁵⁹ Yusufu ka kǝlghǝl sai ni ka baru tǝni akwa bakta nam kǝtsǝkǝtsi,

⁶⁰ ka hau tǝni akwa kulǝrni nam bǝlin nam tǝ dzǝ thlaba akwa paya ni. Dzǝ ka bagǝlti paya nam ngga ka vǝnya ala kulɛ ni ka tǝrarni.

⁶¹ Maryamu Magǝdaliya aka Maryamu nam damwa nda ada ndzai akwanda ata ngwama kul ni.

Ndǝr Sǝkɛ ata Nya kulɛ ni

⁶² Sǝbar arpɛ, nam ani vǝr Sǝbdu, nggar fǝrist yarni kaka ndzǝr Farisi ka mwari adzǝ Pǝlatus.

⁶³ Dar ka nkǝrɛ, “Bundi, yar ɗǝngati apǝri sakatǝ dzǝ tsu ata mpikɛ ndǝr hawi ndari nkǝrɛ, ‘Aghǝla vǝr makǝrkur Yi ata hyati kadamwa.’

⁶⁴ Ani ka gǝ tsau ka ndǝ ɓǝlahǝ kulɛ ni ɗaku har ka la vǝr makǝrkur. Ani ka, ta ndzǝr nuwurni ta si ka hǝlti saiyirni atǝra ka dar gha ala ndzi apǝri dzǝ kǝ hyati akwa ntǝnti. Zǝla ǝni nam ata dǝnta ni ata 'ya dzau ta nam tangkǝma ni.”

⁶⁵ Pǝlatus ka nkǝrɛ, “Ka gǝri fatsi ndzǝr sǝkɛ, mwaramɛ, ka gǝri ɓǝlahǝ kul ni apa tǝ gǝri mǝzi.”

⁶⁶ Ani dar ka tǝra ka lǝka ɓǝlahǝ kul ni atar hyirti paya ni ka pui ndzǝr sǝkɛ.