Mata 24 - Kibaku NT

Par Su nǝr Dǝntar Zaman ni

¹ Yɛsu ka tǝra sǝba akwa fǝr Hyal ni tǝ dzǝ ada tǝrarni sakatǝ ndzǝr nuwurni tara si adzǝni ka si aka hankalari ata kǝra tsǝtsa fǝr Hyal ni.

² Dzǝ ka yuwɛ. “Gǝri ada wula sanga sǝ ǝni yarni? Yi ada gha ala gǝri dzǝri, paya duku akwani adi nam tǝ ndǝ ata ngyar ata kǝra kǝmani wɛ; kǝlara duku ndǝ ata ɗalghǝl tǝni alǝghǝl.”

³ Sakatǝ Yɛsu ada ndzai ata kǝra Payar Zaitun, ndzǝr nuwurni ka si adzǝni ɗǝwa-ɗǝwa. Dar ka nkǝrɛ, “Gha ala yar, nama tǝ sǝ ǝni ata siya 'ya? Ba mi ata ndzai par sǝr siyir ngɛ ba nǝr dǝntar zaman ni?”

⁴ Yɛsu ka sǝnau: “Ka gǝri vǝdzɛ hankal ta kǝlara ndǝ ta zǝlanta tǝ gǝri.

⁵ Akuya ndzǝ hang ata siya si akwa thlǝmawai, ka nkǝrɛ, ‘Yi ani Kǝrsti ni,’ Ba dar ata zǝlanta ndzǝ hang.

⁶ Gǝri ata ngati ata kǝra dlǝ mpa yarɛ ba labar ata kǝra mpa yarɛ ama ta gǝri ta hyivǝr. Dzǝli sǝ yarni kǝ ndzai ntsakǝr ata 'ya, ama dǝntari ta si kwataku wɛ.

⁷ Di ata ɗǝkǝr ata kǝra di, ba kuhyikur ata kǝra kuhyikur. Ndǝ ata 'ya mi yarɛ ba kǝngǝrǝr dai yarɛ ata 'ya akwa vui yarɛ pam-pam.

⁸ Sanga sǝ yarni ani baditsǝniyir kal yarɛ nǝr thlǝ munar ya.

⁹ “Antǝ ndǝ ata siya ngǝti tǝ gǝri ka la gǝri bwanai ba tsi tǝ gǝri, ba sanga di yarɛ ata ngǝla tǝ gǝri kadǝbar yɛ.

¹⁰ Ata saka ǝnda ndzǝ hang ata mbalntadzi ta hamnta dzǝrǝr dar ba dar ata ɓǝlai kǝma dar ka ngǝla kǝma dar,

¹¹ ba nabiyir hawi yarɛ hang ata sǝba ka zǝlanta ndzǝ hang.

¹² Kadǝbar ka kǝmangarkur ata siya dzagǝi, yiɗǝdzǝr ndzǝ hang ata 'ya lang-lang,

¹³ Ama ndǝ nam tara hyati ɓaɓal ka la dǝnta dzǝ ata mbatǝdzi.

¹⁴ Ba ndǝrǝr Hyal nam sǝɗa ǝni nǝr Kuhyikur ni ndǝ ata nkǝrnta akwa sanga dunya apa sakǝida ala sanga di yarɛ, ba dzá dǝntari ata si.

¹⁵ “Ani sakatǝ tǝ gǝri wula ada hyati akwa fǝr Hyal ni ‘sǝr agya ni nam ada si aka whuzanta su,’ nam tǝ nabi Daniyal tara ndǝrɛ ata kǝrni—ngyar ka ndǝr kǝra ni ka dzǝ ngaba—

¹⁶ Antǝ ngyar ka ndzǝ nam akwa Yahudiya whui atǝra akwa paya yarɛ.

¹⁷ Ngyar ta ndǝ nam ati ata kǝra bukar fǝrǝrni ka dzǝ sǝgǝl ka faba kǝlara sǝ nam ambwa akwa fǝrǝrni mai.

¹⁸ Ngyar ta ndǝ nam akwa fwaku ka dzǝ ɓiti asi ka lǝkutǝrni.

¹⁹ Bwasam ala mwahyi nam aka whur ba nam tsu aka madar ata nya u'uwa akwa vǝr yarɛ ǝnda!

²⁰ Ka gǝri 'ya aduwa ta whuiyir gǝri ni ta siya 'ya akwa sakar lang-lang wala vǝr Sǝbdu.

²¹ Akuya dzá bwanai nam ngga ata siya 'ya, nam kura ndǝ ta saga 'ya tǝng baditsǝni dunya ka la kulini—ba ndǝ adi ata saga 'ya tǝni kadamwa wɛ.

²² Ma Hyal ta dǝltsi vǝr yarɛ nda ka 'ya nkusu wɛ, ndǝr ɓui mbatǝdzi adi wɛ, ama akuya ata nyar ndzǝ nam tǝ Hyal tsarba ndǝ mǝrti vǝr yarɛ nda ka 'ya nkusu laka.

²³ Ata saka ǝnda ma kǝlara ndǝ nkǝrɛ ala gǝri, ‘Wulɛ, ani Kǝrsti akwani!’ wala, ‘Anda dza akwanda!’ Ta gǝri ta mbǝrsa akǝri.

²⁴ Akuya ndzǝr hawiyir Kǝrsti yarɛ ba nabiyir hawi yarɛ ata sǝba ka 'ya sǝr ndati yarɛ ba parsu yarɛ nam ngga-ngga ka zǝlanta wala ndzǝ nam tǝ Hyal tsarba—ma apǝri ǝndari awa 'ya.

²⁵ Wulɛ, Yi kǝ kurta tsau ala gǝri tsu aka saka.

²⁶ “Ani ma kǝlara ndǝ nkǝrɛ ala gǝri, ‘Anda dza akwa ntaku,’ ta gǝri ta lǝba; wala, ‘Ani dza akwani, ambwa ni,’ ta gǝri ta mbǝrsa.

²⁷ Akuya apa tǝ makǝi ada hyati tǝbwar gǝdi tǝ ndǝ ada wula ka ɓǝlba tǝbwar putai, ani ahani tǝ Zǝr Ndɛ ata si.

²⁸ Kǝlara vui nam tǝ tsaɗǝngu ati, akwanda tǝ kudǝgkivi yarɛ ata tsaɓtsǝnidzi.

²⁹ “Kura aka santa saka aghǝla bwaniyir vǝr yarɛ ǝnda “ ‘tsǝtsi ni ata siya 'ya kuthlɛ pǝlǝk, ba hya ni adi ata mbǝli kǝra wɛ; tsambiya yarɛ ni nam ati ata pughǝldzi, ba dǝna yarɛ ni nam atahyal ata siya kǝngǝrtǝdzi.’

³⁰ “Ata saka ǝnda Par Zǝr Ndɛ ni ata tsantǝdzi ata dzá hyal, ba sanga ndzǝ nam akwa dunya ata tuwa. Dar ata wula Zǝr Ndɛ ada si akwa dlamba yarɛ ata dzá hyal, aka dǝna ba sǝlai nam ngga.

³¹ Ba dzǝ ata hyanti ndzǝr hyantǝrni aka kuɗahu nam ngga nǝr aligǝta ada kǝga, ba dar ata tsaɓtsǝni ndzǝ nam tsartsarǝrni akwa kuɗǝma yarɛ fwaɗu, baditsǝni ata kǝla dǝntar dunya ka la ǝnda.

³² “Kulini ka gǝri tsǝlɛ sǝr tsǝl ǝni ata fur kanda; sakatǝ thlaliyirni ada punta ba ada ɗǝɗa nam bǝlin, gǝri zǝndi apǝri viya kǝ 'ya kudzǝghɛ.

³³ Tsu apani, sakatǝ gǝri wula sanga sǝ ǝni yarni gǝri zǝndi apǝri dzǝ kǝ 'ya kudzǝghɛ, ngǝngǝɗu anyavǝr.

³⁴ Yi ada gha ala gǝri dzǝri, zaman ǝni adi ata kwatsǝni wɛ tar ma sanga sǝ ǝni yarni 'yatǝdzi.

³⁵ Atahyal aka dai ata kwatsǝni, ama labarǝrna adi ata saga kwatsǝni wɛ.

Vǝr ni ba Saka ni Ndǝ Ta Zǝndi wɛ

³⁶ “Ndɛ adai nam tara zǝndi sǝ ata kǝra vǝri wala saka ni wɛ, wala ndzǝr hyantǝr Hyal nam atahyal, wala Zǝr, ama ɗiɗi Tada ni.

³⁷ Apa akwa vǝr yarɛ nǝr Nuhu, ani ahani tǝ siyir Zǝr Ndɛ ata 'ya.

³⁸ Akuya akwa vǝr yarni kabutu yimǝr afafa, ndzi ada sǝmɛ ba sa, ndǝ ada kǝl mwala ba pwarnta nkwa ala sal, har ka la vǝr nam tǝ Nuhu lǝkwa dzǝlkǝiyir yimi;

³⁹ ba dar ta zǝndi mima ata kǝra sǝ nam ata 'ya wɛ har tǝ yimǝr afafa si ka fati tǝ dar sang atǝra. Ani ahani ata 'ya ata vǝr siyir Zǝr Ndɛ.

⁴⁰ Ndǝ ata ɓui sǝli sǝɗɛ akwa fwaku; ndǝ ata kǝtǝ pathlu ka ngyar dugwari.

⁴¹ Mwahyi sǝɗɛ ada hadlɛ aka tsai ata burɛ; ndǝ ata kǝtǝ pathlu ka ngyar dugwari.

⁴² “Kadǝbar ǝni ka gǝri ndzai aka ɗǝmhǝdzi, kadǝbar gǝri ta zǝndi ata vǝr madi tǝ Thlakǝr gǝri ata si wɛ.

⁴³ Ama ka gǝri ngaba ǝni: Ma thlakǝr kǝi ani awa zǝndi ata saka madi nǝr vǝri tǝ ndǝr hǝlɛ ata si, dzǝ ata sǝkɛ ka wul kǝiyirni kura ndǝ awa ɓǝlnta ka livi.

⁴⁴ Ani gǝri yɛ kǝ ndzai ntsakǝr ka gǝri ndzai aka ɗǝmhǝdzi, kadǝbar Zǝr Ndɛ ni ata si ata saka nam kura gǝri ta ɗǝnga tǝni.

⁴⁵ “Wa dzá ani zǝr kǝi nam aka dzǝrkur ba bǝrkawakur, nam tǝ thlakǝrni ata vǝkǝr tǝni ata kǝra madar kǝi yarɛ nam aharni tǝ dzǝ awa la dar ɗǝvǝr dar ata saka nam kal-kal?

⁴⁶ Ata ndzai ɗaku ala zǝr kǝi ǝnda nam tǝ thlakǝrni ata ɓui tǝni ada 'ya ahani sakatǝ dzǝ si.

⁴⁷ Yi ada gha ala gǝri, dzǝ ata vǝkǝr tǝni ata kǝra sanga kariyirni.

⁴⁸ Ama kǝtǝ apǝri zǝr kǝi ǝnda dzǝ kǝmangar ka nkǝrɛ ala kǝrni, ‘Thlakǝrna kǝ sǝkar aka ndzai abǝla,’

⁴⁹ antǝ dzǝ ata baditsǝni tasǝ madar kǝi kǝmani yarɛ ba sǝmɛ aka sa kaka ndzǝ nam ada sǝsa su ka tsi tǝ dar.

⁵⁰ Thlakǝr zǝr kǝi ǝnda ata si ata vǝr saka nam kura dzǝ ta ɗǝnga tǝni ba ta saka nam kura dzǝ ta zǝndi ata kǝri.

⁵¹ Dzǝ ata dǝgǝlu tǝni ɓutǝr-ɓutǝr ka dzǝ kǝdlǝnta tǝni akwa vui nam tǝ kǝlikatsaɗǝm yarɛ akwa vui nam tǝ tuwa kaka ɗǝhyir akwanda.