Mata 19 - Kibaku NT

Ngǝla Mwala

¹ Sakatǝ Yɛsu tara kurai gha sanga sǝ yarni, dzǝ ka ngyar diyir Galili ka mwari akwa diyir Yahudiya abǝla tǝbwanda kyaghar Urdun.

² Hangkur ndzǝ hang ka nuti tǝni, ba dzǝ ka mbǝti tǝ dar akwanda.

³ Ndzǝr Farisi yar laka ka si adzǝni akuya ka nkǝrti tǝni. Dar ka yuwɛ, “Kal-kal ka sal ngǝla mwalarni akuya ka kǝlara su ya?”

⁴ Yɛsu ka sǝnau ala dar, “Gǝr ta kǝratsǝni wɛ apǝri akwa baditsǝni Dzǝ nam ndǝr hǝnti ni dzǝ ‘mǝrti tǝ dar sal aka mwala,’

⁵ ba dzǝ ka nkǝrɛ, ‘Akuya ka ǝni sal ata ngyar atǝgǝri aka angǝri ba ka dar paktsǝnidzi aka mwalarni, ba ndzǝ sǝɗǝ ni ata ndzai dzǝ duku’?

⁶ Ani dar tsu adi ndzǝ sǝɗǝ kǝra wɛ, ama ndǝ duku. Kadǝbar ǝni sǝ nam tǝ Hyal tara paktsǝni atakǝmaduku, ta ndǝ ta ndǝghǝba.”

⁷ Dar ka nkǝrɛ alari, “Kami dzá tǝ Musa tara tsau apǝri ka sal la kakadǝr ngǝla ala mwalarni ba ka ndǝ kǝdlǝnta tǝni ka dzǝ tǝra?”

⁸ Yɛsu ka nkǝrɛ ala dar, “Musa yiɗɛ ala gǝri ka gǝri ngǝla mwahyir gǝri kadǝbar ɓaɓalkur ɗǝfa gǝri. Ama akwa baditsǝni adi ahani wɛ.

⁹ Yi ada gha ala gǝri kǝlara ndǝ nam tara ngǝla mwalarni, ma adi akuya ndǝ ɓui tǝni aka pi aka sal laka wɛ, tǝ dzǝ ka kǝtǝ mwala damwa dzǝ ada 'ya badawikur.”

¹⁰ Ndzǝr nuwurni nkǝrɛ alari, “Ma ǝni ani sǝ nam akwa dabwa ndzaiyir sal aka mwala kudzǝ kura ndǝ awa kǝl mwala.”

¹¹ Yɛsu ka sǝnau ala dar, “Adi kǝlara ndɛ ani ata mǝzi ka dlutsi labar ni wɛ, ama ala ndzǝ nam tǝ Hyal tara la dar ɗiɗi.

¹² Akuya ndzǝ laka dar ntsu kadǝbar ahani tǝ ndǝ ya tǝ dar; ndzǝ laka atar ndzǝ tǝ ndǝ mǝrti tǝ dar ahani; ndzǝ laka dar dza ngǝla kǝl mwala kadǝbar kuhyikur nam atahyal ni. Ndzǝ nam ata mǝzi ka dlutsi ǝni ka dzǝ dlutsi.”

Madausai nam Nkyǝnkyiɗu ni ba Yɛsu

¹³ Antǝ ndzǝ ka si aka madausai nam nkyǝnkyiɗu ala Yɛsu akuya ka dzǝ pukǝr tsiyari ata kǝra dar ba ka dzǝ 'ya aduwa ala dar, ama ndzǝr nuwurni ka ɗǝmnya ala ndzǝ tara si aka dar.

¹⁴ Yɛsu ka nkǝrɛ, “Ngyaramɛ ka madausai nam nkyǝnkyiɗu ka dar si adzǝra, ba ta gǝri ta kanti ala dar, akuya Kuhyikur nam atahyal ni nǝr dzǝli ǝni yarni.”

¹⁵ Sakatǝ dzǝ pukǝr tsiyari ata kǝra dar, dzǝ ka tǝra.

Zǝr Dakwai nam Bǝrba ni

¹⁶ Kulini ndǝ laka ka si adzǝ Yɛsu ka yuwɛ apǝri, “Malǝm, sǝr mǝ nam ɗaku ntsakǝr tǝ Yi awa 'ya ka Yi ɓui mpikǝ nam kura kurkuri?”

¹⁷ Yɛsu ka sǝnau alari, “Ka mǝ tǝ gǝ ada yu tǝra ata kǝra sǝ nam ɗaku? Ndǝ nam ɗaku duku ɗiɗi ani adai. Ma gǝ ada bara ka gǝ ɓui mpikɛ, ka gǝ ɓǝlati tsau yarni.”

¹⁸ Ndǝ ni ka yu tǝni, “Tsau yarɛ madi?” Yɛsu ka sǝnau, “ ‘Ta gǝ ta tsa ndɛ, ta gǝ ta 'ya badawikur, ta gǝ ta hǝlɛ, ta gǝ ta hamnta sakǝidar hawi,

¹⁹ ka gǝ la nggakur ala babar ngɛ aka mamar ngɛ,’ ba ‘ka gǝ yiɗǝ ntǝwhulǝr ngɛ apa kǝrngɛ.’”

²⁰ Zǝr dakwai ni ka nkǝrɛ, “Sanga tsau ǝni yarni Yi ɓǝlati. Mǝ damwa tǝ Yi nai tari?”

²¹ Yɛsu ka nkǝrɛ alari, “Ma gǝ ada bara ka gǝ ndzai kal-kal, mwari ka gǝ ɗǝlnta sanga sǝ nam tǝ gǝ akǝri ka gǝ la ndǝ nam ngudi, ba gǝ ata siya ɓui gǝna atahyal. Antǝ ka gǝ siya nu tǝra.”

²² Sakatǝ zǝr dakwai ni tara ngati ǝni, dzǝ ka tǝra aka ɗǝfu sǝwa-sǝwa, kadǝbar dzǝ aka gǝna hang.

²³ Antǝ Yɛsu ka nkǝrɛ ala ndzǝr nuwurni, “Yi ada gha ala gǝri dzǝrkur, ata ndzai dzau ala ndǝ bǝrba ka dzǝ lǝkwa kuhyikur nam atahyal.

²⁴ Yi ada gha ala gǝri kadamwa, ata ndzai butu ala dlǝgwam ka dzǝ lǝba ata gulǝr yibǝra ta tǝ ndǝ bǝrba awa lǝkwa kuhyikur Hyal.”

²⁵ Sakatǝ ndzǝr nuwurni tara ngati ǝni, dar ka ndatǝdzi aka dǝna ba dar ka yuwɛ, “Wa dzá ata mǝzi mbatǝdzi?”

²⁶ Yɛsu ka wular tǝ dar ka nkǝrɛ, “Ala ndǝ kam ǝni adi ata mǝzi ka 'ya wɛ, ama ala Hyal sanga su ata mǝzi ka 'ya.”

²⁷ Bitrusu ka nkǝrɛ alari, “Yar ngyar kǝlara su ka nu tǝngɛ! Mǝ dzá tǝ yar ata siya ɓui?”

²⁸ Yɛsu ka nkǝrɛ ala dar, “Yi ada gha ala gǝri dzǝrkur, akwa zaman nam bǝlin, sakatǝ Zǝr Ndɛ ni ndzai ata nggakur kuhyikurni, gǝri nam tara nu tǝra gǝri yɛ gǝri ata ndzai ata kǝra kuhyikur yarɛ kum kapu sǝɗɛ, tǝ gǝri ada 'ya haka ala ndzǝli yarɛ nǝr Izǝraila.

²⁹ Ba kǝlara ndǝ nam tara ngyar kǝi yarɛ wala madar mama yarɛ kaka nkwaiyir mama yarɛ wala tada wala mama wala madausai wala fwaku yarɛ ata nyarna, ata dlutsi kumthlani ka kumɛ hang ba dzǝ ata ɓui mpikǝ nam kura kurkuri.

³⁰ Ama ndzǝ hang nam kǝma ata ndzai aghǝli, ba ndzǝ nam hang aghǝli ata ndzai akǝma.