Mata 17 - Kibaku NT

Palidzǝr Yɛsu ni

¹ Aghǝla vǝr nkwa Yɛsu ka fati Bitrusu, Yakubu ba Yawhana zǝr angǝra Yakubu, dzǝ ka mwari aka dar ati ata paya nam dzǝgam dar ɗiɗi.

² Dzǝ ka palidzi akwanda akǝma dar. Kǝmari ada mbǝli apa tsǝtsi, ba kariyirni kǝ ndzai mwapu apa paraku.

³ Antǝ ndza Musa aka Iliya ka tsantǝdzi akǝma dar, ada ndǝrɛ kaka Yɛsu.

⁴ Bitrusu ka nkǝrɛ ala Yɛsu, “Thlaku, ata 'ya ɗaku ala yar ka yar ndzai akwani. Ma gǝ yiɗɛ, Yi ata tǝri dǝri makǝr—pathlu ala gǝ, pathlu ala Musa ba pathlu ala Iliya.”

⁵ Sakatǝ dzǝ tsu ata kǝra ndǝrɛ, dlamba nam ada mbǝli ka mbui tǝ dar, ba kuɗahu akwa dlamba ni nkǝrɛ, “Əni ani Zǝrna nam tǝ Yi yiɗɛ; Yi ada nga sǝɗa aka dza. Siyamɛ thlǝmɛ alari!”

⁶ Sakatǝ ndzǝr nuwurni tara ngati ǝni, hyivǝr ka ngǝti tǝ dar dzǝr dzǝri dar ka dla tǝ kǝma ata dai.

⁷ Ama Yɛsu si ka tsǝkwar tǝ dar ka nkǝrɛ, “Hyatamɛ, ta gǝri ta hyivǝr.”

⁸ Sakatǝ dar haɓǝti ntsa dar, dar ta wula waima wɛ, tar Yɛsu.

⁹ Sakatǝ dar ata kǝra sǝgǝl ata paya ni, Yɛsu ka tsau ala dar apǝri, “Ta gǝri ta gha ala kǝlara ndɛ sǝ nam tǝ gǝri tara wula, tar Zǝr Ndɛ ni kǝ hyati akwa ntǝnti.”

¹⁰ Ndzǝr nu yarni ka yu tǝni, “Kami dzá tǝ malǝmǝr mabari yarni nkǝrɛ apǝri ntsakǝr ka Iliya si tangkǝma?”

¹¹ Yɛsu ka sǝnau, “Kǝ ndzai dzǝri, Iliya si ba ata dzǝkuti sanga su.

¹² Ama Yi ada gha ala gǝri, Iliya kǝ kurtaka si, ama dar ta zǝndi tǝni wɛ, ama dar 'ya alari kǝlara sǝ nam tǝ dar tara yiɗɛ. Tsu akwa whal ǝni Zǝr Ndɛ ata siya ɗar bwanai akwa tsiya dar.”

¹³ Antǝ ndzǝr nu yarni kǝ ngaba apǝri dzǝ ada ndǝrɛ ala dar ata kǝra Yawhana Ndǝr 'Ya Bamtizǝma.

Mbǝtǝdzǝr Zǝr nam Aka Mambǝl nam Kulɗa ni

¹⁴ Sakatǝ dar tara si adzǝ dlamiyir ndzi, ndǝ laka ka si adzǝ Yɛsu ka zǝɗi akǝmari.

¹⁵ Dzǝ ka nkǝrɛ, “Thlaku, 'ya kǝtǝrdzi ala zǝrna. Dzǝ aka bwali ba dzǝ ada ɗar bwanai dzau. Ka hang dzǝ ada ɗu akwa u'u wala akwa yimi.

¹⁶ Yi si aka dza ala ndzǝr nuwur ngɛ yarɛ, ama dar ta mǝzi mbǝti tǝni wɛ.”

¹⁷ Yɛsu ka sǝnau, “Gǝr ndzǝr zaman nam kura aka mbǝrsa ba sǝwa-sǝwa, mǝmi hangkur ndzai tǝ Yi awa ndzai kaka gǝri? Ka yiɗau tǝ Yi awa ɓati ala gǝri? Siyamɛ aka zǝr ni alai akwani.”

¹⁸ Yɛsu ka ɗǝmnya ala mambǝl nam kulɗa ni, ba dzǝ ka sǝba akwa zǝr ni, ba dzǝ ka mbǝtǝdzi tsu ata saka nda.

¹⁹ Antǝ ndzǝr nu yarni ka si adzǝ Yɛsu sakatǝ dar ɗiɗi ka yu tǝni, “Kami kura yar ta mǝzi kǝdlǝba tǝni?”

²⁰ Dzǝ ka sǝnau, “Kadǝbar gǝri aka hamnta dzǝri nkyiɗu. Yi ada gha ala gǝri dzǝri, ma gǝri aka hamnta dzǝri wala nkyiɗu apa munyar bwala, gǝri ata mǝzi gha ala paya ǝni, ‘Hyati akwani ka gǝ mwari akwanda’ ani dzǝ ata hyati ka mwari. Sǝ adai ata ndzai dzau ala gǝri wɛ.” [

²¹ “Ama dzǝli ǝni, adi ada sǝba wɛ tar aduwa aka asam.”]

²² Sakatǝ dar si atakǝmaduku akwa Galili, Yɛsu ka nkǝrɛ ala dar, “Ndǝ ata siya ɓǝlai Zǝr Ndɛ akwa tsiya ndzi.

²³ Dar ata tsi tǝni, ba ata vǝr makǝrkur dzǝ ata hyati aka mpikɛ.” Ba ndzǝr nuwurni ka lǝkwa damitsǝnidzi.

Pu Tsǝmǝr Fǝr Hyal ni

²⁴ Aghǝla Yɛsu ba ndzǝr nuwurni tara si akwa Kafarnahum, ndzǝr dlu tsǝmǝr fǝr Hyal ka si adzǝ Bitrusu ka yu tǝni, “Malǝmǝr gǝri adi ada nkyǝ tsǝmǝr fǝr Hyal ni wɛ?”

²⁵ Dzǝ sǝnau, “A, dzǝ ada nkyɛ.” Sakatǝ Bitrusu kǝ si aivi, Yɛsu dza yu tǝni kǝma. Dzǝ ka yuwɛ, “Simaun, mǝ ɗǝngar ngɛ? Aka wa tǝ kuhyi yarɛ nǝr dunya ni ada dlu kwapar whalɛ wala tsǝmɛ—aka madar dar kǝna aka ndzǝ damwa?”

²⁶ Bitrusu ka sǝnau, “Aka ndzǝ damwa.” Yɛsu nkǝrɛ alari, “Antǝ madarni adi ata nkyǝ wɛ.

²⁷ Ama ani ka ta muri ta sǝwati ɗǝfa dar, mwari akwa manda ka gǝ ɗalu kwangyalar ngɛ. Ka gǝ kǝtǝ kulfa nam tangkǝma tǝ gǝ ɗalba; ka gǝ mburnta nyari gǝ ata ɓui dinar fwaɗu nam ata mǝzi kyinta tsǝmǝr fǝr Hyal ni. Kǝtǝ ka gǝ la dar ka nana ba nǝngɛ.”