Mata 11 - Kibaku NT

Yɛsu aka Yawhana Ndǝr 'Ya Bamtizǝma ni

¹ Aghǝla tǝ Yɛsu tara kurai nkǝrnta sǝr 'ya ala ndzǝr nuwurni kum kapu sǝɗɛ, dzǝ ka lǝkǝma aka hyipɛ ba nkǝrnta akwa diyir Galili.

² Sakatǝ Yawhana ndǝr 'ya Bamtizǝma tara ngati akwa fǝrsǝna ata kǝra sǝ yar nam tǝ Kǝrsti ada 'ya dzǝ ka hyanǝba ndzǝr nuwurni yarɛ

³ ka dar yu tǝni “Gɛ ani ndǝ nam ata si ni, kǝna ka yar sǝkɛ ndǝ damwa?”

⁴ Yɛsu ka kalaktsǝni, “Mwari mɛ ka gǝri gha ala Yawhana sǝ nam tǝ gǝri ngati aka tǝ gǝri wula:

⁵ ndzǝ nam ghyang ada wula, ndzǝ nam ngurngudi ada mwari, ndzǝ nam aka dǝlima ada kǝtsǝntadzi, ndzǝ nam kulang ada ngati, ndzǝ ntǝnti ada hyati, ba ndǝ ada nkǝrnta ndǝrǝr Hyal nam sǝɗa ala ndzǝ nam ngudi.

⁶ Kutsari aka ndǝ nam kura ta dla kadǝbarna.”

⁷ Sakatǝ ndzǝr nuwur Yawhana ada tǝra, Yɛsu baditsǝni ndǝrɛ ala dlamiyir ndzi ata kǝra Yawhana: “Mǝ tǝ gǝri lǝba wulɛ akwa ntakǝr i'ya? Kusar nam dzǝgam-dzǝgam tǝ sambar ada kǝngǝr ya?

⁸ Ma adi apani wɛ, mǝ tǝ gǝri lǝka wulɛ? ndǝ tara hati kari ɗa-ɗa ya? A'a, ndzǝ nam tara hati kari ɗa ɗaku dar akwa kǝiyir kuhyi.

⁹ Antǝ mi tǝ gǝri lǝba wul dzá? Nabi ya? A, Yi ada gha ala gǝri, ba ndǝ nam tara ngǝmba nabi.

¹⁰ Əni ani Yawhana nam rǝbwa-rǝbwa ata kǝrari: “ ‘Yi ata hyanti ndǝr hyantǝrna akǝma gǝ, nam ata ɗǝmhǝi ala gǝ whalɛ kama gǝ si.’

¹¹ Yi ada gha ala gǝri dzǝri: akwa ntsa sanga ndzǝ nam tǝ mwahyi tara yaba ndɛ adi nam ngga ta Yawhana Ndǝr 'Ya Bamtizǝma wɛ; ama wala apani, ndǝ nam nkyiɗu ta sang akwa Kuhyikur nam atahyal kǝ kwatsǝni Yawhana aka nggakur.

¹² Baditsǝni ata vǝrǝr Yawhana Ndǝr 'Ya Bamtizǝma har ka la kulini, kuhyikur Hyal ada ɓui ka lǝkǝma aka bwanai, ba ndzǝr 'ya lǝkǝdzǝkur ni ada bara ka dar mbuli kuhyikur Hyal ni tǝ dǝna.

¹³ Akuya sanga nabi yarɛ ba Mabariyir Musa nkǝr ndǝrɛ ata kǝra Kuhyikur ni har ka la sakar Yawhana.

¹⁴ Antǝ ma gǝri yiɗɛ ka dlutsi tǝni, dzǝ ani Iliya nam ata si.

¹⁵ Ndǝ nam aka thlǝmɛ, ngyar ka dzǝ ngati!

¹⁶ “Aka mi tǝ Yi awa nkǝrti zaman ǝni? Dar ndzai tsu apa madausai nam akwa vui kasuku ada kǝga kǝma dar:

¹⁷ “ ‘Yar mbǝrɛ ala gǝri sala, ama gǝri ta fǝlɛ wɛ; Yar ɗal har tuwa, ama gǝri ngǝla tuwa!’

¹⁸ Akuya Yawhana si, dzǝ adi ada sǝm wala sa wɛ, ba dar ka nkǝrɛ, ‘Dzǝ aka mambǝl nam kulɗa’

¹⁹ Zǝr Ndɛ kǝ si ada sǝm ba sa, ba dar ka gha, ‘Nda ndǝ nyanyam ba mbalma, pazǝr ndzǝr dlu tsimɛ ba “ndzǝr biku.” ’ Ama bǝrkawakur ada tsantǝdzi akwa kǝthlǝr yarɛ.”

Bwasam ala Mǝlmǝ yarɛ nam Kura Ta Tubi

²⁰ Antǝ Yɛsu baditsǝni ɗǝmnya ala mǝlmǝ yarɛ nam tǝ dzǝ 'ya hanga sǝr ndatǝrni yarɛ akwa, kadǝbar dar ta tubi wɛ.

²¹ “Bwasam ala gǝ, Kwarasinu! Bwasam, ala gǝ, Bathsaida! Ma sǝr ndati yarɛ nam tǝ ndǝ 'ya akwa gɛ ma ndǝ kara 'ya akwa Taya ba Sidaun, antǝ sakani dar kǝ tubi tsu din ka hati daza ba pukǝr pǝndzu ala kǝr dar.

²² Ama Yi ada gha ala gǝri, Hyal ata 'ya kǝtǝrdzi ala ndzǝr Taya aka Sidaun ata vǝr haka ta gǝri.

²³ Ba gǝ, Kafarnahum, ndǝ ata haɓǝti tǝngɛ atahyal ya? A'a! Gǝ ata lǝghǝl akwa vui ndzaiyir ndzǝ ntǝnti. Ma sǝr ndati yarɛ nam tǝ ndǝ 'ya akwa gɛ ma ndǝ kara 'ya akwa Saudaum, antǝ sakani ka la vǝr ǝni dar tsu adai.

²⁴ Ama Yi ada gha ala gǝri apǝri, Hyal ata 'ya kǝtǝrdzi ala ndzǝr Saudaum ata vǝr haka ta gǝri!”

Ghǝrbadzi ala Ndzǝ nam aka Kǝl ni

²⁵ Akwa saka ǝnda Yɛsu nkǝrɛ, “Yi ada hǝm tǝngɛ Bana, gǝ nam Thlakǝr atahyal ba dai, kadǝbar tǝ gǝ ɗǝwar sǝ ǝni yarni ala ndzǝ nam bǝrkawa ba ndzǝ nam aka zǝndi su, ba gǝ ka tsanǝba tǝ dar ala madausai.

²⁶ A, Bana, akuya ǝni ani sǝ nam ɗaku tǝ gǝ yiɗɛ.

²⁷ “Sanga su Bana kǝ lai. Ndǝ adi nam tara zǝndi Zǝr ni wɛ, tar Tada ni, ba ndǝ adi nam tara zǝndi Tada ni wɛ, tar Zǝr ni ba ndzǝ nam tǝ Zǝr ni tara tsarba ka tsanǝba tǝni.

²⁸ “Azǝramɛ adzǝra, sanga gǝri nam aka bwanai aka kǝl nam kǝgǝɓu, antǝ Yi ata la gǝri ghǝrbadzi.

²⁹ Ka gǝri kǝtǝ kǝthlǝr falikurna ata kǝra gǝri, ka gǝri tsǝlɛ akai sǝr 'yarna, akuya Yi ndǝ nam kanadi aka tǝrghǝlkǝr, antǝ gǝri ata siya ɓui ghǝrbadzi.

³⁰ Akuya kǝthlǝrǝr falikurna ani butu ba bwaniyirna adi dzau wɛ.”