Mata 10 - Kibaku NT

Yɛsu Hyanǝba Ndzǝ Kumkapu Sǝɗǝ ni

¹ Yɛsu kǝga ndzǝr nuwurni kum kapu sǝɗɛ adzǝni dzǝ ka la dar wada ka dar kǝdlǝba mambǝl nam kulɗa yarɛ ba ka dar mbǝti kǝlara kasuwa aka kura kalangkur yarɛ.

² Ndza thlǝma ndzǝr hya yarɛ nam kum kapu sǝɗǝ ni: tangkǝma Simaun (nam tǝ ndǝ ada kǝga aka Bitrusu) ba zǝrangǝri Andǝrawusu; Yakubu madar Zabadi, ba zǝrangǝri Yawhana;

³ Filibusu aka Barthlalaumisu, Tauma aka Mata nam ndǝr dlu tsǝmɛ; Yakubu zǝr Halfa aka Thladiyus;

⁴ Simaun Zailaut aka Yahuda Iskaryauti, nam tara ɓǝlai Yɛsu.

⁵ Yɛsu ka hyanǝba ndzi kum kapu sǝɗɛ yarni, ba dzǝ ka tsau ala dar apǝri: “Ta gǝri ta mwari akwa ntsa ndzǝ kura Yahudi wala lǝkwa duku akwa ntsa mǝlmǝr Samariya yarni.

⁶ Kudzǝ ka gǝri mwari adzǝ tǝmar Izǝraila yarɛ nam tara sa.

⁷ Sakatǝ gǝri ada mwari, ka gǝri nkǝrnta labar ni apǝri, ‘Kuhyikur nam atahyal ni kǝ 'ya kudzǝghɛ.’

⁸ Ka gǝri mbǝti ndzǝ nam kura kalang, ka gǝri hyanti ndzǝ nam ntǝnti, ka gǝri kǝtsǝnta kasuwar dǝlima yarɛ, ba ka gǝri kǝdlǝba mambǝl kulɗa yarɛ. Apanda tǝ gǝri dlutsi, antǝ ka gǝri la ndzi apanda.

⁹ Ta gǝri ta kǝl dinar wala lipǝla wala kwapa mwapu ata dzá gǝri;

¹⁰ gǝri adi ata kǝl ngǝrkǝr ka buraburá wɛ, wala lǝkutu damwa, wala ɓǝɓai, wala zuwa wɛ; akuya ndǝr kǝthlǝr kǝ mǝzi ka dzǝ ɓui sǝr sǝm kal-kal.

¹¹ “Kǝlara di nam ngga wala mǝlmɛ nam nkyiɗu tǝ gǝri lǝkwa, ka gǝri bara ndǝ nam tara mǝzi akwanda ka gǝri ndzai aharni tar vǝr tǝrar gǝri.

¹² Sakatǝ gǝri livi akwa kǝi ni, ka gǝri thlawar tǝ dar.

¹³ Ma kǝi ni kǝ dlutsi tǝ gǝri, ngyar ka lapiyakur ni ndzai ata kǝrari; ma kǝi ni ta dlu tǝ gǝri wɛ, ngyar ka lapiyakur ni ɓakta si adzǝ gǝri.

¹⁴ Ma kǝlara ndɛ ta dlu tǝ gǝri wɛ wala sǝthlǝmɛ ala ndǝrǝr gǝri wɛ, ka gǝri ɓunta bǝr-bǝr nam ata hǝi thlǝla gǝri sakatǝ gǝri ata tǝra ka ngyar kǝi ndari wala di ndari.

¹⁵ Yi ada gha ala gǝri dzǝri, Hyal ata 'ya kǝtǝrdzi ala ndzǝr Saudaum aka Gwamara ata vǝr haka ta ndzǝr di nda.

¹⁶ Yi ada hyanǝ tǝ gǝri alǝba apa tǝma yarɛ akwa ntsa kǝyar ntaku yarɛ. Kadǝbar ka gǝri ndzai bǝrkawa apa pwapu yarɛ ba tsuwɛ ka gǝri ndzai aka kǝlamkur apa adlakukyala yarɛ.

¹⁷ “Tsuwɛ ka gǝri 'ya hankal aka ndzi; dar ata la tǝ gǝri ala bǝlama yarɛ ka dar tasǝ tǝ gǝri akwa fǝr vǝkǝr sǝlaiyir dar.

¹⁸ Ata nyarna ndǝ ata si aka gǝri akǝma gumna yarɛ ba kuhyi yarɛ apa sakǝida ala dar ba ala ndzǝ kura Yahudi.

¹⁹ Ama sakatǝ dar ngǝti tǝ gǝri, ta gǝri ta damitsǝnidzi ata kǝra sǝ nam tǝ gǝri ata nkǝrɛ wala whal nam tǝ gǝri ata ndǝrɛ. Ata saka ǝnda ndǝ ata la gǝri sǝ nam tǝ gǝri ata nkǝrɛ,

²⁰ akuya adi gǝri ani ata ndǝr wɛ, ama Mambǝlǝr Tada gǝri ani ata ndǝrɛ ata vuiya gǝri.

²¹ “Zǝr mama ata ɓǝlai zǝr mama ka tsi tǝni ba tada yɛ ala zǝrǝrni; madausai ata siya muli ata kǝra ndzǝr yar dar har ma ba hamnta ka ndǝ tsi tǝ dar.

²² Sanga ndzi ata siya ngǝla tǝ gǝri ata nyarna, ama ndǝ nam tara ɓati ka la dǝnta dzǝ ata ɓui mbatǝdzi.

²³ Sakatǝ ndǝ la gǝri bwanai akwa vui pathlu, whuiyamɛ atǝra akwa vui damwa. Yi ada gha ala gǝri dzǝri, ma gǝri ata dlǝti sanga diyir Izǝraila ni Zǝr Ndɛ ata si.

²⁴ “Zǝr makǝranta adi ata ngǝmba malǝmǝr ni wɛ, wala zǝr kǝi ka dzǝ ngǝmba thlakǝr kǝiyirni wɛ.

²⁵ Ata ndzai kal-kal ala zǝr makǝranta ka dzǝ ndzai apa malǝmǝr ni, ba zǝr kǝi ka dzǝ ndzai apa thlakǝr kǝiyirni. Ma dar kǝ kǝga thlakǝr kǝi apǝri Bɛlzǝbul, mǝmi tǝm tǝ dar ata kǝga ndzǝr kuta kǝiyirni?

²⁶ “Ani ta gǝri ta hyivǝr tǝ dar. Akuya sǝ adi nam harhari kura ata siya mburntadzi wɛ, wala sǝ ɗǝwa-ɗǝwa nam kura ndǝ awa siya zǝndi wɛ.

²⁷ Sǝ nam tǝ Yi gha ala gǝri akwa kuthlɛ, nkǝrba mɛ akwa paraku; sǝ nam tǝ gǝri ngati aka thlǝma gǝri nkǝrnta mɛ ati akwa tsǝgwara fǝr.

²⁸ Ta gǝri ta hyivǝr ndzǝ nam ata tsai dzǝ ni, ama dar adi ata mǝzi ka tsai sangura wɛ; ama ka gǝri hyivǝr Hyal dzǝ nam ata mǝzi ka santa dzɛ gyapu aka sangura akwa u'u kura kuri.

²⁹ Ndǝ adi ada ɗǝlnta madar ika sǝɗɛ ka kwapa duku wɛ? Ama wala apani duku akwa ntsa dar adi ata ɗǝghǝl ata dai kura aka yiɗǝr Tada gǝri wɛ.

³⁰ Wala sǝsǝr kǝra gǝri ma sanga tsǝtsi.

³¹ Ani ta gǝri ta hyivǝr; akuya sǝlaiyir gǝri kǝ kwatsǝni madar ika yarɛ nam hang.

³² “Kǝlara ndzǝ nam tara nkǝrnta tǝra akǝma ndzi, Yi ma Yi ata nkǝrnta tǝni akǝma Bana nam atahyal.

³³ Ama kǝlara ndǝ nam tara ɓwalnyar zǝndi tǝra akǝma ndzi, Yi tsuwɛ Yi ata ɓwalnyar zǝndi tǝni akǝma Bana nam atahyal.

³⁴ “Ta gǝri ta kǝtǝ apǝri Yi si aka ndzaiyir lapiyakur akwa dunya. Yi ta si aka ndzaiyir lapiyakur wɛ, ama katsakar.

³⁵ Akuya Yi si ka Yi tsutsukuti “ ‘ndɛ aka atǝgǝri, zǝr nkwa aka angǝri, mwala zǝr aka angǝra salǝrni—

³⁶ dǝgunmar ndɛ tsuwɛ ata ndzai ndzǝr kuta kǝiyirni ni.’

³⁷ “Kǝlara ndǝ nam tara yiɗɛ atǝgǝri wala angǝri ɓwalta yɛ dzǝ ta mǝzi ndǝr nuwurna wɛ; kǝlara ndǝ nam tara yiɗɛ zǝrǝrni wala nkwarni ɓwalta yɛ dzǝ ta mǝzi ndǝr nuwurna wɛ;

³⁸ ba kǝlara ndǝ nam kura ta kǝtǝ undzum kadlǝkadlǝrni ka nu tǝra, dzǝ ta mǝzi ndǝr nuwurna wɛ.

³⁹ Kǝlara ndǝ nam tara bara tsǝlpi mpikari dzǝ ata nai tari, ba kǝlara ndǝ nam tara ngǝla mpikari ata nyarna dzǝ ata ɓui tǝni.

⁴⁰ “Kǝlara ndǝ nam tara dlu tǝ gǝri dzǝ dlutsi tǝra, ba kǝlara ndǝ nam tara dlu tǝra dzǝ dlutsi ndǝ nam tara hyanǝba tǝra.

⁴¹ Kǝlara ndǝ nam tara dlu nabi kadǝbar tǝ dzǝ nabi dzǝ ata dlutsi wadzǝɓar nabi, ba kǝlara ndǝ nam tara dlutsi ndǝ nam kal-kal kadǝbar tǝ dzǝ ndǝ nam kal-kal dzǝ ata dlutsi wadzǝɓar ndǝ nam kal-kal.

⁴² Ma kǝlara ndǝ nam tara la yimi ntathla wala kapu pathlu ala duku akwa ntsa ndzǝ nam nkyiɗu yarni kadǝbar tǝ dar ndzǝr nuwurna, Yi ada gha ala gǝri dzǝri dzǝ adi ata nai ta wadzǝɓarni wɛ.”