Markusu 9 - Kibaku NT

¹ Ba dzǝ ka nkǝrɛ ala dar, “Yi ada gha ala gǝri dzǝri, ndzǝ yar laka ada hyati akwa ntsa gǝri akwani dar adi ata nti kabutu dar ta wula kuhyikur Hyal ada sǝgǝl aka dǝna wɛ.”

Palidzǝr Yɛsu ni

² Aghǝla vǝr nkwa, Yɛsu fati Bitrusu, aka Yakubu ba Yawhana dzǝ ka mwari aka dar ati akwa kǝra paya nam dzǝgam, vui nam tǝ dar ɗiɗi. Akwanda parni ka palidzi akǝma dar.

³ Kariyirni ka sǝmwatǝdzi mwapu tiyal, nam kura ndǝ awa mǝzi kǝtsǝnta mwapukurni akwa dunya.

⁴ Ba akwanda Iliya aka Musa ka tsantǝdzi ala dar, tǝ dar ada labar aka Yɛsu.

⁵ Bitrusu ka nkǝrɛ ala Yɛsu apǝri, “Malǝm, ata 'ya ɗaku ka yar ndzai akwani. Ngyar ka yar tǝri dǝri makǝr akwani—pathlu ala gǝ, pathlu ala Musa ba pathlu ala Iliya.”

⁶ (Dzǝ ta zǝndi sǝ nam tǝ dzǝ ada nkǝrɛ wɛ, kadǝbar dar ɗǝmnti hyivǝr dzǝr dzǝri.)

⁷ Antǝ dlamba laka sǝgǝl ka mbui tǝ dar, ba kuɗahu ka sǝba akwa dlamba ni, “Əni ani Zǝrna, nam tǝ Yi yiɗɛ. Ka gǝri si thlǝmɛ alari.”

⁸ Tǝkǝma ma dar ata wulɛ dar ta ɓakta wula waima wɛ, ɗiɗi Yɛsu.

⁹ Sakatǝ dar ada sǝgǝl ati akwa paya ndari, Yɛsu tsau ala dar ta dar ta nkǝrɛ ala waima sǝ nam tǝ dar wula tar ma Zǝr Ndɛ kǝ hyati akwa ntǝnti.

¹⁰ Dar ka ngǝzi labar Yɛsu ni ala kǝr dar, tǝ dar ada labar mǝ dza “hyati akwa ntǝnti ni” ada nkǝrɛ.

¹¹ Ba dar ka yu tǝni, “Kami tǝ malǝmǝr mabari yarni ada nkǝrɛ apǝri Iliya ani ata si kǝma ta Kǝrsti?”

¹² Yɛsu ka sǝnau, “Dzǝri, Iliya ani ata si kǝma, ka dzǝ ɗǝmhǝi sanga sǝ yarɛ. Kami tsuwɛ tǝ ndǝ rǝbwai apǝri Zǝr Ndɛ ntsakǝr ka dzǝ ɗar bwanai pam-pam hang ka ndǝ ngǝla tǝni?

¹³ Ama Yi ada nkǝrɛ ala gǝri, Iliya kurtaka si, ba dar ka 'yati alari sǝ nam tǝ dar ada bara, apa tǝ ndǝ rǝbwai ata kǝrari.”

Ndǝ Mbati Zǝr nam Aka Mambǝl nam Kulɗa

¹⁴ Sakatǝ dar si adzǝ ndzǝr nuwurni damwa, dar wula dlamiyir ndzi hang tara thlǝti tǝ dar ba malǝmǝr mabari yarni ada ɓwalnya kaka dar.

¹⁵ Tǝkǝma sanga ndzi ka wuti Yɛsu, dar ka ghǝi aka sǝr kudǝra dar ka whuiya sǝngui ka thlawar tǝni.

¹⁶ “Mǝ tǝ gǝri ada ɓwalnyar kaka dar ata kǝri?” tǝ dzǝ yuwɛ.

¹⁷ Ndǝ pathlu akwa ntsa ndzǝ ndari ka sǝnau alari, “Malǝm, nda Yi si aka zǝrna ala gǝ. Dzǝ aka mambǝl nam kulɗa tara kanti alari ndǝrɛ.

¹⁸ Kǝlara saka ma dzǝ ngǝzǝ tǝni ada nkai tǝni ata dai, nyari ada sǝba aka mbumbufu, dzǝ ada ɗǝhyir ba ada ɓǝlba tǝni gang-gang. Yi kǝgyǝ ndzǝr nuwur ngɛ ka dar kǝdlǝba mambǝl nam kulɗa ni, ama dar ta mǝzi 'yati wɛ.”

¹⁹ Yɛsu ka sǝnau, “Gǝr ndzǝr zaman nam kura aka mbǝrsa, mǝmi hangkur ndzai tǝ Yi awa ndzai kaka gǝri? Ka yiɗau tǝ Yi awa ɓati ala gǝri? Siyamɛ aka zǝr ni alai.”

²⁰ Ani dar ka si aka dza. Sakatǝ mambǝl nam kulɗa ni tara wula Yɛsu, tǝkǝma dzǝ ka hau zǝr ni akwa kǝgǝdzi. Dzǝ ka dla ata dai ada mangǝlɛ, mbumbufu ada sǝba ata nyari.

²¹ Yɛsu ka yu atǝgǝra zǝr ndari apǝri, “Nama tǝ sǝni baditsǝni 'ya alari?” Dzǝ sǝnau alari apǝri, “Tsu sakatǝ dzǝ nkyiɗu.

²² Ka hang ada ɗaltǝ tǝni ata u'u ba ata yimi kadǝbar ka dzǝ tsai tǝni. Ama ma gǝ ata mǝzi 'yati sǝ laka, 'ya kǝtǝrdzi ala yar ka gǝ mbana tǝ yar.”

²³ Yɛsu ka nkǝrɛ alari apǝri, “Kami tǝ gǝ nkǝrɛ apǝri, ‘Ma apǝri gǝ awa mǝrti’? Kǝlara su ata ndzai butu ma apǝri gǝ mbǝrsa.”

²⁴ Ata saka duku atǝgǝra zǝr ni ka haɓǝtǝ kuɗahu apǝri, “Yi mbǝrsa, dlar tǝra kǝlnta alai kura mbǝrsarkurna!”

²⁵ Sakatǝ Yɛsu wula apǝri dlamiyir ndzi tara whuiya sǝngui akwanda hang, dzǝ ka ntsǝha mambǝl nam kulɗa ni. Dzǝ ka nkǝrɛ, “Gǝ mambǝl nam kulɗa nam tara mǝrti zǝr ni kulang ba kura ada ndǝrɛ, Yi tsau ala gǝ, sǝba akwa dzari ba, ta gǝ ta lǝkwa dzari kadamwa kǝra.”

²⁶ Satan ni ka ndǝri lǝlɛ, dzǝ ka baktsǝni zǝrǝrni akwa vui nam kulɗa, ani dzǝ ka sǝba. Zǝr ni ka ndzai apa dzǝ sai nam tǝ ndzǝ hang nkǝrɛ, “Dzǝ kǝ nti.”

²⁷ Ama Yɛsu ngǝzi tsiyari ka hyanti tǝni ata thlǝlari, ba dzǝ ka hyati.

²⁸ Sakatǝ Yɛsu tara livi, ndzǝr nuwurni ka yu tǝni ɗǝwa-ɗǝwa apǝri, “Kami kura yar ta mǝzi kǝdlǝba tǝni?”

²⁹ Dzǝ ka sǝnau, “Ai dzǝli mambǝl nam kulɗa ǝni ata sǝba ɗiɗi tar aka aduwa.”

³⁰ Dar ka ngyar vui nda ka kwatsǝni akwa Galili. Yɛsu adi ada bara ka kǝlara ndǝ zǝndi vui nam tǝ dar akwa wɛ,

³¹ kadǝbar dzǝ ada hyipɛ ala ndzǝr nuwurni. Dzǝ ka nkǝrɛ ala dar, “Ndɛ ata siya ɓǝlai Zǝr Ndɛ ka la tǝni ala ndzǝ nam ata tsi tǝni, ama aghǝla vǝr makǝr dzǝ ata hyati aka mpikɛ.”

³² Ama dar ta ngaba sǝ nam tǝ dzǝ ada nkǝr ni wɛ, dar ada hyivǝr yu tǝni ata kǝri.

Wa ani Ngga Ta sang?

³³ Dar ka si akwa Kafarnahum. Sakatǝ dzǝ akwa kǝi ni, dzǝ ka yu tǝ dar, “Mǝ tǝ gǝri ada ɓwalnya ata kǝri akwa whal ni?”

³⁴ Ama dar ndzai kǝɗǝk, kadǝbar ata whalɛ dar ada ɓwalnya kaka kǝma dar ata kǝra wa ani ata ndzai ngga ta sang.

³⁵ Sakatǝ dzǝ ndzai dzǝ ka kǝga ndzǝr nuwurni kum kapu sǝɗɛ asi adzǝni, dzǝ ka nkǝrɛ ala dar, “Ma ndǝ nam ada bara ka dzǝ ndzai tangkǝma, kǝ ndzai ntsakǝr ka dzǝ ndzai aghǝli ta sang, kǝ ndzai ntsakǝr dzǝ ata ndzai zǝr kǝiyir sanga ndɛ.”

³⁶ Dzǝ ka kǝgati zǝr waza laka ka hyanti akwa ɓwanga dar, dzǝ ka kǝtǝ tǝni akwa ghyimbiyari dzǝ ka nkǝrɛ ala dar apǝri,

³⁷ “Kǝlara ndǝ nam tara dlutsi zǝr waza apa dzǝli ǝni akwa thlǝmawai, Yi dza tǝ dzǝ tara dlutsi, ndǝ nam tara dlutsi tǝra tsuwɛ, adi Yi tǝ dzǝ dlutsi wɛ, ama dzǝ dlutsi ndǝ nam tara hya tǝra.”

Kǝlara Ndǝ nam Kura Dawar Muri Dzǝ Nǝmuri

³⁸ Ani Yawhana ka nkǝrɛ alari apǝri, “Malǝm yar wula ndǝ laka ada kǝdlǝba mambǝl nam kulɗa yarɛ akwa dzá ndɛ akwa thlǝma gǝ, ani yar nkǝrɛ alari ka dzǝ ngyar, kadǝbar dzǝ adi akwa ntsa muri wɛ.”

³⁹ Ama Yɛsu nkǝrɛ alari apǝri, “Ta gǝri kanti alari, ndǝ nam tara 'yati sǝr ndati akwa thlǝmawai, ata sakari ka dzǝ nkǝrɛ su kulɗa ata kǝrawai adi wɛ.

⁴⁰ Kadǝbar kǝlara ndǝ nam kura dawar muri dzǝ nǝmuri.

⁴¹ Kǝlara ndǝ nam tara la gǝri yimǝr sa akwa thlǝmawai kadǝbar gǝri nǝr Kǝrsti, dzǝri Yi ada nkǝrɛ ala gǝri dzǝri apǝri wadzǝɓarni adi ata kǝntadzi nkyiɗu laka wɛ.”

Sǝr Hau Ndɛ ka 'Ya Biku

⁴² Yɛsu lǝkǝma aka nkǝrɛ, “Ba ma kǝlara ndǝ nam tara hau duku akwa ntsa waza yarni nam tara mbǝrsa akwa yɛ ka 'ya biku, ata ndzai kudzǝ alari ka ndǝ mbau burɛ nam ngga akwa wuyari ba ka ndǝ ɗalu tǝni akwa manda nam saɓǝl.

⁴³ Ma tsiya gǝ ani ata hau tǝngɛ ka gǝ 'ya biku, dǝlnta tǝni, ata ndzai kudzǝ ka gǝ lǝkwa mpikǝ nam kura kurkuri aka tsai duku, alaka tǝ gǝ awa lǝkwa u'u kura kuri aka tsiya gǝ sǝɗɛ, akwa vui u'u nam kura ada nti. [

⁴⁴ Adzǝ kwaɗǝnar ɗǝ tǝ dar adi ada nga nti wɛ, u'uwari tsuwɛ ndǝ adi ada tsai wɛ.]

⁴⁵ Ma thlǝla gǝ ani ata hau tǝngɛ ka gǝ 'ya biku, ka gǝ thlanta tǝni, ata ndzai kudzǝ ka gǝ lǝkwa mpikǝ nam kura kurkuri kadal, alaka tǝ ndǝ awa ɗalu tǝngɛ akwa u'u kura kuri aka thlǝl sǝɗɛ.

⁴⁶ Adzǝ kwaɗǝnar ɗǝ tǝ dar, adi ada nga nti wɛ, u'uwari tsuwɛ ndǝ adi ada tsi wɛ.

⁴⁷ Ma apǝri ntsa gǝ ani ata mǝrti tǝngɛ ka gǝ 'ya biku, ka gǝ kwaɗǝba tǝni. Ata ndzai kudzǝ ka gǝ lǝkwa kuhyikur Hyal agwaɗang alaka tǝ ndǝ awa ɗalu tǝngɛ akwa u'u kura kuri aka ntsi sǝɗɛ.

⁴⁸ Vui nam tǝ “ ‘kwaɗǝnar dar adi ada nga nti wɛ, ba u'uwari tsuwɛ adi ada tsidzi wɛ.’

⁴⁹ Kǝlara ndɛ ata ndzai apa kagǝla atar kǝtsǝnta aka u'u.

⁵⁰ “Kagǝla ɗaku, ama ma kagǝla kǝ ndǝghǝi aka sǝɗakurni, tǝ mi tǝ ndǝ awa dzǝguti sǝɗakurni? Ka gǝri ndzai aka kagǝla akwa ɗǝfa gǝri, ba ka gǝri ndzai lapiya kaka kǝma gǝri.”