Markusu 7 - Kibaku NT

Kǝtsǝkǝtsi ba Kura Kǝtsǝkǝtsi

¹ Ndzǝr Farisi yarɛ kaka malǝmǝr mabari yarni nam tara si akwa Ursalima ka tsaɓtsǝnidzi adzǝ Yɛsu ka

² wuti laka ndzǝr nuwurni ada sǝm sǝr sǝmɛ aka tsai nam “ghyǝmbur,” nam ani kura kǝtsǝkǝtsi.

³ (Akuya Farisi ba sanga ndzǝr Yahudi ada nu hyipɛ nam tǝ dar ɓui aka ndzǝr dar nam watsi, dar adi ada sǝm sǝ wɛ tar ma dar kǝtsǝnta tsiya dar akwa whal nam kal-kal.

⁴ Tsuwɛ dar adi ada sǝm sǝ nam tara si akwa kasuku wɛ tar ma dar kǝtsǝnta kwataku. Antǝ dar ada nu su hang nam tǝ dar ɓui apa whal nam kal-kal nǝr kǝtsǝnta kapu yarɛ, tǝghum yarɛ ba ibǝrisu yarɛ.)

⁵ Ani ndzǝr Farisi kaka malǝmǝr mabari yarni ka yu Yɛsu, “Kami kura ndzǝr nuwur ngɛ ada ndzai apa tǝ sǝr kaká nǝr ndzǝ ngga-ngga yarɛ tara vi kami tǝ dar ada sǝm su kura ‘kǝtsǝkǝtsi’ tsai yarɛ?”

⁶ Yɛsu ka sǝnau ala dar, “Gǝri ndzǝ kǝlikatsaɗǝm yarɛ! Isaya gha dzǝri sakatǝ dzǝ 'ya nabikur ata kǝra gǝri; apa rǝbwa-rǝbwa: “‘Ndzi yarɛ ni dar ada lai nggakur ata kutsǝr nya dar, ama ɗǝfa dar pǝɗǝm ta yɛ.

⁷ Dar ada vǝkǝr sǝlai alai ɓǝrtu; kadǝbar dar ada hyipǝ tsau yarɛ nǝr ndzi apa dar mabariyirna yarɛ.’

⁸ Gǝr ngyar mabariyir Hyal gǝri ka ngǝzi sǝr kaká nǝr ndzi.”

⁹ Ba dzǝ ka nkǝrɛ ala dar: “Gǝri aka bǝrkawakur ngǝla mabariyir Hyal ata vuiya ka gǝri ɓǝlati sǝr kakár gǝri.

¹⁰ Akuya Musa nkǝrɛ, ‘Vǝkǝr sǝlai ala baba ba mamar ngɛ,’ ba, ‘Kǝlara ndǝ nam tara ngǝli atǝgǝri wala angǝri kǝ ndzai ntsakǝr ka ndǝ tsi tǝni.’

¹¹ Ama gǝri ada nkǝrɛ apǝri ma ndǝ nam tara nkǝrɛ ala atǝgǝri wala angǝri: ‘Kǝlara sǝr mbana nam tǝ gǝ ata ɓui akai ani Kauban’ (nam ani, sǝga tǝ ndǝ vi ala Hyal),

¹² antǝ gǝri tsu adi ata ngyar tǝni ka ndǝ 'ya kǝlara su ala atǝgǝri wala angǝri wɛ.

¹³ Ani gǝri mǝrti ndǝrǝr Hyal kura tsu aka paida ata nyar sǝr hyipǝr gǝri. Ba gǝri ada 'ya sǝ hang apa ǝnda.”

¹⁴ Yɛsu dzakti kǝga dlamiyir ndzi adzǝni ka nkǝrɛ, “Siyamɛ thlǝmɛ alai, kǝlara ndɛ, ka ngaba ǝni.

¹⁵ Sǝ adai nam ada hyati abǝla ka lǝkwa dzá ndǝ nam ada mǝrti tǝni ‘kura kǝtsǝkǝtsi’ wɛ, tar sǝ nam ada sǝba akwa kuta ndɛ ani ada mǝrti tǝni kura kǝtsǝkǝtsi. [

¹⁶ Ma kǝlara ndǝ nam aka thlǝmǝr ngati, ngyar ka dzǝ ngati.]”

¹⁷ Aghǝla tǝ dzǝ tara ngyar dlamiyir ndzi ni ka livi, ndzǝr nuwurni yu tǝni ata kǝra karabu ni.

¹⁸ Dzǝ ka yuwɛ, “Kami tǝ kǝra gǝri kǝgǝɓu? Gǝr ta wula apǝri sǝ adai nam tara hyati abǝla ka lǝkwa dzá ndɛ ata mǝrti tǝni ‘kura kǝtsǝkǝtsi’ wɛ?

¹⁹ Akuya adi ada lǝkwa ɗǝfari wɛ ama akwa kutari, antǝ ada sǝba akwa dzari.” (Akwa nkǝrɛ ǝni, Yɛsu thlanta apǝri sanga sǝr sǝmɛ “kǝtsǝkǝtsi.”)

²⁰ Dzǝ lǝkǝma ka nkǝrɛ: “Sǝ nam ada sǝba akwa ɗǝfa ndɛ ani ada mǝrti tǝni ‘kura kǝtsǝkǝtsi.’

²¹ Akuya akwa, ɗǝfa ndɛ, tǝ ɗǝnga nam kulɗa ada sǝba, badawikur, hǝlɛ, tsai ndɛ, bara mwalar ndɛ,

²² lambwakur, imaikur, zǝla ndɛ, kura sǝlaikur, ngǝktǝkur, gha ndɛ, haɓǝkǝr, ba dlangkur.

²³ Sanga sǝr Satan ǝni ada sǝba akwa ɗǝfa ndɛ ka mǝrti ndǝ ‘kura kǝtsǝkǝtsi.’ ”

Hamnta Dzǝrǝr Mwala Ndǝ kura Yahudi

²⁴ Yɛsu ka ngyar vui ǝnda ka tǝra akwa diyir nam kudzǝghɛ adzǝ Taya. Dzǝ ka livi akwa kǝi nam tǝ dzǝ adi ada bara ka kǝlara ndǝ zǝndi wɛ; wala ahani dzǝ adi mǝzi ka ndzai ɗǝwa-ɗǝwa wɛ.

²⁵ Tǝkǝma tǝ mwala ni ngati ata kǝrari, mwala nam tǝ nkwarni aka mambǝl nam kulɗa akwa dzari ka si dla ata thlǝlari.

²⁶ Mwala ni dzǝ ndǝr Gǝriku, tǝ ndǝ ya tǝni akwa Finikiya akwa diyir Siriya. Dzǝ ka kǝgyǝ Yɛsu ka dzǝ kǝdlǝba mambǝl nam kulɗa akwa dzá nkwarni.

²⁷ Dzǝ ka nkǝrɛ ala mwala ni, “Tangkǝma ngyar ka madausai yarni ka dar sǝm sanga sǝ nam tǝ dar ada bara, akuya adi kal-kal ka ndǝ kǝti sǝr sǝmǝr madausai ba ka ndǝ punta ala kǝyar dar yarɛ wɛ.”

²⁸ Dzǝ ka kalaktsǝni, “A, Thlaku, ama wala akwi tɛbǝr ma kǝya ada kwasɛ ɗǝvǝr madausai yarɛ nam tara puntadzi.”

²⁹ Antǝ dzǝ gha alari, “Akuya dzǝli ni, mwari alivi; mambǝl kulɗa ni kǝ ngyar nkwar ngɛ.”

³⁰ Dzǝ ka tǝra alivi ka ɓui nkwarni ada pi ata dǝgǝl, ba mambǝl kulɗa ni kurta tǝra.

Mbǝti Ndǝ Kulang ba Ndǝ Kura ada Ndǝrɛ ni

³¹ Antǝ Yɛsu ngyar mǝlmǝ nam kudzǝghɛ adzǝ Taya ni ka mwar akwa Sidaun, ka sǝgǝl adzǝ madar Galili ka lǝkwa diyir Dikapaulis ni.

³² Ndzǝ laka ka si alari aka sal laka kulang ba dzǝ adi ada labar ɗa-ɗa wɛ, ba dar ka kǝgyǝ tǝni ka dzǝ pukǝr tsiyari ala dar.

³³ Aghǝla tǝ dzǝ kǝtǝ tǝni ata ngwam, kura adzǝ dlamiyir ndzi ni, Yɛsu ka hau gulandari yarɛ akwa thlǝma ndǝ ni. Antǝ dzǝ kyifǝti nkyǝli ka tsǝkwar kanyara ndǝ ni.

³⁴ Dzǝ wulɛ atahyal, ka pu mpihɛ dzǝgam ka nkǝrɛ alari, “Ifafathla!” (nam ada nkǝrɛ, “Mburnta!”).

³⁵ Tǝkǝma, thlǝma Sal ni mburntadzi, kanyarari ka mpǝlntadzi ba dzǝ ka baditsǝni labar ɗaku.

³⁶ Yɛsu ka tsau ala dar ta dar ta gha ala kǝlara ndɛ. Ama dzǝ ka 'yati apani ka hang, dar ada lǝkǝma aka labar ata kǝrari.

³⁷ Ndzǝ ka ghǝiyatǝdzi aka sǝr ndati. Dar ka nkǝrɛ, “Dzǝ kǝ 'yati kǝlara su ɗaku, dzǝ mǝrti kulang ka ngati ba, ndzǝ nam kura ada mǝzi ndǝrɛ ada labar.”