Markusu 4 - Kibaku NT

Karabu ata Kǝra Ndǝr Ɓutsǝ Kulfɛ

¹ Yɛsu baditsǝni hyipɛ kadamwa ata nya mandar Galili. Ndzǝ nam tara tsaɓtsǝnidzi adzǝni 'ya hang tǝ dzǝ lǝkwa sar ka ndzai akwa, antǝ ndzǝ ni ka hyati ata nya yimi.

² Dzǝ kǝthlǝr aka karabu ka hyipɛ ala dar sǝ hang tǝ dzǝ nkǝrɛ apǝri,

³ “Siyamɛ thlǝmɛ! Ndǝr tsǝwhu laka tǝra lǝba thlǝka kulfɛ.

⁴ Sakatǝ dzǝ ata kǝra ɓutsǝ kulfǝ ni, laka yarɛ ɗi akwa kuta whalɛ, ba ika yarɛ ka siya sǝnya tǝ dar.

⁵ Laka yarɛ ka ɗi ata vui paya-paya yarɛ, kura hai hang ati. Dar ka ntsi bǝtǝbǝtu, kadǝbar tǝ hai adi ati hang wɛ.

⁶ Ama sakatǝ tsǝtsi sǝba, dar ka kǝuntadzi, ba dar ka mbantadzi kadǝbar dar adi aka ngǝyang wɛ.

⁷ Kulfǝ laka yarɛ ɗu akwa ntsa ntsǝkǝɗa yarɛ, ntsǝkǝɗa yarni ka kǝlakǝrdzi ala fu yarni ba dar ka ngyalti tǝ dar, ani ka dar ta yai munya wɛ.

⁸ Kulfǝ laka yarɛ tsuwɛ ka ɗi ata hai nam ɗaku. Dzǝ ka ntsi, ba dzǝ ka kǝli ka yai munya ka makǝr thlani, nkwathlani, wala lǝbar kumthlani.”

⁹ Antǝ Yɛsu ka nkǝrɛ, “Ndǝ nam aka thlǝmɛ, ngyar ka dzǝ ngati.”

¹⁰ Sakatǝ Yɛsu dzǝ ɗiɗi, ndzǝ nam tara ngati tǝni, si adzǝni kaka ndzǝr nuwurni kum kapu sǝɗɛ ka yu tǝni ka dzǝ nkǝrba ala dar karabu yarni.

¹¹ Dzǝ ka nkǝrɛ ala dar. “Ndǝ la gǝri asǝrǝr kuhyikur Hyal.” Ama ndzǝ nam abǝla ni dar ata nga sanga su akwa karabu.

¹² Ani ka, “Dar ata ndzai ka wulɛ ama dar adi ata saga wula wɛ, ba dar ata ndzai ka ngati ama dar adi ata saga ngaba wɛ; Ma apǝri dar wuti ka ngaba, dar ata tubi ka si adzǝ Hyal, ba dzǝ ata kyifǝnta ala dar.”

¹³ Yɛsu yu tǝ dar, “Gǝr ta ngaba karabu ni wɛ? Apa madi dzá tǝ gǝri ata ngaba karaburna?

¹⁴ Ndǝr ɓutsǝ kulfǝ ni thlǝkati labarǝr Hyal.

¹⁵ Ndzǝ laka apa kulfǝ nam tara ɗi ata kǝra whalɛ sakatǝ dar ngati labar ni, Satan si ka mbuli atǝra.

¹⁶ Ndzǝ lakari apa kulfǝ nam tara ɗi ata vui paya, sakatǝ dar ngati labarǝrni dar dlutsi aka kutsari.

¹⁷ Ama tǝ labar ni ta lǝkwa ɗǝfa dar pǝɗǝm wɛ, dar ta sǝkar wɛ. Sakatǝ damitsǝnidzi wala bwanai tara ɓui tǝ dar kadǝbar labar ni, dar ngyar ata saka duku.

¹⁸ Ndzǝ laka dar apa kulfǝ nam tara ɗu akwa ntsǝkǝɗa, dar ani ndzǝ nam tara ngati labar ni.

¹⁹ Ama kadǝbar damitsǝnidzi ka sǝr dunya, ba yiɗǝ bara bǝrbakur kaka sanga su damwa, kǝ tsaɓtsǝnidzi ka kǝlnta labar ni, antǝ dar ta ya munya wɛ.

²⁰ Ama ndzǝ laka dar apa kulfɛ nam tara ɗi ata vui nam ɗaku, dar ngati labar ni ka dlutsi, ka ya munya, laka makǝr thlani, laka nkwathlani, antǝ laka kumthlani.”

Pitǝla ata Sǝr Vǝti

²¹ Yɛsu lǝkǝma aka labar ni apǝri, “Ndǝ adi nam ada ngiti pitǝla ka vi akwi kugwa wala ka dzǝ vi akwi dǝgǝl ya? Kǝna dzǝ adi ata vi ata kǝra sǝr vǝ tǝni wɛ?

²² Kǝlara sǝ nam ɗǝwa-ɗǝwa ata sǝba ata babal, antǝ kǝlara sǝ nam mbumbwɛ ata mburntadzi.

²³ Ngatamɛ, ma gǝri aka thlǝmǝr ngati!”

²⁴ Dzǝ dzakti gha ala dar, “Vǝdzǝmɛ hankal aka sǝ tǝ gǝri ngati! Ma gǝri vǝdzǝ hankal ala hyipǝrna, zǝndi nam hang ata ɓuidzi ala gǝri, antǝ gǝri ata dlutsi hangkurari.

²⁵ Kǝlara ndǝ nam akǝri ndǝ ata lari hang; kǝlara ndǝ nam kura akǝri, wala sǝ nam tǝ dzǝ akǝri ma ndǝ ata dlutsi akari.”

Karabu ata Kǝra Kǝlǝr Kulfɛ ni

²⁶ Yɛsu dzakti nkǝr labar, “Kuhyikur Hyal ani apani, ndǝ laka ɓutsǝnta kulfɛ akwa fwakǝrni.

²⁷ Aghǝla vǝr hang tǝ dzǝ ada hanyi ka hyati, uhyi ni ntsi ka lǝkǝma aka kǝlí dzǝ ta zǝndi mǝmi tara 'ya wɛ.

²⁸ Dai aka kǝrni ada mǝrti tǝ kulfɛ ada ya munya, nam tang, kǝdla, aghǝla ǝni, dzǝ haba kǝr ka puntsɛ.

²⁹ Sakatǝ uhyi hǝi, ndǝ ni baditsǝni dlɛ, akuya sakar dlǝ uhyi 'ya.”

Karabu ata Kǝra Munyar Bwala

³⁰ Kadamwa dzǝ nkǝrɛ, “Sǝr mi tǝ muri awa nkǝrti kuhyikur Hyal ni akari, wala karabu madi tǝ muri awa kǝthlǝr akǝri ka dzǝ nkǝrba ala muri tǝni?

³¹ Dzǝ apa munyar bwala, nam ani munya nam nkyiɗu ta sang tǝ gǝ thlǝkati akwa dai.

³² Aghǝla ǝni sakatǝ gǝ thlǝkati, dzǝ kǝlí ka ndzai fu nam nga ta sang akwa sanga fu yarɛ nam akwa fwaku ni, aka dzǝli tsizu yarɛ nam ngga-ngga nam tǝ ika yarɛ ada pati kǝiyir dar akwa sanguraiyari.”

³³ Yɛsu hyipɛ ala ndzi ka kǝthlǝr aka karabu hangkurari apa dzǝli ǝni akwa whal nam tǝ dar ata mǝzi ngaba dzǝri.

³⁴ Dzǝ adi ada labar ala dar kura aka karabu wɛ, ama sakatǝ dar kaka ndzǝr nuwurni ɗiɗi, dzǝ ada nkǝrba sanga su ala dar.

Yɛsu Hyanti Sambar ni

³⁵ Tsu vǝr nda avǝrvǝri, Yɛsu nkǝrɛ ala ndzǝr nuwurni, “Mur fǝlba tǝbwanda mandar Galili.”

³⁶ Antǝ dar ka ngyar ndzi, ndzǝr nuwurni ka lǝkwa sar nam tǝ Yɛsu ada ndzai akwa, dar ka kǝtǝ tǝni. Sar damwa yarɛ nam adai akwanda yɛ ka nuti tǝ dar.

³⁷ Ta sakar wɛ sambar nam aka dǝna baditsǝni padɛ, antǝ takur yimi baditsǝni pu yimi akwa sar ni, har ada bara ghǝiyati.

³⁸ Yɛsu aghǝl ata kuɗa sar ni ada hanyi aka kǝrari ata biyir. Ndzǝr nuwurni hyanti tǝni ka nkǝrɛ alari, “Malǝm, gǝ ta damitsǝnidzi apǝri muri angwada ntsǝghǝldzi wɛ?”

³⁹ Yɛsu hyati ka ɗǝmnya ala sambar, “Ndzi kǝɗǝk!” Antǝ dzǝ gha ala takur yimi apǝri, “Hyati dam kura kukutsu!” Sambar ta padɛ wɛ antǝ sanga su 'ya sǝrai.

⁴⁰ Yɛsu nkǝrɛ ala ndzǝr nuwurni, “Kami tǝ gǝri ada hyivǝr? Har kulini gǝri adi aka hamnta ndzǝr wɛ?”

⁴¹ Dar ada hyivǝr antǝ dar gha ala kǝma dar, “Ndǝ ni dzǝ warɛ? Har ma sambar kaka takur yimi ma ada ngandǝrɛ alari!”