Markusu 16 - Kibaku NT

Hyati akwa Ntǝnti ni

¹ Sakatǝ vǝr Sǝbdu tara kwatsǝni, Maryamu Magǝdaliya ba Maryamu angǝra Yakubu ba Salaumi dar ɗǝlba sǝ sǝwur nam sǝɗa, ani dar ka mwari akǝr ka dar pukǝr ala dzá Yɛsu.

² Tsu kula-kula mbǝk, sakatǝ tsǝtsi ada sǝba akwa baditsǝni vǝr nǝr tang akwa magu dar ka si akwa vui kulari,

³ dar ada yu kǝma dar, “Wa ani ata mbǝyanta paya nam ata nya kul ni?”

⁴ Ama sakatǝ dar haɓǝti ntsa dar ada wulɛ, dar wula payari ma kurtaka bagǝlntadzi. (Payari ngga dzǝri.)

⁵ Sakatǝ dar lǝkwa kulari, dar ka wula zǝr dakwai aka lǝkutu mwapu ada ndzai tǝbwar tsisǝmɛ, ka 'ya ala dar sǝr ndati.

⁶ Dzǝ nkǝrɛ ala dar apǝri ta gǝri ta ndatǝdzi mai, “Gǝri ada bara Yɛsu ndǝr Nazarat nam tǝ ndǝ kukwanta tǝni. Dzǝ hyati! Dzǝ tsu adi akwani wɛ. Wulamɛ vui nam tǝ dar panyi tǝni ati.

⁷ Ama mwaramɛ ka gǝri nkǝrɛ ala ndzǝr nuwurni yarɛ ba Bitrusu apǝri, ‘Dzǝ ata mwari akwa Galili kǝmata gǝri. Akwanda gǝri ata wula tǝni apa tǝ dzǝ nkǝrɛ ala gǝri.’ ”

⁸ Mwahyi yarni ka ɗǝghǝba akwa kul ni aka ndatǝdzi ba yakatsǝnidzi. Dar ta nkǝr mima ala ndǝ wɛ kadǝbar dar ada hyivǝr.

Yɛsu Tsantǝdzi ba Mwari alǝti Atahyal

⁹ [Sakatǝ Yɛsu hyati kula-kula mbǝk ata vǝr nam tang akwa magu, dzǝ tsantǝdzi tangkǝma ala Maryamu Magǝdaliya mwala nam tǝ dzǝ kǝdlǝba mambǝl nam kulɗa murfwɛ akwa dzari.

¹⁰ Dzǝ mwari ka nkǝrɛ ala ndzǝ nam tǝ dar ndzai atakǝmaduku kaka Yɛsu ba ndzǝ nam ada, sǝngǝlɛ ba tuwa.

¹¹ Sakatǝ dar ngati, tǝ dzǝ ada nkǝrɛ apǝri Yɛsu aka mpikɛ, ani tǝ apǝri dzǝ wula tǝni, dar ngǝla mbǝrsa akǝri.

¹² Aghǝla sǝ yarni Yɛsu tsantǝdzi akwa dludzi laka pam ala ndzǝr nuwurni sǝɗɛ, sakatǝ dar ada akwa whalɛ mǝlmɛ.

¹³ Dar ngaba si ka nkǝrɛ ala laka ndzǝr nuwɛ, ama dar ta mbǝrsa ala dar tsuwɛ.

¹⁴ Aghǝla ǝnda Yɛsu tsantǝdzi ala kum kasutang, sakatǝ dar ada ndzai tǝ dar ada sǝm sǝr sǝmɛ. Dzǝ ɗǝmnya ala dar kadǝbar tǝrkur hamnta dzǝri dar kaka ɓaɓalkur ɗǝfa dar, kadǝbar dar ta mbǝrsa aka ndzǝ nam tara wula tǝni aghǝla hyatǝrni wɛ.

¹⁵ Dzǝ ka ɓakta nkǝrɛ ala dar apǝri, “Mwaramɛ akwa kuta dunya sang ka gǝri nkǝr ndǝrǝr Hyal nam sǝɗa ala kǝlara ndzǝ nam tǝ Hyal hǝnti.

¹⁶ Ndǝ nam tara mbǝrsa ka ndǝ 'yati alari bamtizǝma dzǝ ata ɓui mbatǝdzi, ama ndǝ nam kura ta mbǝrsa ndǝ ata 'ya alari haka.

¹⁷ Par sǝ yarni dar ata nu ndǝ nam tara mbǝrsa: akwa thlǝmawai dar ata kǝdlǝba mambǝl nam kulɗa; dar ata 'ya labar aka nya bǝlin;

¹⁸ Dar ata kǝtǝ pwapu aka tsiya dar; ba sakatǝ dar sa kǝlbu, adi ata 'yanta tǝ dar wala nkyiɗu laka wɛ; dar ata pukǝr tsiya dar ala ndzǝ nam kura kalang, ba dar ata ɓui lapiyakur.”

¹⁹ Aghǝla tǝ Thlaku Yɛsu ndǝrɛ ala dar, ndǝ ka dlutsi tǝni alǝtahyal, ka ndzai tǝbwar tsisǝma Hyal.

²⁰ Antǝ ndzǝr nuwɛ ka tǝra tǝ dar ada nkǝr ndǝrǝr Hyal nam sǝɗa akwa kǝlara vui. Thlaku ada kǝthlǝr atar dar ka tsanti sǝ nam tǝ dar nkǝrɛ aka par sǝr ndati hang.]