Markusu 14 - Kibaku NT

Ndǝ Pukǝr Mal ala Yɛsu akwa Baitanya

¹ Kulini ani vǝr sǝɗɛ kǝma ta Wudzǝr Ngǝmba ni aka Wudzǝr Mantsǝkǝl nam kura Thlǝlam. Ndǝ nggar fǝrist yarni kaka malǝmǝr mabari yarni ada bara whal nam tǝ dar awa ngǝti Yɛsu ɗǝwa-ɗǝwa, ka dar tsi tǝni;

² Ama dar nkǝrɛ ala kǝma dar, “Muri adi ata 'ya tǝni sakar sataka wɛ, kadǝbar ta dar ta 'ya lǝkǝdzikur.”

³ Yɛsu akwa Baitanya aivi ahar Simaun, ndǝ nam tara ɗar bwanai aka kutǝlikur. Sakatǝ Yɛsu ada sǝm sǝr sǝmɛ, mwala laka si aka gira tǝ ndǝ 'ya tǝ alabasta ghǝi-ghǝi aka wardi nǝr nardi tǝ kwapari dzau. Dzǝ thlu gira ni ka pukǝr wardi ni ata kǝra Yɛsu.

⁴ Ndzǝ laka akwandari ɗǝfa dar sǝwa tǝ dar ada nkǝrɛ ala kǝma dar, “Mǝ paidar gyalnta wardi ni?

⁵ Kudzǝ ma apǝri ndǝ ɗǝlnta wardi ni ka ndǝ ɓui ɓwalta kwapa yimi-yimi nǝr lipǝla kumthlani makǝr, ka ndǝ la ndzǝ ngudi.” Ani dar ɗǝmnya alari dzau.

⁶ Ama Yɛsu nkǝrɛ, “Ngyaramɛ tǝni! Kami tǝ gǝri ada damitsǝni tǝni? Dzǝ 'yati sǝ nam ɗaku ba dakwai alai.

⁷ Ndzǝ ngudi kǝlara saka dar vwam kaka gǝri, ani kǝlara sakatǝ gǝri bara, gǝri ata dlar tǝ dar. Ama kǝlara saka gǝri adi ata ɓui tǝra wɛ.

⁸ Dzǝ 'ya sǝ nam tǝ dzǝ mǝzi, dzǝ pukǝr wardi ata dzawai ka dzǝ ɗǝmhǝdzi kǝma ta sakar har tǝra.

⁹ Kulini, Yi ada nkǝrɛ ala gǝr dzǝr dzǝri, apǝri kǝlara vui tǝ ndǝ nkǝr ndǝrǝr Hyal nam sǝɗa akwa sanga dunya, sǝ tǝ dzǝ mǝrti ata ndzai sǝr nkǝrɛ ka ɗǝngati tǝni.”

¹⁰ Antǝ Yahuda Iskaryauti, pathlu akwa ntsa ndzǝr nuwɛ kum kapu sǝɗǝ ni, mwari adzǝ nggar fǝrist yarni kadǝbar ka dzǝ ɓǝlai Yɛsu ala dar.

¹¹ Dar 'ya kutsari ka nga sǝ tǝ dzǝ ata gha, ka alkawal ka lar kwapa. Ani Yahuda baditsǝni wul whal hamnta Yɛsu ala dar.

Yɛsu Sǝm Sǝr Sǝmǝr Tǝhaku kaka Ndzǝr Nuwurni nǝr Dǝnta

¹² Akwa vǝr tangkur nǝr Wudzǝr Mantsǝkǝl kura Thlǝlam, vǝr nam tǝ ndǝ thlakǝr wuya ala zǝr agam nǝr Wudzǝr Ngǝmba, ndzǝr nuwur Yɛsu ka yu tǝni, “Akwa madi tǝ gǝ ada bara ka yar mwar ka ɗǝmhǝi sǝr sǝmǝr Ngǝmba ala gǝ?”

¹³ Ani ba dzǝ ka hya sǝɗɛ akwa ntsa ndzǝr nuwurni, tǝ dzǝ nkǝrɛ ala dar, “Mwaramɛ aivi akwa kuta mǝlmɛ, gǝri ata wula sal laka ada kǝl yimi akwa tǝghum ka gǝri nu tǝni.

¹⁴ Akwa kǝi nda nam tǝ dzǝ ata lǝkwa, nkǝrɛ ala thlakǝr kǝiyari apǝri, ‘Malǝm ada yuwɛ: Akwa madi fǝr nam tǝ Yi ata sǝm sǝr sǝmǝr Wudzǝr Ngǝmba kaka ndzǝr nuwurna akwa?’

¹⁵ Dzǝ ata tsanti ala gǝri fǝr ngga ati ata kǝra kǝmani tǝ ndǝ dzǝguti ka pu kari akwa kutari, ka gǝri ɗǝmhǝi ala muri sǝr sǝmɛ akwanda.”

¹⁶ Ndzǝr nuwurni yarnda ka sǝba ka mwara wala kuta mǝlmɛ, ani dar ka ɓui su apa tǝ dzǝ nkǝrɛ ala dar, ani dar ka ɗǝmhǝi sǝr sǝmǝr Ngǝmba ndari.

¹⁷ Sakatǝ tǝhaku tara 'ya, Yɛsu si kaka ndzǝr nuwurni kum kapu sǝɗɛ.

¹⁸ Sakatǝ dar ndzai ada sǝm sǝr sǝmɛ, Yɛsu nkǝrɛ ala dar apǝri, “Dzǝr dzǝri Yi ada nkǝrɛ ala gǝri pathlu akwa ntsa gǝri ani ata ɓǝlai tǝra, ndǝ nam duku ada sǝmɛ akai atakǝmaduku.”

¹⁹ Ɗǝfa dar ka sǝwa dar ada yu tǝni duku-duku, “Dzǝri adi ata ndzai Yi wɛ?”

²⁰ “Dzǝ sǝnau, ani pathlu akwa ntsa kum kapu sǝɗɛ ni, ndǝ nam ada ntsu mantsǝkǝl akwa kyahǝla duku akai.

²¹ Zǝr Ndɛ ni ata nti tsu apa tǝ ndǝ rǝbwai ata kǝrari. Ama bwasam ala ndǝ ǝnda nam tara ɓǝlai Zǝr Ndɛ ni! Ata 'ya kudzǝ ala ndǝ ni kura ndǝ ta ya tǝni.”

²² Sakatǝ dar ada sǝmɛ, Yɛsu kǝtǝ mantsǝkǝl dzǝ ka vǝkǝr barka, dzǝ ka pwasu dzǝ ka la dar apǝri, “Dlutsamɛ, ǝni ani dzawai.”

²³ Antǝ dzǝ ka kǝtǝ kapu dzǝ ka gwaditsǝni dzǝ ka la dar tǝ dar sang ka sa akwa.

²⁴ Antǝ dzǝ ka nkǝrɛ ala dar apǝri, “Əni ani masǝrna nǝr sǝ mbwa-mbwa, nam tara puntadzi ka ndzi hang.

²⁵ Yi ada nkǝrɛ ala gǝri dzǝr dzǝri, Yi tsu adi ata sa yimǝr inabi ni kadamwa wɛ, si ma vǝr nda, tǝ Yi ata sa bǝlin akwa kuhyikur Hyal.”

²⁶ Ani sakatǝ dar har hǝm Hyal, dar ka mwara lǝba, dar ka tǝra akwa Payar Zaitun.

Yɛsu Nkǝrɛ apǝri Bitrusu ata Ɓwalnta Nyarni

²⁷ Ani ba Yɛsu ka nkǝrɛ ala dar, “Gǝr sang ata mbuthlǝlɛ ka ngyar tǝra, kadǝbar ndǝ rǝbwai: “ ‘Yi ata baktsǝni ndǝr ɓǝlari, Ka tǝmarni kikilntadzi.’

²⁸ Ama aghǝla tǝ Yi tara hyati, Yi ata tǝra kabutu gǝri ta mwari akwa Galili.”

²⁹ Bitrusu ka nkǝrɛ alari apǝri, “Ma apǝri sanga dar dla ka ngyar tǝngɛ, Yi adi ata ngyar tǝngɛ wɛ.”

³⁰ Yɛsu sǝnau alari apǝri, “Dzǝr dzǝri Yi ada nkǝrɛ ala gǝ, akwa kuta vǝr ǝni ma, ma vukum ta tuwa ka sǝɗɛ, gǝ ata nkǝrɛ apǝri gǝ ta zǝndi tǝra wɛ ka makǝr.”

³¹ “Ama dzǝ ka haɓǝtǝ kuɗahari aka dǝna dzǝr dzǝri, ma apǝri kǝ ndzai ntsakǝr mwa ata nti vwam atakǝmaduku aka gǝ, Yi adi ata nkǝrɛ apǝri Yi ta zǝndi tǝngɛ wɛ.” Ani ahani tsuwɛ tǝ sanga dar nkǝrɛ.

Gatsamani

³² Antǝ dar ka mwari akwa vui laka tǝ ndǝ ada ka tǝ Gatsamani, ba Yɛsu nkǝrɛ ala ndzǝr nuwurni, “Ndziyamɛ akwani ma Yi ada 'ya aduwa.”

³³ Antǝ dzǝ ka fati Bitrusu aka Yakubu ba Yawhana vwam kaka dza, dzǝ ka baditsǝni sǝzɛ aka damitsǝnidzi.

³⁴ Antǝ dzǝ ka nkǝrɛ ala dar, “Ɗǝfawai dlidzi dzau aka sǝzɛ apa Yi awa nti,” dzǝ ka nkǝrɛ ala dar. “Ndziyamɛ akwani ka gǝr wulɛ.”

³⁵ Ani dzǝ ka dakǝmadzi nkyiɗǝ laka, dzǝ ka dla ata dai dzǝ ka 'ya aduwa apǝri ma awa 'ya, ka saka ǝni kwatsǝni alari.

³⁶ Dzǝ nkǝrɛ, Abba, Bana, “Sanga su butu ala gǝ, kǝlnta alai Bwanai ni, ama adi apa tǝ Yi ada bara wɛ ama apa tǝ gǝ ada bara.”

³⁷ Dzǝ dzakti si adzǝ ndzǝr nuwurni ka ɓui tǝ dar ata hanyi, dzǝ ka nkǝrɛ ala Bitrusu, “Simaun, gǝ ada hanyi? Gǝ adi ata mǝzi sǝkǝba su wala nǝr awur duku wɛ?

³⁸ Ka gǝri sǝkɛ ba 'ya aduwa ani ka ta gǝri ta ɗu akwa sǝr nkǝrti. Mambǝl ni ada bara, ama kumǝr dzɛ adi aka dǝna wɛ.”

³⁹ Dzǝ tǝra kadamwa ka lǝka 'ya aduwa dzǝ ɓakta nkǝr sǝ duku.

⁴⁰ Sakatǝ dzǝ si adzǝ dar, dzǝ ɓakta ɓui tǝ dar ata hanyi, kadǝbar ntsa dar 'ya kǝgǝɓu. Dar ata zǝndi sǝ nam tǝ dar awa nkǝrɛ alari wɛ.

⁴¹ Dzǝ siya dzǝ dar nǝr makǝrkur dzǝ ka nkǝrɛ ala dar apǝri, “Gǝr tsu ada hanyi ba ghǝrbadzi? Kǝ mǝzi! Saka kǝ si, wulɛ, Zǝr Ndɛ kǝ mbǝlaidzi akwa tsiya ndzǝr biku.

⁴² Hyatamɛ ngyar ka muri mwari, wula ndǝr ɓǝlai tǝra kǝ si!”

Ndǝ Ngǝti Yɛsu

⁴³ Ani tsu ata sakari, dzǝ tsu ata kǝra labar ma, Yahuda ka si, pathlu akwa ntsa kum kapu sǝɗɛ. Ba dzǝ aka ndzi hang kaka katsakar kaka zuwa, tǝ nggar fǝrist yarni, ba malǝmǝr mabari yarni, kaka ndzǝ ngga-ngga tara hyanti tǝ dar.

⁴⁴ Kulini ndǝ nam tara ɓǝlai tǝni ni dzǝ kurtaka la dar dabari: apǝri, “Ndǝ nam tǝ Yi tsǝkwar tǝni ani dza, ka gǝri ngǝti tǝni ka gǝri tǝra aka dza tǝ gǝri ada ɓǝla-ɓǝla tǝni.”

⁴⁵ Yahuda mwari kura aka santa saka adzǝ Yɛsu, dzǝ ka nkǝrɛ alari, “Malǝm!” ani dzǝ ka tsǝkwar tǝni.

⁴⁶ Ndzǝ ni ka ngǝti Yɛsu ka ngǝzi tǝni ɓaɓal.

⁴⁷ Ama pathlu akwa ntsa ndzǝ nam ada hyati adzǝni ka ndǝrba katsakarǝrni ka dǝlnta thlǝma pathla zǝr kǝiyir kuhyir fǝrist ni.

⁴⁸ Yɛsu ka nkǝrɛ, “Yi ndǝr lǝkǝma ala ndzǝr lǝkǝdzǝkur ya, nam tǝ gǝri sǝba kaka katsakar ba zuwa ka ngǝzǝ tǝra?

⁴⁹ Tatang vǝr mur kaka gǝri, tǝ Yi ada tsǝlɛ akwa babalǝr fǝr Hyal ama gǝri ta ngǝzǝ tǝra wɛ. Ama kǝ ndzai ntsakǝr ka Labar Hyal ghǝiyabadzi.”

⁵⁰ Antǝ kǝlara ndɛ ngyar tǝni dar ka whuya tǝra.

⁵¹ Zǝr dakwai laka nam ada nu Yɛsu nam tara mbwai zǝr zaɓi. Sakatǝ dar ngǝzi tǝni,

⁵² ama dzǝ ngyar zǝr zaɓi ndari ka whuya tǝrarni anghyaɗu.

Akǝma Ndzǝr Hakar Yahudi

⁵³ Ba dar ka mwara ka Yɛsu adzǝ kuhyir fǝrist, ba sang nggar fǝrist yarni, kaka ndzǝ nam ngga-ngga kaka malǝmǝr mabari yarni, dar ka tsaɓtsǝnidzi.

⁵⁴ Bitrusu ka nu tǝni aghǝli tǝ dabu akwa ɓwanga dar tǝnkur babalǝr kuta kǝiyir kuhyir fǝrist. Dar ndzai akwanda kaka ndzǝr ɓǝla tǝ dzǝ ada mbǝbǝra dzari ata nya u'u.

⁵⁵ Kulini nggar fǝrist yarni kaka sang Ndzǝr Hakar Yahudi ni ada bara ka dar ɓui aibai adzǝ Yɛsu kadǝbar ka ndǝ tsi tǝni, ama dar ta ɓui wɛ.

⁵⁶ Kadǝbar ndzǝ hang thlǝthla hawi ata kǝrari, ama ndǝ nam sakǝidar dar nda dzǝ ata yiɗɛ wɛ.

⁵⁷ Antǝ ndzǝ yar laka hyati ada thla hawi ata kǝrari apǝri.

⁵⁸ “Yar ngati tǝni tǝ dzǝ ada nkǝrɛ, ‘Yi ata whuzanta fǝr Hyal ni nam tǝ ndǝ dza tsati, ba akwa kuta vǝr makǝr Yi ata tsati damwa, nam kura ndǝ dza tsa.’ ”

⁵⁹ Wala ahanarma sakǝidar dar ta yiɗǝ wɛ.

⁶⁰ Antǝ kuhyir fǝrist nda ka hyati akwa ɓwanga dar, ba dzǝ ka yu Yɛsu, “Gǝ adi aka labar nam tǝ gǝ awa nkǝrɛ wɛ? Mǝ dzá tǝ ndzǝ yarni ada gha ata kǝr gǝ?”

⁶¹ Ama Yɛsu ndzai kǝɗǝk, dzǝ ta nkǝr mima wɛ. Kuhyir fǝrist nda ka yu tǝni kadamwa, “Gǝ dza Kǝrsti, Zǝr Ndǝr Barka ni ya?”

⁶² Ba Yɛsu ka nkǝrɛ alari apǝri, “Ani yɛ, ba gǝ ata wula Zǝr Ndɛ ada ndzai ata tsisǝma Hyal nam Ɓwaltasang, ba sǝgǝl ata dlamba atahyal.”

⁶³ Kuhyir fǝrist nda ka thlǝkwanta kariyirni, ka nkǝrɛ, “Kami tǝ muri ada bara sakǝida kadamwa?

⁶⁴ Gǝri ngati gha su kulɗa ata kǝra Hyal wɛ, mi tǝ gǝri nkǝrɛ?” Ani dar sang ada thlanta alari haka apǝri ka ndǝ tsi tǝni.

⁶⁵ Ba ndzǝ yarɛ laka baditsǝni kifǝkǝr alari nkyǝli ndzǝ laka tsuwɛ ada mbui ntsari kaka tasǝ tǝni tǝ dar ada nkǝrɛ alari, “'Ya nabikur!” Ba ndzǝr ɓǝla nyatǝfu yarni ka dlutsi tǝni ba dar tasǝ tǝni.

Bitrusu Ɓwalnta Nyar Zǝndi Yɛsu

⁶⁶ Sakatǝ Bitrusu aghǝli ata babalǝr kuta kǝi ǝnda, pathlu akwa ntsa nkwai nam ada kǝthlǝr ala kuhyir fǝrist nda ka si.

⁶⁷ Sakatǝ dzǝ wuti Bitrusu ada nga bwarbwarkur u'u, dzǝ ka ngikǝba tǝni ɗaku ka nkǝrɛ, “Gǝ ma gǝr vwam kaka ndǝr Nazarat nda, Yɛsu.”

⁶⁸ Ama dzǝ ka ɓwalnta nya apǝri, “Yi ta zǝndi wala ngaba sǝ tǝ gǝ ada labar ata kǝr wɛ.” Ba dzǝ ka mwara lǝba tǝbwar nyatǝfu, ani ahani vukum ka tuwa.

⁶⁹ Ba nkwar kǝi ndari ka wula tǝni akwanda, ani dzǝ ada nkǝrɛ kadamwa ala ndzǝ nam ada hyahyati akwanda, “Sal ni dzǝ pathlu akwa ntsa dar.”

⁷⁰ Ama dzǝ ɓwalnta nya kadamwa. Aghǝla saka nkyiɗǝ laka, ndzǝ nam ada hyati adzǝ Bitrusu nkǝrɛ alari, “Dzǝr dzǝri gǝ pathlu akwa ntsa dar akuya gǝ ndǝr Galili.”

⁷¹ Antǝ Bitrusu nkǝrɛ, “Yi mbǝrɛ apǝri ma Yi adi ada gha dzǝri wɛ ka Hyal lai bwanai! Yi ta zǝndi ndǝ ǝni tǝ gǝri ada labar ata kǝrni wɛ.”

⁷² Ba kura aka santa saka, vukum tuwa nǝr sǝɗǝkur. Antǝ Bitrusu ka ɗǝngati sǝ nam tǝ Yɛsu tara nkǝrɛ alari, “Ma vukum ta tuwa ka sǝɗɛ, gǝ ata ɓwalnta nyarna ka makǝr.” Bitrusu ka baditsǝni tuwa.