Luka 9 - Kibaku NT

Yɛsu Hyanǝba Kumɛ Kapu Sǝɗɛ ni

¹ Sakatǝ Yɛsu kǝga ndzǝr nuwurni kumɛ kapu sǝɗɛ ni atakǝmaduku, dzǝ ka la dar dǝna ba wada ka dar kǝdlǝba sanga mambǝl yarɛ nam kulɗa ba ka dar mbǝti ndzǝr kasuwa yarɛ.

² Ani dzǝ ka hyanǝba tǝ dar alǝba ka dar mwari ka nkǝr ndǝrǝr Kuhyikurǝr Hyal ba ka dar mbǝti ndzǝ nam kura kalang.

³ Dzǝ nkǝrɛ ala dar: “Akwa buraburar gǝri ni, ta gǝri ta kǝl mima—wala zuwa, wala ngǝrkǝr, wala sǝr sǝmɛ, wala kwapa, wala lǝkutǝr damwa pam ta nam tǝ gǝri hadzɛ.

⁴ Kǝlara kǝi nam tǝ gǝri tara livi, ndziyamɛ akwa kǝi nda har vǝr nam tǝ gǝri ata siya ngyar di nda.

⁵ Ma ndzǝ ta dlutsi tǝ gǝri wɛ, ma sakatǝ gǝri ata tǝra ka ngyar di nda, ka gǝri ɓunta bǝr-bǝr nam ata thlǝla gǝri ka dzǝ ndzai apa sakǝida ata kǝra dar.”

⁶ Ani dar ka mwara lǝkwa di yarɛ nam nkyǝnkyiɗu, tǝ dar ada nkǝr ndǝrǝr Hyal nam sǝɗa ba tǝ dar ada mbǝti ndzi akwa kǝlara vui.

⁷ Sakatǝ Hirudus nam nggar diyir Galili, tara ngati ata kǝra sanga sǝ yar nam ada 'ya. Ba dzǝ ka yakatsǝni, kadǝbar ndzǝ laka ada gha apǝri Yawhana ndǝr 'ya bamtizǝma dzǝ tara hyati akwa nti.

⁸ Ama ndzǝ laka ada nkǝrɛ apǝri Iliya ani tara sǝba kadamwa, ndzǝ laka ada gha tsuwɛ apǝri pathlu akwa ntsa nabiyir Hyal yarɛ nam watsi ani tara hyati aka mpikɛ.

⁹ Ama Hirudus ka nkǝrɛ, “Yi dǝlnta kǝra Yawhana; ama wa dzá tǝ Yi ada ngati ndzǝli sǝ yarni ata kǝri?” Ba dzǝ 'ya ka dzǝ wula tǝni.

Yɛsu Ghǝiyati Ndzǝ Kumthlani Kumɛ ka Ntufu ni

¹⁰ Sakatǝ ndzǝr hya yarɛ ni tara si, dar ka tsǝba sǝ nam tǝ dar tara 'yati ala Yɛsu. Antǝ dzǝ ka fati tǝ dar ɗiɗi tǝ dar ka mwari alǝkwa dai laka nam tǝ ndǝ ada ka tǝ Bathsaida.

¹¹ Ama sakatǝ hangkur ndzǝ tara ngati, antǝ dar ka nuti tǝni. Dzǝ dlutsi tǝ dar dzǝ ka nkǝrɛ ala dar ata kǝra kuhyikur Hyal, ba dzǝ mbǝti ndzǝ nam ada bara mbǝtǝdzi.

¹² Sakatǝ tǝhaku angwada bara 'ya, antǝ ndzǝr nuwurni nam kum kapu sǝɗɛ ni ka si ka gha alari, “Ngyar ka dlamiyir ndzi ni tǝra alǝkwa kuta mǝlmǝ yarɛ ba vui yarɛ nam tara dlǝi vui ni, akuya ka dar ɓui sǝr sǝmɛ ba vui pi, akuya vui nam tǝ muri akwani ndzǝ adi akwa wɛ.”

¹³ Ama Yɛsu sǝnau, “La daramɛ su ka dar sǝmɛ.” Dar ka sǝnau, “Sǝ nam aka yar ani mantsǝkǝl takwara ntufu ba kulfa sǝɗɛ ɗiɗi. Tar ma yar mwari ka ɗǝl sǝr sǝmɛ ala sanga hangkur ndzǝ ni.”

¹⁴ (Akuya sǝli ɗiɗi kǝ 'ya kudzǝghɛ aka kumthlani kumɛ ka ntufu akwanda.) Yɛsu ka nkǝrɛ ala ndzǝr nuwurni, “Nkǝramɛ ala ndzǝ ni ka dar ndzai akwa albwa-albwa apa ntufuthlani-ntufuthlani.”

¹⁵ Antǝ ndzǝr nuwurni yarɛ ni ka 'yati apani ba sanga ndzi ka ndzǝndzai.

¹⁶ Yɛsu ka kǝtǝ takwara ntufu ba kulfa sǝɗɛ ni, dzǝ ka haɓǝti kǝrari ka usar Hyal, ka vǝdzǝ barka, dzǝ ka pupwasi ka la ndzǝr nuwurni, dar ka la hangkur ndzǝ ni.

¹⁷ Sanga dar sǝmɛ ka ghǝi, ba ndzǝr nuwurni ka tsaɓtsǝni nam tara mbi wulna kumɛ kapu sǝɗɛ.

Bitrusu Nkǝrba Wa Dza ani Yɛsu

¹⁸ Vǝr laka sakatǝ Yɛsu ada 'ya aduwa dzǝ ɗiɗi, ba ndzǝr nuwurni yarɛ adzǝni; dzǝ ka yu tǝ dar apǝri, “Hangkur ndzi ni ada nkǝrɛ apǝri Yi wa?”

¹⁹ Dar ka sǝnau, “Ndzǝ laka ada gha, gǝ ani Yawhana Ndǝr 'Ya bamtizǝma. Ndzǝ laka ada gha, gǝ ani Iliya, ndzǝ damwa tsuwɛ ada gha apǝri pathlu akwa ntsa nabi yarɛ nam watsi tara hyati aka mpikɛ.”

²⁰ Antǝ dzǝ ka yu tǝ dar, “Ama nǝgǝri, gǝri ada nkǝrɛ Yi wa?” Bitrusu sǝnau ka nkǝrɛ, “Gǝ dza Kǝrsti nǝr Hyal.”

²¹ Ama Yɛsu la dar mbari nam ɓaɓal apǝri ta dar ta gha ǝni ala waima.

²² Ba dzǝ ka gha ala dar apǝri, “Ntsakǝr tǝ Zǝr Ndɛ ata ɗar bwanaiyir sǝ yarɛ hang ba ndzǝ nam ngga-ngga kaka nggar fǝrist yarɛ ba malǝmǝr mabari yarni ata siya ngǝla tǝni, ka dar tsi tǝni, ama akwa vǝri nǝr makǝrkur dzǝ ata hyati aka mpikɛ.”

²³ Antǝ dzǝ ka nkǝrɛ ala sanga dar: “Ma kǝlara ndǝ nam ada bara nu tǝra, ntsakǝr ka dzǝ ngǝla kǝrni, ka dzǝ kǝtǝ undzum kadlǝkadlǝrni tatang vǝri, ka dzǝ nu tǝra.

²⁴ Akuya kǝlara ndǝ nam ada bara ɗǝwar mpikari, antǝ mpikari ata sa, ama kǝlara ndǝ nam tara ngǝla mpikari akuya yɛ, dzǝ ata ɗǝwar tǝni.

²⁵ Ɗakur mi ala ndɛ, ma apǝri dzǝ ɓui ɗǝruwur sanga sǝr dunya, ama mpikari ata sa wala ata nya mpikari?

²⁶ Ma kǝlara ndǝ nam tara nga sǝlai akuya yɛ, ba labarna yarɛ, Zǝr Ndɛ ata siya nga sǝlaiyirni sakatǝ dzǝ si akwa nggakurni ba akwa nggakur Tada ni ba nǝr ndzǝr hyantǝr Hyal yarni.

²⁷ Dzǝri Yi ada gha ala gǝri, ndzǝ laka adai nam ada hyihyati akwani nam kura dar ata ɗar nti, tar ma dar wula kuhyikur Hyal.”

Pali Dludzǝr Yɛsu

²⁸ Kudzǝghɛ aka vǝr ntsisu aghǝla tǝ Yɛsu tara gha sǝ ǝni, dzǝ ka kati Bitrusu, ba Yawhana, ba Yakubu adzǝni tǝ dar ka mwari alǝti ata kǝra paya akuya 'ya aduwa.

²⁹ Sakatǝ dzǝ ata kǝra 'ya aduwa, par kǝmari ka palidzi, ba lǝkutǝrni ka ndzai mwapu tǝyal ada mbǝli apa marakǝi.

³⁰ Tǝkǝma ndza ndzǝ sǝɗɛ, Musa aka Iliya, si ada ndǝrɛ akari,

³¹ dar si akwa nggakur tǝ dar ada ndǝrɛ aka Yɛsu ata kǝra whalɛ nam tǝ dzǝ ata ghǝiyaba sǝ nam tǝ Hyal ada bara atar ntǝ nam tǝ dzǝ ata 'ya akwa Ursalima.

³² Bitrusu kaka ndzǝ nam adzǝni ni dar akwa hanyi kǝgǝɓu, sakatǝ dar tara hyati dar ka wula nggakur Yɛsu ba ndzǝ sǝɗɛ ada hyihyati adzǝni.

³³ Ama sakatǝ ndzǝ yarɛ ni ada tǝra ka ngyar Yɛsu, Bitrusu ka gha ala Yɛsu, “Thlaku ata 'ya ɗaku ala muri ka mur ndzai akwani. Ngyar ka muri mǝrti dǝri makǝr, pathlu ala gǝ, pathlu ala Musa, ba pathlu ala Iliya.” (Ama Bitrusu ta zǝndi sǝ tǝ dzǝ ada ndǝrɛ ata kǝr wɛ.)

³⁴ Sakatǝ dzǝ tsu ata kǝra ndǝrɛ, dlamba ka sǝghǝl ka mbui tǝ dar, ba dar kǝtǝ hyivǝr sakatǝ dlamba ni tara mbui tǝ dar.

³⁵ Kuɗahu ka sǝba akwa dlamba ni ada nkǝrɛ, “Əni ani Zǝrna, nam tǝ Yi tara tsarba; ka gǝri sǝthlǝmɛ alari.”

³⁶ Sakatǝ kuɗahu ni kurai ndǝrɛ, ani dar wula Yɛsu dzǝ duku. Ndzǝr nuwurni yarɛ ni ndzai kǝɗǝk akwa vǝr yarɛ ǝnda dar ta gha ala kǝlara ndǝ sǝ nam tǝ dar tara wula wɛ.

Yɛsu Mbǝti Zǝr Laka nam Aka Mambǝl Kulɗa

³⁷ Sǝbar arpɛ, sakatǝ dar sǝgǝl ata kǝra paya ni, dlamiyir ndzi ka si ka ɓui Yɛsu.

³⁸ Sal laka akwa ntsa dlamiyir ndzi ni kǝga, “Malǝm, Yi ada kǝgyǝ tǝngɛ ka gǝ wula zǝrna ni, akuya dzǝ dza zǝr duku akai.

³⁹ Mambǝl nam kulɗa ada ngǝti tǝni ka hau tǝni akwa ndǝr lǝlɛ; dzǝ ada ghǝri ka sǝba aka mbumbufu akwa nyari. Adi ada ngyar tǝni nǝr saka ɓwal wɛ ba ada 'yanta tǝni.

⁴⁰ Yi kǝgyǝ ndzǝr nuwur ngɛ apǝri ka dar kǝdlǝba mambǝl nam kulɗa ni, ama dar ta mǝzi wɛ.”

⁴¹ Yɛsu ka sǝnau, “Gǝr ndzǝr zaman nam kura aka mbǝrsa ba sǝwa-sǝwa, mǝmi hangkur ndzai tǝ Yi awa ndzai kaka gǝri ba ka yiɗau tǝ Yi awa ɓati ala gǝri? Si aka zǝr ngɛ akwani.”

⁴² Wala sakatǝ zǝr ni ata kǝra si, mambǝl nam kulɗa ni ka nkai tǝni ata dai, mambǝl nam kulɗa ni nkai tǝni tǝ mbumbufu ada sǝba akwa nyari. Ama Yɛsu ka ntsǝha mambǝl nam kulɗa ni, dzǝ ka mbǝti zǝrǝrni, dzǝ ka la tǝni ala atǝgǝri.

⁴³ Ba dar sang ka ndatǝdzi ata kǝra nggakur dǝnar Hyal. Ama sakatǝ sanga dar ata kǝra ndatǝdzi ata kǝra sanga sǝ nam tǝ Yɛsu tara 'ya, dzǝ ka gha ala ndzǝr nuwurni,

⁴⁴ “Ka gǝri si thlǝma gǝri ɗaku ala sǝ nam tǝ Yi ata nkǝrɛ ala gǝri: Ndǝ ata siya ɓǝlai Zǝr Ndɛ ǝni tǝ dza ata lǝkwa tsiya ndzi.”

⁴⁵ Ama ndzǝr nuwurni ta ngaba sǝ nam tǝ dzǝ ada nkǝr ni wɛ. Akuya ɗǝwardzi ta dar, dar ta mǝzi ka ngaba wɛ, ba hyivǝr ka kanti ala dar tǝ dar awa yu tǝni ata kǝra ndǝr ni.

Wa ani Ata Ndzai Ngga ta Sang?

⁴⁶ Ani ɓwalnya ka hyati akwa dabwa ndzǝr nuwurni apǝri, wa ani ngga ta sang akwa ntsa dar.

⁴⁷ Ama Yɛsu, kurtaka zǝndi ɗǝngar dar, dzǝ ka kǝtǝ zǝr waza nkyiɗu laka ka hyanti tǝni ata ngwamari.

⁴⁸ Antǝ dzǝ ka gha ala dar, “Kǝlara ndǝ nam tara dlutsi zǝr waza nam nkyiɗu laka apa ǝni akwa thlǝmawai, dzǝ dlutsi tǝra; ba kǝlara ndǝ nam tara dlutsi tǝra, kal-kal apa dzǝ dlutsi ndǝ nam tara hyanti tǝra. Akuya ndǝ nam nkyiɗǝ ta sang akwa ntsa gǝri, dzǝ dza ngga ta sang.”

⁴⁹ Yawhana ka nkǝrɛ, “Thlakǝr kǝi, yar wula ndǝ laka ada kǝdlǝba mambǝl yarɛ nam kulɗa akwa thlǝma gǝ, ba yar ada bara ka yar kanta alari, akuya tǝ dzǝ adi akwa ntsa yar wɛ.”

⁵⁰ Ama Yɛsu nkǝrɛ ala dar, “Ta gǝri ta kanti alari mai, akuya kǝlara ndǝ nam kura ta ngǝla tǝ gǝri, dzǝ nǝgǝri.”

Ndzǝr Samariya Ngǝla Dlu Yɛsu

⁵¹ Sakatǝ sakar tǝrar Yɛsu alǝtahyal kǝ 'ya kudzǝghɛ, dzǝ ɗǝmhǝ kǝrni ka mwari alǝkwa Ursalima.

⁵² Ba dzǝ ka hyanǝba ndzǝr hya akǝmari, tǝ dar ka mwari akwa mǝlmǝr Samariya ka dar ɗǝmhǝ sanga su alari.

⁵³ Ama ndzǝ nam akwandari dar ta yiɗǝ dlu tǝni wɛ, akuya tǝ dzǝ hakǝma kǝmari atǝra akwa Ursalima.

⁵⁴ Sakatǝ ndzǝr nuwurni Yakubu ba Yawhana tara wula ahani, dar yuwɛ, “Thlaku, gǝ yiɗɛ ka yar tsau ka u'u sǝghǝl atahyal ka mbanta tǝ dar ya?”

⁵⁵ Ama Yɛsu ka mbaltǝ kǝmari ka ɗǝmnya ala dar.

⁵⁶ Yɛsu ba ndzǝr nuwurni ka mwari akwa mǝlmǝ damwa.

Bwanai nam akwa Nu Yɛsu

⁵⁷ Sakatǝ dar ata kǝra mwari akwa whalɛ, ndɛ laka ka gha ala Yɛsu, “Yi ata nu tǝngɛ alǝkwa kǝlara vui madi nam tǝ gǝ ata mwari alǝkwa.”

⁵⁸ Yɛsu ka kalaktsǝni alari, “Ufwa yarɛ aka kauwur dar, ika yarɛ aka kǝiyir dar, ama Zǝr Ndɛ adi aka vui nam tǝ dzǝ awa pi ka ghǝrbadzi ati wɛ.”

⁵⁹ Dzǝ nkǝrɛ ala ndǝ laka, “Nu tǝra.” Ama ndǝ ni nkǝrɛ, “Thlaku, tangkǝma ngyar ka Yi mwari lǝka harnta bana kwataku.”

⁶⁰ Yɛsu nkǝrɛ alari, “Ngyar ka ndzi ntǝnti ka dar harnta ndzi ntǝntǝr dar, ama gɛ mwari ka gǝ lǝka nkǝr ndǝrǝr kuhyikur Hyal.”

⁶¹ Ndǝ laka nkǝrɛ, “Yi ata nu tǝngɛ, Thlaku; ama ngyar ka Yi mwari ka Yi lǝka Salamtsǝnidzi kaka ndzǝr kuta kǝiyirna kwataku.”

⁶² Yɛsu sǝnau alari, “Ndɛ adai nam tara baditsǝni tsǝwhɛ aka galma ba dzǝ ada pughǝl ntsɛ awa mǝzi ka ndzai ndǝr 'ya kǝthlǝr akwa kuhyikur Hyal wɛ.”