Luka 7 - Kibaku NT

Hamnta Dzǝrǝr Katsalar Saudza Kumthlani

¹ Aghǝla tǝ Yɛsu tara kurai tsǝlǝrni ala ndzi akwa vǝr ǝnda, antǝ dzǝ ka tǝra alǝkwa Kafarnahum.

² Antǝ katsalar saudza kumthlani laka adai akwanda aka zǝr kǝiyirni nam tǝ dzǝ yiɗɛ, ama zǝr kǝi ni ata nya nti.

³ Sakatǝ katsalar saudza kumthlani ni tara ngati ata kǝra Yɛsu, antǝ dzǝ ka hyanǝba ndzǝr Yahudi yarɛ laka nam ngga-ngga ka dar gha alari ka dzǝ si ba ka dzǝ mbǝti zǝr kǝiyirni.

⁴ Sakatǝ dar tara si adzǝ Yɛsu, dar ka kǝgyǝ tǝni aka dǝna, ka gha, “Dzǝri, ndǝ ni dzǝ kǝ mǝzi ka gǝ mbana tǝni,

⁵ akuya dzǝ yiɗɛ ndzǝr muri, har ma dzǝ lati fǝr vǝkǝr sǝlai ala muri.”

⁶ Apani antǝ Yɛsu ka hyati ka mwari kaka dar. Sakatǝ dzǝ tara si kudzǝghɛ aka kǝi, antǝ katsalar saudza kumthlani ni ka hyanti pazǝrni yarɛ ala Yɛsu ka dar gha alari apǝri, “Thlaku ta gǝ ta ghǝrani kǝrngɛ mai, akuya Yi ta mǝzi ka gǝ si aharna wɛ;

⁷ Yi wul kǝrna apǝri Yi ta mǝzi ka Yi mwari adzǝ ngɛ wɛ. Ama ka gǝ nkǝrɛ ndǝr datsi, antǝ zǝr kǝiyirna ata mbǝtǝdzi.

⁸ Akuya Yi ma, Yi ndǝ nam akur wada, Yi aka ndzǝr mpa akwa tsiyawai: tǝ Yi ada gha ala ndǝ ǝni, ‘Mwari,’ ani dzǝ ada mwari; ba ala ndǝ damwa tsuwɛ, ‘Azǝrɛ,’ ani dzǝ ada si; Yi ada gha ala zǝr kǝiyirna apǝri, ‘Mǝrti ǝni,’ ani dzǝ ada mǝrti.”

⁹ Sakatǝ Yɛsu tara ngati ǝni ani dzǝ ka ndatǝdzi ata kǝra ndǝ ni, dzǝ ka mbaltǝdzi ka gha ala hangkur ndzǝ nam ada nu tǝni apǝri, “Yi ada gha ala gǝri, wala akwa Izǝraila Yi ta saga ɓui ndǝ nam aka hamnta dzǝri aka dǝna apa ǝni wɛ.”

¹⁰ Sakatǝ ndzǝ nam tǝ ndǝ tara hyanǝba tǝ dar ni tara ɓiti ka tǝra lǝhǝi akwa kǝiyir nggar ndǝr mpa ni, antǝ dar ka ɓui zǝr kǝi ni tara mbǝtǝdzi.

Yɛsu Hyanti Zǝrǝr Mwala Kuɗǝghum akwa Ntǝnti

¹¹ Ta sǝkar wɛ, Yɛsu mwari akwa di laka nam tǝ ndɛ ada ka tǝ Nayin, dzǝ kaka ndzǝr nuwurni, ba dlamiyir ndzi ada nu tǝni.

¹² Sakatǝ dar si kudzǝghɛ aka nyatǝfur livi akwa di nda, nda ndzǝ laka yarɛ ada sǝba aka sai ata kǝr. Ndǝ nam tara nti ni dzǝ ani zǝr duku ɗiɗi aka angǝri, mwala ni tsuwɛ dzǝ kuɗǝghum, antǝ dlamiyir ndzi nǝr kuta di nda adzǝ mwala ni.

¹³ Sakatǝ Thlaku tara wula mwala ni, dzǝ ka 'ya kalhur alari, dzǝ ka gha ala mwala ni, “Ta gǝ ta tuwa mai.”

¹⁴ Antǝ dzǝ ka mwari ka tsǝkwar lǝgau ni, ndzǝ nam ada kǝl sai ni ka hyati. Yɛsu ka nkǝrɛ, “Zǝr dakwai Yi nkǝrɛ ala gǝ, ka gǝ hyati.”

¹⁵ Antǝ ndǝ nam tara nti ni ka hyati ka ndzai, dzǝ baditsǝni ndǝrɛ, ba Yɛsu ka la tǝni ala angǝri.

¹⁶ Dar sanga ghǝi aka hyivǝr ba dar ka hǝm Hyal ka nkǝrɛ, “Nabi nam ngga kǝ ɓuidzi akwa ntsa muri. Hyal kǝ si akuya mbana ndzǝrni.”

¹⁷ Ndǝr ǝni ata kǝra Yɛsu ka kikilntadzi sang akwa diyir Yahudiya ba di nam tara dlǝti vui nda.

Yɛsu aka Yawhana Ndǝr 'Ya Bamtizǝma

¹⁸ Sakatǝ ndzǝr nuwur Yawhana tara nkǝrɛ alari ata kǝra sanga sǝ yarni,

¹⁹ dzǝ ka hyanti ndzǝ sǝɗɛ akwa ntsa ndzǝr nuwurni adzǝ Thlaku ka yuwɛ, “Gǝ dza ndǝ nam ata si ni, kǝna ka yar sǝkǝ ndǝ damwa?”

²⁰ Sakatǝ ndzǝ yarɛ ni tara si adzǝ Yɛsu, dar ka nkǝrɛ, “Yawhana Ndǝr 'Ya Bamtizǝma hyanti tǝ yar adzǝ ngɛ ka yar yuwɛ, ‘Gǝ dza ndǝ nam ata si ni, kǝna ka yar sǝkǝ ndǝ damwa?’ ”

²¹ Tsu ata saka ǝnda Yɛsu ka mbǝti ndzǝ hang ndzǝ nam aka kasuwa yarɛ ndzǝ kura kalang yarɛ ba ndzǝ aka mambǝl nam kulɗa-kulɗa, ba la wuti su ala ndzǝ nam ghyang hang.

²² Ani dzǝ ka kalaktsǝni ala mǝhyar Yawhana yarni, “Mwari mɛ ka gǝri tsǝba ala Yawhana sǝ nam tǝ gǝri tara wula ba sǝ nam tǝ gǝri tara ngati: ndzǝ nam ghyang ada mǝzi wula su, ndzǝ nam ngurngudi ada mǝzi mwari, ndzǝr pǝbai ada mbǝtǝdzi, ndzǝ nam kulang ada mǝzi ngati su, ndzǝ nam ntǝnti ada hyati aka mpikɛ, ndǝr nam sǝɗa ni ani tǝ ndǝ nkǝrnta ala ndzǝ nam ngudi.

²³ Kutsari aka ndǝ nam kura ta dla kadǝbarna!”

²⁴ Aghǝla tǝ mǝhyar Yawhana yarni tara tǝra, Yɛsu kǝ baditsǝni ndǝrɛ ala dlamiyir ndzi ata kǝra Yawhana, “Mi tǝ gǝri tara mwari abǝla akwa ntaku ka wula? Kusar nam tǝ sambar ada padɛ ya?

²⁵ Ma adi apani wɛ, mi tǝ gǝri lǝka wulɛ? Sal tara hadzǝ kari nam ɗaku ya? A'a, ndzǝ nam ada ha kari nam dzau ba ada ndzai akwa nga sǝɗa dar ahar kuhyi yarɛ!

²⁶ Ama mi tǝ gǝri tara mwari abǝla ka wula? Nabi ya? dzǝri, Yi ada gha ala gǝri, dzǝ kwatsǝni nabi.

²⁷ Əni ani ndǝ nam tǝ ndǝ tara rǝbwa ata kǝrari akwa ndǝrǝr Hyal nam rǝbwa-rǝbwa apǝri: “ ‘Yi ata hya ndǝr hyarna akǝma ta gǝ, ndǝ nam ata ɗǝmhǝi whalǝr ngɛ ma gǝ ata mwari.’

²⁸ Yi ada gha ala gǝri, akwa ntsa ndzǝ nam tǝ mwahyi ani tara yaba tǝ dar, ndǝ adi nam tara kwatsǝni Yawhana aka nggakur wɛ, ama wala apani, ndǝ nam nkyiɗu ta sang akwa kuhyikur Hyal dzǝ kwatsǝni Yawhana aka nggakur.”

²⁹ Sakatǝ dar tara ngati ndǝr ni apani, sanga ndzǝ nam akwanda har ma kaka ndzǝr dlu tsimɛ yarɛ nam kura aka dzǝrkur ma kǝlǝngkǝr aka whalǝr Hyal ani kal-kal, akuya Yawhana ani tara 'ya ala dar bamtizǝma.

³⁰ Ama ndzǝr Farisi ba masǝku akwa mabari yarni dar ka ngǝla sǝ nam tǝ Hyal tara ɗǝmhǝ ala dar, akuya dar ta yiɗɛ ka dlu bamtizǝma akwa tsiya Yawhana wɛ.

³¹ Antǝ Yɛsu ka lǝkǝma aka ndǝrɛ, “Yau, aka mi dzá tǝ ndǝ awa nkǝrti ndzǝr zaman ǝni dzá? Dar apa mi?

³² Dar ndzai apa madausai nam ada ndzai ata babal kasuku ada kǝga kǝma dar: “ ‘Yar kǝ mbǝr sala ala gǝri, ama gǝri ta fǝl wɛ. Yar ka ɗalu har tuwa ndɛ, ama gǝri ngǝla tuwa.’

³³ “Akuya Yawhana Ndǝr 'Ya Bamtizǝma tara si ni, wala sǝm sǝr sǝmɛ wala sa yimǝr inabi, antǝ gǝri gha apǝri, ‘Dzǝ aka mambǝl nam kulɗa.’

³⁴ Zǝr Ndɛ nam tara si, dzǝ ada sǝmɛ ba sa, antǝ gǝri ada nkǝrɛ alari, ‘Wulamɛ ndǝ ni kǝi dzǝ nyanyam ba ndǝr sa su, dzǝ pazǝr ndzǝr dlu tsimɛ ba ndzǝr “biku yarɛ.” ’

³⁵ Ama bǝrkawakur Hyal ada tsantǝdzi ka ndzai dzǝri atar sanga madarni.”

Yɛsu Kyifǝnta Biku ala Mwala Laka

³⁶ Antǝ pathlu akwa ntsa ndzǝr Farisi ka kǝga Yɛsu akuya ka dzǝ mwara sǝm sǝr sǝmɛ aivi aharni, antǝ Yɛsu ka mwari ahar ndǝr Farisi ni, ka ndzai vwam ata vui sǝm sǝr sǝmɛ.

³⁷ Sakatǝ mwala laka adai nam tǝ dzǝ ndǝr biku akwa di ǝnda tara ngati apǝri Yɛsu ada sǝm sǝr sǝmɛ ahar ndǝr Farisi ni, dzǝ ka si aka gira tǝ ndǝ 'ya tǝ alabasta ghǝi-ghǝi aka wardi,

³⁸ ba dzǝ ada hyati tǝbwar hǝiya Yɛsu adzǝ thlǝlari, tǝ dzǝ ada tuwa dzǝ ka baditsǝni lǝɓti thlǝla Yɛsu aka sǝmwaiyirni, dzǝ ka ɗangulnta thlǝlari ni aka sǝsǝr kǝrari, antǝ dzǝ ka tsǝkwar thlǝla Yɛsu tǝ nyari, ba dzǝ ka pukǝr wardi ala thlǝla Yɛsu.

³⁹ Sakatǝ ndǝr Farisi nam tara kǝga Yɛsu ni tara wula apani, antǝ dzǝ ka kwamtsǝni akwa ɗǝfari apǝri, “Ma ndǝ ni ani nabi dzǝri dzá, kulini dzǝ ata zǝndi dzǝli mwala nam ada tsǝkwa tǝni ni; ka dzǝ zǝndi tsuwɛ apǝri dzǝ ndǝr biku nam dzau!”

⁴⁰ Antǝ Yɛsu sǝnau ka gha alari, “Simaun, Yi aka su tǝ Yi ada bara ka Yi gha ala gǝ.” Antǝ dzǝ ka nkǝrɛ, “Malǝm, gha alai.”

⁴¹ Antǝ Yɛsu ka nkǝrɛ, “Ndǝ laka adai nam tara kyifǝnta kimbǝlǝr kwapa ala ndzǝ sǝɗɛ: Ndǝ pathlu dzǝ dlutsi kimbǝlǝr sǝlai kumthlani ntufu, nǝr ndǝ pathlari tsuwɛ dinariyus ntufuthlani.

⁴² Sakatǝ dar ta mǝzi ka kyinta wɛ, ani dzǝ ka kyifǝnta ala gyapa dar. Wa ata kwatsǝni aka yiɗǝ tǝni?”

⁴³ Simaun ka kalaktsǝni alari, “Yi tǝmatsǝni dzǝ nam tǝ ndǝ tara kyifǝnta alari nam hang ni.” Yɛsu ka nkǝrɛ alari, “Yawɛ! Hakar ngɛ kǝ 'ya kal-kal.”

⁴⁴ Antǝ Yɛsu ka mbaltǝdzi tǝbwar mwala ni ka nkǝrɛ ala Simaun, “Gǝ wula mwala ǝni wɛ? Tǝ Yi tara si aivi ahar ngɛ, gǝ ta lai yimi akuya ka Yi kǝtsǝnta thlǝlawai wɛ, ama mwala ni kǝtsǝnta thlǝlawai aka sǝmwaiyirni ka ɗangulnta aka sǝsǝr kǝrari.

⁴⁵ Gǝ ta tsǝkwar tǝra aka nya gǝ wɛ, ama mwala ǝni, akwa sakatǝ Yi sivi, dzǝ ta ngyar tsǝkwar thlǝlawai aka nyar wɛ.

⁴⁶ Gǝ ta pukǝr mal zaitun akwa kǝrawai wɛ, ama dzǝ puti alai wardi nam ada sǝwur sǝɗa ata thlǝlawai.

⁴⁷ Kadǝbar ǝni Yi ada gha ala gǝ, wala tǝ bikǝrni yarɛ nam hang ni, kǝ kyifǝntadzi alari, akuya dzǝ aka yiɗǝdzi nam hang. Ama kǝlara ndǝ nam tǝ ndǝ kyifǝnta alari nkyiɗu dzǝ aka yiɗǝdzi nam nkyiɗu.”

⁴⁸ Antǝ Yɛsu ka nkǝrɛ ala mwala ni, “Bikǝr ngǝ yarɛ kǝ kyifǝntadzi.”

⁴⁹ Ama ndzǝ nam ada ndzǝndzai ata vui sǝm sǝr sǝmɛ kaka Yɛsu ni, kǝ baditsǝni gha ala kǝma dar apǝri, “Wa ǝni, nam tǝ wala biku yarɛ ma dzǝ ada kyifǝnta?”

⁵⁰ Ama Yɛsu nkǝrɛ ala mwala ni, “Hamnta dzǝrǝr ngɛ kǝ mbati tǝngɛ; mwari aka lapiyakur.”